1 Ne miggimu e man‑e te mareet ka me Israilita diye te tangkaan te Magbebaye ne Manama. Purisu impeuripen din e man‑e sikandan te me Pilistihanen te hep‑at ne pulu (40) ne leg‑un. 2 Ne due etew ne matig-Sura ne egngaranan ki Manuwa ne kabuhalan ni Dan. Ne kene eg-anak ka asawa rin. 3 Sabeka ne aldew, migpakita ka panalihan te Magbebaye ne Manama diye te asawa ni Manuwa wey migkahi, “Malehet ne ware me anak nu. Piru egkaberes ka wey eg-anak ka te lukes. 4 Purisu puun kuntee, kene ka inum te binu wey minsan nekey ne egpekewubug ne inumen, wey kene ka keen te egkakeen ne in-isip ne malindit. 5  ✡ Num 6:1-5.Emun ke eglesut e ka anak nu, kene nu patempuhi ka bulbul rin su inhalad e sikandin diye te Manama eyew egkeyimu ne Nasariyu* Ka Nasariyu iyan ka etew ne migpanaad diye te Manama ne kene eg-inum te binu, kene egpaalut, wey kene eggen-gen te minatey. puun te peglesut din pad. Sikandin ka egbunsud ne egluwas te Israil puun te me Pilistihanen.”

6 Ne miggendiye ka malitan te asawa rin wey ingkahiyan din, “Due migpakita keddi ne impeuyan te Manama. Egpekeiling sikandin te panalihan te Manama. Naaldek a amana. Wara a mig-inse ke hendei sikandin migpuun wey ware degma sikandin migpanugtul keddi. 7 Piru ingkahiyan a nikandin, ‘Egkaberes kad e wey lukes ka igkaberes nu. Purisu puun kuntee, kene ka inum te binu wey minsan nekey ne egpekewubug ne inumen, wey kene ka keen te egkakeen ne in-isip ne malindit. Su inhalad e diye Manama ka bate eyew egkeyimu ne Nasariyu puun pad te peglesut din taman te egpatey sikandin.’ ”

8 Ne tenged kayi, mig-ampu si Manuwa diye te Magbebaye ne Manama ne migkahi, “He Magbebaye ne Manama, egpeyid‑u-hid‑u a keykew, palibera nu pa ubag ka etew ne impeendini nu eyew egpanuluen key ke nekey ka eggimuwen ney ke eglesut e ka bate.” 9 Ne intabak te Manama ka peg-ampu ni Manuwa. Mig-abey migpakita ka panalihan te Manama diye te asawa ni Manuwa taheed te migpinnuu sikandin diye te kamet; piru te seeye ne timpu, ware si Manuwa ne iglukes din. 10 Purisu, miglambunus sikandin miggendiye te iglukes din wey ingkahiyan din, “Kayi kuntee ka etew ne migpakita keddi te miglihad ne aldew.” 11 Ne migsasindeg si Manuwa wey migsinundul te asawa rin. Te pegkakita rin te etew, mig-inse sikandin, “Sikeykew ka migpakiglalag te asawa ku?”

Migtabak ka etew, “Uya, sikeddi.”

12 Ne migkahi si Manuwa, “Ke egkatuman e ka inlalag nu, nekey ka egkeula-ula te bate wey nekey ka eleg ne eggimuwen din?”

13 Ne migtabak ka panalihan te Magbebaye ne Manama ki Manuwa, “Keilangan ne egtantanuran te asawa nu ka langun ne ingkahi ku kandin. 14 Keilangan ne kene sikandin egkeen te minsan nekey ne egpuun te paras. Kene man‑e sikandin eg-inum te minsan nekey ne binu wey ke inumen naa ne egpekewubug, wey ke egkeen naa te minsan nekey ne egkakeen ne in-isip ne malindit. Ipatuman nu kandin ka langun ne ingkahi ku kandin.”

15-16 Ne ingkahiyan ni Manuwa ka panalihan te Magbebaye ne Manama, “Kaayun ne kene ke pa hipanew su eggilangan ney pad sikeykew te nati te kambing?”

Ne migtabak ka panalihan, “Minsan ke eggawiran a nikaniyu, kena a egkeen te minsan nekey ne keenen. Piru egkaayun ne eg-andam ka te igpanubad ne egtutungen para te Magbebaye ne Manama.” (Ware nataheyi ni Manuwa ne panalihan bes seeye te Magbebaye ne Manama.)

17 Ne ingkahiyan ni Manuwa ka panalihan, “Hentew‑a ka ngaran nu? Su egbantuhen ney sikeykew ke egkatuman e ka inlalag nu.”

18 Ne migtabak ka panalihan, “Mania te eg-inse ka te ngaran ku? Kene nu egkasabut ka ngaran ku.”

19 Ne mig-angey e si Manuwa te nati ne kambing wey keenen, ne inhalad din seini diye te batu ne altar te Magbebaye ne Manama. Taheed te migtengteng si Manuwa wey ka asawa rin, due kein-inuwan ne inggimu te panalihan te Magbebaye ne Manama. 20 Te migkanlabkanlab e ka hapuy peendiye te langit, nabatun e ka panalihan te Magbebaye ne Manama duma te hapuy. Te pegkakita dutu te alunggun, miglangkeb sikandan diye te tane. 21 Ne warad mig-abey migpakita kandan ka panalihan. Ne dutu, nanengnengan ni Manuwa ne panalihan bes seeye te Magbebaye ne Manama.

22 Ne migkahiyan ni Manuwa ka asawa rin, “Egkapatey kid iya tenged su nakakita ki te Manama!”

23 Piru migtabak ka asawa rin, “Emun ke eggimatayan ki pa te Magbebaye ne Manama, ware din e perem dawata ka impanubad ta. Ne ware din e perem ipakita ka me kein-inuwan, wey ware din perem ihuhud seini kanta kuntee.”

24 Nataman, inlesutan en iya ka asawa ni Manuwa te lukes ne bate wey ingngaranan dan ki Samsun. Migtulin ka bate ne impanalanginan te Magbebaye ne Manama. 25 Ne migbunsud ka Panisingan te Magbebaye ne Manama ne migweil kandin taheed te diye sikandin mig-ugpe te Mahani-Dan, ne diye te elat-elat te Sura wey Istaul.