12
Ka tabak ni Hub ki Supar
1 Ne migtabak si Hub,
2 “Migsuman-suman kew ne sikaniyu re ka me matagseb
wey warad lein ne matagseb ke egkammatey kew e.
3 Piru matagseb e ma degma iling kaniyu;
kene kew egpakakahi ne labew kew keddi.
Hentew bes naa ka ware nakanengneng te sika se impanlalag niyu?
4 Neyimu a ne kangisiyan te me alukuy ku
minsan matareng a wey ware igkarew‑ey keddi.
Mig-ampu a dengan te Manama wey intabak a nikandin.
5 Nasi de iya egderali-dii te memeupiya se keugpe
ka etew ne mig-antus wey mahaan e egkapeled iling keddi.
6 Piru malinawen mule ka peg-ugpe te me tulisan
wey seeye se migpeyibelu te Manama
ne iyan dan inggimu ne manama ka keseg dan.
7-8 “Masulug ka egkatuenan niyu puun te nalein-lein ne me mananap;
me mananap ne eggipanew, eglayang, egdul‑ug, wey eglumbuk.
9 Nakanengneng langun sikandan ne ka Magbebaye ne Manama iya ka miggimu kandan.
10 Sikandin ka egbuut te langun ne eggeheyinawa
lagkes ka etew.
11 Ke egkaheram te dile ka nanam te egkakeen,
egkarineg degma te talinga ka me lalag.
12 Ka me buyag, iyan due katuenan,
wey ka nenabuybuyahan e, iyan due pegsabut.
13 “Piru diye te Manama ka katagseb, karesen,
wey salabutan te pegnengneng ke nekey ka eleg ne eggimuwen.
14 Purisu ware egpakabalew-balew egpasasindeg te egguhusen din,
wey ware egpakapalihawang te egkulungen din.
15 Tengteng kew ma, eggulabung ke kene egpeuranen te Manama,
wey egbaggiyuwan man‑e ka tane ke egpalugsuen din ka uran.
16 Diye egkakita te kandin ka karesen wey ka dakel ne katuenan,
wey nariralem din ka seeye se egpanlimbung wey ka nalimbungan.
17 Egpangawaan din te katagseb ka me talagtambag,
wey eggimuwen din ne egkengeungel ka me talewukum.
18 Egpangawaan din te katenged ka me Hari,
wey igmarakep din sikandan.
19 Egpangawaan din te katenged ka me talagpanubad,
wey ka due me katungdanan.
20 Egpape-peenengen din ka me talahuren ne me talagtambag,
wey egpangawaan din te katuenan ka me igbuyag.
21 Egpeyilawan din ka me talahuren,
wey egpangawaan din te katenged ka maddesen.* Te Hibruwanen: eggekaran din te libed ka mannekal.
22 Igpanengneng din ka nekeeles ne kamalehetan† Te Hibruwanen: kene egkatirew. te marusilem,
wey egliwanan din te malayag ka marusilem.
23 Eglig‑enen din ka me nasud wey egdereetan din ded man‑e;
eggiluahan din ka me inged wey egguhusen din ded man‑e.
24 Egpangawaan din te katuenan ka me pangulu te me etew te kalibutan,
wey egmaleleuhen din diye te inged ne ware mig-ugpe.
25 Egmakapanamsam sikandan te marusilem ne warad iya sulu,
wey egmakatilistilis ne iling te egkengewubug.”