22
Ka igkatelu ne pegpalalahey
(22:1–27:23)
1 Ne migtabak si Ilipas ne matig-Timan,
2 ✡ Hub 35:6-8.“Duen naa etew, minsan ka subla ne matagseb ne egpakabulig te Manama?
3 Egpakapahale naa te Maresen ne Manama ka pegkamatareng nu?
Duen naa egkakuwa rin puun keykew ke ware igkarew‑ey keykew?
4 Insaparan ka te Manama wey in-el-elehan,
kene ne tenged su migtahud ka kandin,
5 ke kene, tenged te suble e ka mareet ne hinimuwan nu,
wey ware ka migsanggel ka eggimu te mareet
6 su ingkuwa nu ma ka me kumbale te me karumaan nu
isip gerentiya te utang dan keykew.
Purisu warad igsaluub dan.
7 Ware nu peinuma ka nammaraan,
wey ware nu pakeena ka inggutasan.
8 Inggamit nu ka keseg wey katenged nu,
eyew te peg-angken te tane te lein ne me etew.
9 Ke due me balu ne egpabulig keykew, egpeulien nu re due sikandan ne ware egkeuyan.
Ne impanakawan wey indeeg-deeg nu pad iya man‑e ka me ilu.
10 Purisu nalingutan ka kuntee te me sahilut,
wey sahuhune ne iyan egdapit keykew ka liyas.
11 Nalingutan ka te marusilem,
wey kene kad e egpakakita,
wey egkaalep kad te baggiyu.
12 “Diye te kinaribabawan ne baad te langit ka Manama,
wey subla pad ne matikang te me bituen.
13 Purisu migkahi ka,
‘Ware nakanengneng ka Manama te inggimu ku.
Egmenuwen din naa te eggukum kanta te nabunbunan ma sikandin te makepal ne gapun?’
14 Migsuman-suman ka ne kene sikandin egpakakita,
su neeletan sikandin te makepal ne gapun,
taheed te eggiphipanew sikandin diye te eletanan te tane wey langit.
15 Egpabulus-bulus ke bes pad eg-ikul te hinimuwan dengan
te me makasesale?
16 Minsan kene pad ne eleg ne timpu ne egpatey sikandan,
egpanganlasen e sikandan iling te pabunsuranan te baley ne nalened te baggiyu.
17 Ingkekahiyan dan ka Maresen ne Manama,
‘Engkeri key!
Nekey naa ka egkeyimu nu kanami?’
18 Piru minsan pad due, nasi de iya sikandan matubunga te Manama.
Purisu maddiyu te suman-suman ku ka minsan nekey ne igpanulu te me makasesale.
19 Ne egkengahale wey egmangngingisi ka me matareng wey ka me etew ne ware sale
ke egkakita ran e ka karereetan te me makasesale.
20 Ne egkekahi sikandan,
‘Egkahule iya ka me kuntere ta,
wey egkengasilaban ka egkengasame ne karatuan dan.’
21 Ne kuntee Hub, paruma-ruma ka te Manama,
eyew egmalinawen ka,
wey egpanalanginan ka nikandin.
22 Dawata nu ka me panulu te Manama keykew,
wey itines nu te pusung nu ka me lalag din.
23 Libed ka diye te Maresen ne Manama duma te pegpariralem,
wey ipeeneng-eneng nud ka mareet ne himu due te pamilya nu.
24 Isipa nu ka bulawan ne egpuun te Upir ne iling naan de te alinepung,
wey ka neelin ne bulawan iling naan de te me batu diye te beuhan.
25 Ne iyan nud e karatuan ka Amana ne Maresen ne Manama
iling te bulawan wey mahal ne pelata.
26 Ne egkahale ka tenged te Amana ne Maresen ne Manama,
wey sikandin naan de ka egleng-ahen nu.
27 Ne emun ke eg-ampu ka kandin,
egtabaken ka nikandin.
Ne tumana nu ka me panaad nu diye te kandin.
28 Ne eglampus ka te minsan nekey ne egplanuwen nu ne eggimuwen,
wey egmalayag ka egbayaan nu.
29 Ne igpariralem te Manama ka me hambuhen,
piru egpangabangan din ka me mapariralemen.
30 Egpangabangan ka te Manama ke ware sale nu,
su egpangabangan te Manama ka me etew ne matareng.”