26
Ka tabak ni Hub
1 Ne migtabak si Hub,
2 “Migsuman-suman ke buwa ne nakabulig ka keddi te egkaayu-ayu wey mahuye?
3 Migsuman-suman ke buwa ne nakatambag ka keddi te ware katagseb,
pinaahi te dakel ne katagseb nu?
4 Hendei migpuun sika se impanlalag nu?
Hentew ne panisingan ka migpanulu keykew ne iglalag sika?
5 Impangelkel te liyas ka me pamulingan te me minatey,
ne nangugpe diye te diralem te weyig ne diralem te tane.
6 Amana namayanpayan diye te Manama ka inged te me minatey,
wey ware egpakabunbun due puun te pegtengteng din.
7 Intekul te Manama ka langit diye te igkahibang ne balabahan
wey intahu din ka kalibutan ne ware neunturan diye te aw-awangan.
8 Imbugsung din ka uran te makepal ne gapun,
piru ware nawahey ka gapun minsan mabehat ka uran.
9 Imbunbunan din te makepal ne gapun ka migtimman ne bulan.* Te Hibruwanen: ka trunu rin.
10 Ne impegsuwey rin ka malayag wey marusilem
pinaahi te pegtahu te malibusen ne badlis diye te kulit te dahat.
11 Ke egbebentaanan te Manama te egdereet ka me sungkaleg te langit,
egpangelkelen seini te pegkaaldek iling te etew.
12 Ne pinaahi te geem din impapeeneng-eneng din ka dahat,
wey pinaahi te katagseb din, intalu rin ka salimbaweng ne si Rahab.
13 Ne pinaahi te peggeheyinawa rin,
migmaawang ka langit,
wey pinaahi te kampilan din,
inggimatayan din ka salimbaweng ne egduldulihis.
14 Piru deisek de iya sika ne baad te immangimu rin,
wey me lanawes de ka narineg ta puun kandin.
Ware egpakatirew te karesen te Manama.”