7
Ka pegtalu ni Gidyun te me matig-Midiyan
1 Migselem-selem nangenew ensi Hirub-Baal (ne iyan si Gidyun) wey ka me sundalu rin. Ne nangekampu sikandan diye te dangdang te sebseb te Harud. Ne diye ka kampu te me matig-Midiyan te napu dapit te igkahibang ne balabahan dan, ne marani te bubungan te Muri.
2 Ne ingkahiyan te Magbebaye ne Manama si Gidyun, “Masulug de amana ka me sundalu nu eyew igpatalu ku kaniyu ka me matig-Midiyan. Kema ke egpaambug sikandan ne natalu ran ka me matig-Midiyan tenged te kanekal ran wey kene ne tenged keddi. 3 ✡ Diy 20:8.Sikan naa, nangeni nu ka keet-etawan, ‘Hentew seeye se egkaaldek wey egpangelkelen e te liyas, awe kew e kayi te bubungan wey uli kew e.’ ” Purisu, nanguli e diye te ugpaan dan ka daruwa ne pulu wey daruwa ne libu ne me etew (22,000), wey sapulu ne libu (10,000) naan de ka nasame.
4 Piru ingkahiyan pad iya man‑e te Magbebaye ne Manama si Gidyun, “Amana pad ne masulug sikandan! Uyana nu sikandan diye te weyig su eggeraman ku sikandan eyew eg-alamen ku ke hentew ka igparuma ku keykew wey hentew ka kene egpakaruma.” 5 Purisu in-uyan ni Gidyun ka me sundalu diye te weyig. Ne ingkahiyan sikandin te Magbebaye ne Manama, “Ilein nu seeye se eg-inum ne eg-iling te asu ne egdilaan de ka weyig, wey ilein nu degma seeye se eg-inum ne egpanimbuel.” 6 Ne duen de tatelu ne gatus (300) ne etew ne egsakuhen te belad ka weyig. Piru migmanimbuel ne eg-inum te weyig ka langun ne nasame. 7 Ne ingkahiyan te Magbebaye ne Manama si Gidyun, “Seini se tatelu ne gatus (300) ne migsakug te belad dan te weyig, sikandan ka egpaluwasen ku kaniyu wey egkatalu ran ka me matig-Midiyan.” 8 Sikan naa, impeuli e ni Gidyun ka duma ne me Israilita diye te me ugpaan dan,* Te Hibruwanen: Te me balungbalung dan. piru inggaat din ka me inuyanan dan† Te Hibruwanen: ka diye te me belad dan. wey ka me trumpita ran. Ne tatelu ne gatus (300) naan de ka me etew ne migduma kandin. Ne ka kampu te me matig-Midiyan diye te napu ne diralem dan.
9 Te nasagkup e, ingkahiyan te Magbebaye ne Manama si Gidyun, “Pangandam kew, lusuri niyu ka kampu ran su igtuhut kud ne egkatalu niyu sikandan. 10 Piru ke egkaaldek ka ne eglusud, tupang ke naan pa diye te kampu ran. Dumaa nu ka suluhuanen nu ne si Pura. 11 Ne pammineha niyu ka me guhuren dan. Egkataman, egkabagget kad amana ka eglusud.” Purisu migtupang e si Gidyun wey si Pura ne suluhuanen din diye te marani te kampu te me etew ne kuntere dan. 12 Ne nanlibulung diye te napu ka me matig-Midiyan, me matig-Amalik, wey ka langun ne keet-etawan te igsile, egpekeiling sikandan kasulug te me talangas. Ne ka kasulug te me kamil ran iling kasulug te pantad te dahat.
13 Te pegginguma enni Gidyun, due narineg dan ne etew ne migpangguhud te taheinep diye te senge-etew. Migkahi ka etew, “Nakataheinep a ne due sabeka ne paan ne sibada ne nalilid kayi te kampu ta. Nenasuhat ka me balungbalung ta wey napeled e seini wey nahuhus e.”
14 Ne migtabak ka senge-etew, “Warad e duma ne igpasabut due ke kene, iyan e si Gidyun ne Israilita ne anak ni Huwas. Igpatalu kandin te Manama ka me matig-Midiyan wey ka langun ne kayi te kampu ta.”
15 Te pegkarineg ni Gidyun te taheinep wey te kaluwasan dutu, mig-usengul sikandin ka migsimba te Manama. Pegkeimpus, miglibed e sikandin diye te kampu te me Israilita wey migkahi sikandin, “Taggel kew! Igpatalu e kanta te Manama ka me matig-Midiyan.” 16 Ne impunduk-punduk din ka tatelu ne gatus (300) ne etew te tatelu ne punduk. Ne imbehayan din ka tagse sabeka kandan te trumpita wey sulu ne intahu te banga.‡ Intahu te me banga ka me sulu eyew kene egkiteen te kuntere, wey eyew kene egkeebukan te kalamag. 17 Ne migkahiyan din sikandan, “Emun ke egginguma kid diye te kampu ran, tengtengi a nikaniyu wey ilingi niyu ke nekey ka eggimuwen ku. 18 Ke igparahing ku wey te me duma ku ka me trumpita ney, sikaniyu degma langun ne nakalingut te kampu iparahing niyu degma ka me trumpita niyu wey panguleyi kew te, ‘Egpakiggira ki para te Magbebaye ne Manama wey ki Gidyun!’ ”
19 Te egliware e te marusilem seeye, wey te sikan pad iya egpasubaley ka talagtameng, miggingume e si Gidyun diye te ilis te kampu wey ka mahatus (100) ne etew ne duma rin. Ne imparahing dan e ka me trumpita ran wey impamese dan e ka me banga ne in-uyan dan. 20 Ne iling ded ka inggimu te daruwa ne punduk, imparahing dan degma ka me trumpita ran wey impamese dan degma ka me banga dan. Ingkemkem dan te gibang ne belad dan ka me sulu wey inggen-genan dan te kawanan ne belad dan ka me trumpita ne imparahing dan, wey migpanguleyi sikandan, “Egpakiggira ki para te Magbebaye ne Manama wey ki Gidyun!” 21 Migsasindeg ka tagse etew ne duma ni Gidyun diye te nalengeran dan lingut te kampu, wey namallahuy ka langun ne kuntere dan ne me sundalu, wey migmanguleyi ka egmanlungkesu. 22 Taheed te migparahing te me trumpita ka tatelu ne gatus (300), impeg-uney te Magbebaye ne Manama megtibbasa ka me etew ne diye te kampu. Namallahuy sikandan diye te Bit-Sita peendiye te Sirira, taman diye te eletanan te Abil-Mihula ne marani te Tabat.
23 Ne impeumew ni Gidyun ka me Israilita ne puun te kabuhalan ni Naptali, Asir, wey Manasis, wey impatalukunan din kandan ka me matig-Midiyan. 24 Migsuhu si Gidyun te egpahuhuren diye te intiru ne bubungan ne inged te me kabuhalan ni Ipraim ne egpakahiyen, “Tupang kew ka egpakiggira te me matig-Midiyan. Bantayi niyu ka Weyig ne Hurdan wey ka me weyig diye te Bit-Bara eyew kene sikandan egpakalapas diye.” Sikan naa, miglibulung ka langun ne etew te kabuhalan ni Ipraim wey imbantayan dan ka Weyig ne Hurdan wey ka me weyig diye te Bit-Bara. 25 Ne narakep dan ka daruwa ne pangulu ne matig-Midiyan ne si Urib wey si Siib. Inggimatayan dan si Urib diye te Batu te Urib, wey diye dan himatayi si Siib te Kelesanan te Behas te Paras ni Siib. Ne impanalukunan dan ka me matig-Midiyan, wey in-uyan dan ka ulu ni Urib wey ni Siib diye ki Gidyun ne diye te talipag te Hurdan.