24
Ka pegsagsahukul ni Hub tenged te me makasesale
1 Ne migkahi e man‑e si Hub,
“Mania te ware migteil te timpu ka Maresen ne Manama eyew te peggukum te me makasesale,
eyew egkakita te langun ne mig-ila kandin, ka me peggukum din?
2 “Egpangensihen e te me etew ka me tuus te eletanan te tane, eyew egmaluag ka tane dan;
egmanakew sikandan te me ayam,
wey igmalemung dan e te me ayam dan.
3 Ne egpanuyuken dan ka me asnu te me ilu,
wey ka me baka te me balu,
isip gerentiya te me utang.
4 In-awaan dan te katenged ka egkengaayu-ayu,
purisu napehes e sikandan ne egpangeles.
5 Purisu egmekeiling e te me leew ne asnu diye te disirtu
ka egkengaayu-ayu ne egmamitew te egkakeen para te me anak dan.
6 Egmanggaani sikandan diye te me kamet ne kene ne kandan,
wey egmakilalew te me behas te paras diye te parasan te maddeet ne me etew.
7 Egmangibat sikandan te intiru ne marusilem ne egkengaaghagsilan
su ware me uulesenen,
wey ware pad iya man‑e eleg ne kumbale dan.
8 Egkengeuranan sikandan diye te me bubungan,
wey diye naan de ubag egmangelung te me pahang
su ware man e me ugpaanan dan.
9 “Egpanguen te me makasesale ka dereisek pad ne me anak te balu ne malitan,
wey ka me anak te egkengaayu-ayu isip gerentiya te utang.
10 Egmangip-hipanew ka egkengaayu-ayu ne egmalawas tenged su ware me kumbale dan;
egmanggut-gutasan de due sikandan
ka egmababeen te nenahaani ne trigu.
11 Egmakekelesen sikandan te me ulibu eyew egpekeyimu te mentika,
wey behas te paras eyew egpekeyimu te binu,
piru mig-antus sikandan te pegkammareyi.
12 Ne egkarineg diye te siyudad ka pegdeg-uy te egkammatey e,
wey ka pegpangananey te nenapalian,
piru minsan pad dutu, warad en iya miglinga-linga ka Manama.
13 “Due me etew ne egkeepes te malayag;
ware sikandan mig-ikul te malayag,
wey nasi sikandan migsuwey.
14 Te kene pad egsile ka aldew, eg-enew e ka talaggimatey,
eyew te pegpangimatey te egkengaayu-ayu wey te egkengaware-ware,
wey te marusilem, egpanakew man‑e sikandin.
15 Ne ka talagpanlibug degma,
egtetahad te egkasagkup,
wey egbunbunan din ka ulaula rin, eyew kene sikandin egkeilaan.
16 Te timpu te marusilem,
egpanlekat te alabat te me baley ka me takawen,
wey te maaldew, egmangeles sikandan,
wey ware sikandan nakanengneng ke mamenu ka malayag.
17 Egkengaaldek sikandan te layag te aldew,
piru ware liyas dan te delem.
18 “Migkahi kew te eg-anlasen te baggiyu ka me makasesale,
wey egdilusen te Manama ka tane dan
purisu kenad sikandan egpangendiye te parasan dan.
19 Ne iling te isnu ne egkatunew te keinit te gulabung,
egkaawe degma puun te tane ka me makasesale.
20 Ne warad e egpakasuman-suman kandan minsan ka iney ran.
Ne egkekeenen e sikandan te me liwati,
wey egkareetan iya sikandan iling te kayu ne impeled.
21 Egkeyitabu iya seini su indeeg-deeg dan ma ka me balu,
wey ware dan upiani ka me malitan ne kene egmakaanak.
22 Piru egguleen te Manama ka maddesen pinaahi te geem din.
Eggimuwen din sika wey egkammatey ka me makasesale.
23 Egkaayun ne egtuhutan te Manama ka me makasesale ne eg-ugpe ne ware karereetan,
piru eg-iipaten din sikandan te langun ne eggimuwen dan.
24 Egkabantug sikandan te malepet de ne timpu,
wey egkataman, egkaawe e iling te bulak ne egkengatahak
wey iling te tagdey te paley ne eggaaniyen.
25 Ke kene ne eleg ka ingkahi ku,
hentew naa ka egpakapamalehet ne mig-uubat a,
wey hentew ka egpakakahi ne seyyup ka ingkahi ku?”