Ka baseen ni
HUWIL
Igpewun‑a
Ka seini ne baseen, nasulat te me hep‑at ne gatus (400) ne leg‑un wey ke me lalimma ne gatus (500) ne leg‑un naa te ware pad neetew si Kristu, te timpu ne iyan migmandu te duma ne me nasud ka me Hari te Pirsya. Ka migpangguhud te seini ne guhuren iyan si prupita Huwil ne anak ni Pituwil.
Nasulat ka seini ne baseen tenged su impakita te Manama ki Huwil ka meyitenged te pegpaney-paney te peggukum wey peglegpad te Manama te me nasud. Te pegkeyitabu kayi, nakita rin ka sabeka ne palinneu te pegginguma te aldew te Magbebaye ne Manama, ka timpu ne iyan peglegpad te Manama te seeye se migsupak te igkeupii rin ne meupiya. Impanengneng te prupita ka pegpangumew te Magbebaye ne Manama te keet-etawan eyew eg-inniyug sikandan te me sale dan. Impanengneng din man‑e ka saad te Magbebaye ne Manama ne igpalibed din ka meupiya ne peg-ugpe te keet-etawan din wey egpanalanginan din sikandan. Nasulat man‑e kayi te seini ne baseen ka saad te Magbebaye ne Manama ne egpeuyan sikandin te Panisingan din diye te langun ne keet-etawan din.
Ka nenasulat te seini ne baseen
Ka salerep ne iyan ka pegdalapak te me talangas 1:1–2:17
Ka saad te pegpalibed te meupiya ne peg-ugpe 2:18-27
Ka aldew te Magbebaye ne Manama 2:28–3:21
1
1 Seini ka igpepangguhud te Magbebaye ne Manama ki Huwil ne anak ni Pituwil:
Ka peglungku tenged te me talangas
2 Pammineha niyu seini, sikaniyu se me igbuyag
wey sikaniyu se langun ne nangugpe te Huda.
Ware de due iling kayi kasumpit ne neyitabu te seini ne timpu
wey dengan te duen pad ka me kabuybuyahan ta.
3 Ihuhud niyu seini te me anak niyu,
eyew igpangguhud dan degma seini te me anak dan,
wey igguhud dan e degma seini te seup ne kabuhalan dan.
4 Migpasubsubaley migdalapak ka hep‑at ne punduk te me talangas ne nangeen te me pinamula;
ka nasame te an-anayan ne punduk, ingkeen e degma te nakasinundul,
ka nasame te nakasinundul, indeesan e degma te igkatelu ne punduk,
ka nasame te igkatelu ne punduk, intebas e degma te namewuriyan ne punduk te me talangas.
5 Himata kew e se me talewubug wey sinehew kew;
pandalawit kew se egmangiinum te egpekewubug su nareetan e ka behas te paras ne eggimuwen ne iyam ne binu.
6 ✡ Imp 9:8.Su migdalapak ka migguli-huli ne talangas
ne egpekeiling te me mannekal ne sundalu ne eglusud te tane ta;
maggalang ka me ngipen dan, iling te ngipen wey panayew te liyun.
7 Indereetan dan ka me parasan ta wey ka me kayu ta ne iggira.
Impangetket dan seini wey impanluwitan,
sikan naa ka migmaangkag e ka me sugpang te iggira wey paras.
8 Paninehew kew iling te mengebay ne migsaluub te saku* Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale. ne miglungku
tenged te pegpatey te lukes ne egpangasawa iya perem kandin.
9 Warad e trigu wey binu ne innalad diye te timplu te Magbebaye ne Manama,
sikan naa ka miglungku ka me talagpanubad ne suluhuanen te Magbebaye ne Manama.
10 Nareetan ka me kamet,
wey mekeyid‑u-hid‑u e ka tane iling te egkabaybayaran ne etew ne miglungku,
su nareetan man e ka me trigu wey nahangu e ka me paras, wey naamin e ka mentika te ulibu.
11 Kalaggew kew ka me talagbasukan,
paninehew kew ka me talagtanggu te parasan,
su nareetan e ka langun ne pinamula lagkes ka trigu, wey ka sibada.
12 Nenaggangu e ka me paras wey nenallanes e ka me iggira,
ka me granada, ka me palmira, ka me mansanas, wey ka langun ne kayu diye te kamet.
Ne malehet iya ne warad kahalaan te me etew.
13 Saluub kew te saku wey pandalawit kew
se egmanubad diye te altar ne eg-unturan te egtutungen.
Pangendiye kew te timplu wey lungku kew te intiru ne marusilem,
su warad e trigu wey binu ne igpakahalad diye te Manama niyu.
14 Palibulunga niyu ka keet-etawan wey puasa kew langun.
Ne palibulunga niyu degma diye te timplu te Magbebaye ne Manama
ka me pangulu wey ka langun ne mahinged te Huda.
Ne pangananey kew te Magbebaye ne Manama niyu.
15 ✡ Isa 13:6.Mahaan e egginguma ka aldew te Magbebaye,
ka aldew ne igpaneem-neem e te Maresen ne Manama ka karereetan.
Makaliyas-liyas amana ka sika ne aldew!
16 Mata-mata te re iya te pegkaawe te egkakeen ta.
Ne warad kahale diye te timplu te Manama ta.
17 Nangepis e ka me beni ne impamula diye te mammara ne tane.
Nagguhus e ka me lelapeng,
wey nenaddeetan e ka me tinesanan te egkahaani tenged su warad e nabaluy ka me trigu.
18 Masingangang ka me baka te kalaggew!
Nallaggew ka punduk dan
su ware man‑e egpanabtaban dan.
Mig-antus degma ka me punduk te me karniru.
19 Egpangananey a keykew, Magbebaye ne Manama,
su nenasilaban e ka me panabtaban ne nahangu diye te inged ne ware mig-ugpe,
wey migkanlabkanlab ka langun ne kayu diye te kamet.
20 Egpepangabang keykew minsan ka me mahintalunan ne me mananap,
su neetiyan e ka me beuhan
wey newugmas e ka me panabtaban diye te katalunan.
*1:8 Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale.