IGKEEP‑AT NE BAAD: Katamanan ne lalag ni Hub
29
(29:1–31:40)
Ka pegsuman-suman ni Hub te tapey ne peg-ugpe din
1 Ne migpabulus-bulus si Hub ka migkahi,
2 “Meupiya ubag perem ke eglibed pad ka peg-ugpe ku dengan
te imbantayan e pad te Manama;
3 layun a dumdumeyi nikandin
wey inteng-awan din ka dalan ne egbayaan ku
taheed te eggipanew a diye te marusilem.
4 Te seeye ne timpu, matubung e pad,
wey iyan ku alukuy ka Manama,
wey imbantayan din ka pamilya ku.
5 Indumdumaan e pad te Maresen ne Manama,
wey duma ku pad ka me anak ku.
6 Te seeye ne timpu,
amana ne dakel ka gatas te me baka wey me kambing ku,
wey ka ulibuwan ku diye te me batuwen, nakabehey te dakel ne mentika.
7 Ne emun ke eggendiya a te gumawan te lungsud
eyew egpinnuu degma duma te me igbuyag ne egmanliblibulung,
8 egpeilis ka me lukes-lukes ke egkakita ad e nikandan,
wey egmanasindeg ka me buyag te pegtahud keddi.
9 Ne egpeeneng-eneng ka me igbuyag ne eglalag,
10 minsan ka labew kandan ne talahuren.
11 “Ne egpakareyrey ka langun ne egpakakita keddi
wey egpakarineg te eglalahen ku,
12 su migbulig e ma te seeye se egkengaayu-ayu ne migpangananey,
wey te me ilu ne ware egpakabulig.
13 Indeyrey a te seeye se nabulihan ku ne egkengaayu-ayu ne egkammatey e,
wey migpanguleyi te kahale ka me balu ne nabulihan ku degma.
14 Inggimu ku layun ka matareng
wey ka eleg ne peggukum.
Egpekeiling seini te kumbale wey langkus ne layun ku igsaluub.
15 Neyimu a ne iling te mata te me butud
wey paa te me pungku.
16 Nekeiling a te amey te egkengaayu-ayu,
wey inlapihan ku ka me lapu diye te hukumanan.
17 Indereetan ku ka geem te egmandeeg-deeg,
wey impangabangan ku ka immandeeg-deeg dan.
18 “Ne egkahiyen ku ne egpakaangken a te malayat ne umul,
wey egpatey a ne malinawen due te seled te baley ku mismu.
19 Egpekeiling a dengan te kayu ne nekeuma ka me dalid diye te weyig,
wey layun egkaremmuhi ka me sugpang te intiru ne marusilem.
20 Ne layun egdeyrey keddi ka langun,
wey maagsik-agsik a layun.
21 Ne egpeeneng-eneng ka langun
wey egpammineg eg-ayad-ayad ke egpanambag a.
22 Ne emun ke egpekeimpus ad e ka eglalag,
kenad e egpakatimul eglalag ka me etew
su egkabenbennalan man e sikandan te langun ne eglalahen ku.
23 Egtetahad sikandan te eglalahen ku
iling te talagbasuk ne egkabantalan ka egtetahad te uran te timpu te pegpamula.
24 Ne emun ke eggimun-gimun a kandan,
hendue te kene sikandan egpakapalintutuu.
Ne amana egpakabehey kandan te kabagget ka peggimun-gimun ku.
25 Sikeddi ka migpangulu kandan
wey ka migpanulu kandan ke nekey ka eggimuwen;
sikeddi ka pangulu ran iling te sabeka ne Hari ne migmandu te me sundalu rin.
Sikeddi ka migliwang kandan te timpu ne miglungku sikandan.”