15
Ka igkarangeb ne peglalahey
(15:1–21:34)
1 Ne migtabak si Ilipas ne matig-Timan,
2 “Hub, ka matagseb ne etew, kene egpanlalag te ware karuan
iling te kalamag ne egpuun te igsile ne egpakatutung.
3 Kene sikandin egpakig-apul pinaahi te me lalag ne ware egkaangey ne keupianan,
wey ke egpakannekal naa eglalag te ware meupiya ne egkeyimu.
4 Piru ka impanlalag nu, egpekeyinalig de te duma
ne kenad e egtahud wey egpamakey te Manama.
5 Ka impanlalag nu, iyan sika behas te kene ne meupiya ne neyimu nu,
wey lalag sika te me limbungen.
6 Kenad ne keilangan ne eggukuman ku pad sikeykew
su ka impanlalag nu, iyan e sika eggukum keykew.
7 “Kahiyen nu buwa ne sikeykew ka an-anayan ne miglesut?
Neetew kad bes te ware pad himuwa ka me bubungan?
8 Nakarineg ke bes te planu te Manama?
Kahiyen nu buwa ne sikeykew re ka matagseb?
9 Ka minsan nekey ne nanengnengan nu, nanengnengan ney degma.
Ka minsan nekey ne nasabut nu, nasabut ney degma.
10 Nanengnengan ney ka me katuenan ney puun te me buyag,
ne me buyag-buyag pad te amey nu.
11 Miglalag key ne kene ne malangit te pegguhud keykew te me lalag puun te Manama;
me lalag ne egpakaliwang wey egpakapahale;
kulang naan pad seini para keykew?
12 Mania te egparuyun-duyun ka te egkaheram nu?
Mania te impasihaan key re nikeykew te mata nu?
13 Mania te egkabelu-belu ka te Manama,
wey egpanlalag te mareet?
14 ✡ Hub 25:4-6.Duen naan iya etew ne malinis
wey matareng diye te tangkaan te Manama?
15 Purisu ware migsalig ka Manama minsan te me panalihan din!* Te Hibruwanen: me matulus din.
Ke kene ma ne malinis ka pegtengteng te Manama te me hinimuwan ne diye te langit,
16 iyan naan pa ka etew ne egpekeepes wey makasesale
ne layun egkeupian ne eggimu te mareet.† Te Hibruwanen: ka etew ne eg-inum te mareet ne himu iling te weyig.
17 “Kema pammineg ka Hub su egguhuran ku sikeykew,
wey egpasabuten te nabaybayaan ku.
18 Impanulu a te me matagseb,
te natuenan dan puun te me kaap-apuan dan,
wey ware inggeles dan.
19 Sikandan ka imbehayan te tane,
wey ware me lapu ne nangugpe‡ Te Hibruwanen: migmanlihad. te tane dan.
20 Ka etew ne egdeeg-deeg te duma, eg-antus te intiru ne umul rin,
taman te egpatey sikandin.
21 Layun sikandin egkabantali
minsan ware karereetan ne egginguma,
su egkangilam man de due sikandin ke eglusuran te me takawen.
22 Ne kene sikandin eggipanew diye te marusilem
su egkaaldek ma ne eggimatayan.
23 Egkalaag-laag sikandin minsan hendei
eyew egpamitew te egkakeen.
Nakanengneng sikandin ne mahaan e sikandin egpatey.§ Te Hibruwanen: ka timpu te marusilem, andam e te belad din.
24 Amana ka bantal wey laggew rin,
iling te Hari ne andam e ne eglusud te me kuntere din.
25 Sika ka egpangkusan te etew ne egsukul wey egsupak* Te Hibruwanen: egketeng te belad din. te Maresen ne Manama.
26 Egpekeiling sikandin te miggehen-gen te malig‑en wey malibusen ne kalasag
wey migpaalag-alag ne egpakigkuntere te Manama.
27 “Ne minsan meyaman sikandin wey malambeg,
28 piru diye naan de sikandin eg-ugpe te me siyudad ne nagguhus,
diye te me baley ne warad mahinged wey mahaan e egkengatempag.
29 Kenad e egkaluhey ka pegkameyaman din
wey ka karatuan din,
wey kenad seini egdakel kayi te tane.
30 Ne kene sikandin egpakaalihu te kamatayen.
Egpekeiling e sikandin te kayu ne egkatutung se me sugpang.
Egkaawe ka langun ne karatuan din te senge-hiyup de te Manama.
31 Kene ne eleg ne eglimbungan din ka pegkeetew rin
pinaahi te pegsalig te minsan nekey ne ware karuan
su ware iya egkakuwa rin due.
32 Te kene pad sikandin egkabuyag amana,
egkarawat din ka legpad kandin,
wey egpekeiling e sikandin te nahangu ne kayu ne kenad e egtunasan.
33 Egpekeiling sikandin te paras ne egkengapupu se behas minsan ware pad neneyinuhi,
wey iling te ulibu ne egkengapelpel se kabukaran.
34 Ka me etew ne ware migpalintutuu te Manama, egkammatey ne ware me kabuhalan,† Te Hibruwanen: Su ka punduk te me etew ne ware migpalintutuu te Manama, kene egpakaanak.
wey egkengasilaban ka me baley ne impasasindeg dan pinaahi te bayad ne igbunbun te mareet.
35 Layun sikandan egsuman-suman ne eggimu te samuk wey mareet,‡ Te Hibruwanen: egkaberes te samuk wey eg-anak te mareet.
wey egpanlimbung.Ӥ Te Hibruwanen: ka me getek dan eg-andam te limbung.
*15:15 Te Hibruwanen: me matulus din.
†15:16 Te Hibruwanen: ka etew ne eg-inum te mareet ne himu iling te weyig.
‡15:19 Te Hibruwanen: migmanlihad.
§15:23 Te Hibruwanen: ka timpu te marusilem, andam e te belad din.
*15:25 Te Hibruwanen: egketeng te belad din.
†15:34 Te Hibruwanen: Su ka punduk te me etew ne ware migpalintutuu te Manama, kene egpakaanak.
‡15:35 Te Hibruwanen: egkaberes te samuk wey eg-anak te mareet.
§15:35 Te Hibruwanen: ka me getek dan eg-andam te limbung.