1 Piru insupak te me kabuhalan ni Israil ka insuhu kandan ne kene egkuwa te minsan nekey ne inhalad wey impanubad para te Magbebaye ne Manama. Ne due etew ne egngaranan ki Akan ne migpanguwa te me kasangkapan ne kene igpakuwa kandan, sikan naa ka mig-ebel-ebel ka langet te Magbebaye ne Manama te me kabuhalan ni Israil. Si Akan anak ni Karmi. Ne si Karmi anak ni Sabdi, wey si Sabdi anak ni Sira. Ne sakup sikandan te me kabuhalan ni Huda.

2 Ne puun te Hiriku, migpeuyan si Huswi te me etew ne egsisilib diye te Ay, ka siyudad ne diye te kewun‑aan te Bitil diye dapit te igsile ne marani te Bit-Abin. Purisu nangendiye ka me etew eyew egsisilib diye te Ay. 3 Te peglibed dan e, ingkahiyan dan si Huswi, “Kene egkaayun ne eglusud ki langun diye te Ay su kene ne masulug ka me mahinged diye. Suhu ke re te daruwa ne libu (2,000) wey ke tatelu ne libu (3,000) naa ne sundalu.” 4 Purisu, me tatelu ne libu (3,000) re ne me kabuhalan ni Israil ka miglusud te Ay, piru nenakapallahuy sikandan puun te me mahinged diye. 5 Impanalukunan sikandan ligkat te gumawan te siyudad peendiye te Sibarim, wey napatayan sikandan te tatelu ne pulu wey hen‑em (36) te pegtupang dan diye te me bubungan. Sikan naa ka naawaan ka me kabuhalan ni Israil te kabulut wey nenalliyasan sikandan.

6 Tenged te peglungku ni Huswi wey te me igdatu te me kabuhalan ni Israil, inggisi dan ka me kumbale dan, imbukbukan dan te me alinepung ka me ulu ran, wey miglangkeb sikandan diye te tangkaan te Tahuanan te Kasabutan te Magbebaye ne Manama taman te marusilem. 7 Ne migkahi si Huswi, “He Magbebaye ne Manama, mania te impalapas key pad iya nikeykew te Hurdan ke igpatalu key re nikeykew te me Amurihanen? Meupiya pad perem ke diye key red kuntee te talipag te Hurdan. 8 He Magbebaye ne Manama, nekey naan e ka igkalalag ku te nakapallahuy ka me kabuhalan ni Israil puun te me kuntere dan? 9 Emun ke egkatahaan seini te me Kanaanen wey duma pad ne me mahinged kayi, eglingutan key e nikandan wey egpangimatayan key e. Purisu, nekey‑a ka eggimuwen ney eyew kene egpakakahi ka me etew te kene ka ne mabantug ne Manama?”

10 Ne ingkahiyan te Magbebaye ne Manama si Huswi, “Sasindeg ka! Mania te miglangkeb ka? 11 Nakasale ka me kabuhalan ni Israil; insupak dan ka kasabutan ku kandan. Impanguwa ran ka me kasangkapan ne nakahalad e wey nakapanubad e keddi. Intakew ran seini wey mig-uubat pad man‑e sikandan ne ware migpanakew, wey insewug dan e itahu te me kasangkapan dan. 12 Sika ka egpuunan ne ware natalu te me kabuhalan ni Israil ka me kuntere dan. Ne nakapallahuy sikandan su minsan sikandan, inteil e iya te Manama ne egkapatey. Kena ad egduma kaniyu angin e ke egdereetan niyu ka me kasangkapan ne ware ku ipakuwa kaniyu. 13 Kahii nu ka me etew te keilangan ne egkamatulus sikandan kaaselem su egkahi a se Magbebaye ne Manama, ‘Sikaniyu se me kabuhalan ni Israil, due inggeles niyu ne me kasangkapan ne nahalad e wey nakapanubad e keddi. Kene kew egpakasukul te me kuntere niyu ke kene niyu eg-aween due te kaniyu ka sika ne me kasangkapan. 14 Sikan naa, parani kew kaaselem keddi se tagse tribu. Ka egkaalam ku ne tribu ne nakasale, egparani keddi ka tagse pamilya. Ne ka egkaalam ku ne pamilya ne nakasale, egparani keddi ka tagse sabeka ne sakup te sika ne pamilya. 15 Ka etew ne egkasapenan ku ne migkuwa te me kasangkapan ne natahahe e ne egdereetan, egtutungen sikandin duma te pamilya rin wey te langun ne karatuan din. Su insupak din ka kasabutan ku, wey nekeyimu sikandin te mekeyilew-hilew diye te Israil.’ ”

16 Te maselem-selem pad, impeparani e ni Huswi diye te Magbebaye ne Manama ka tagse tribu te Israil. Ne iyan naalam ka me kabuhalan ni Huda. 17 Ne impeparani rin ka me sakup te me kabuhalan ni Huda wey iyan din naalam ka kabuhalan ni Sira. Ne impeparani rin ka kabuhalan ni Sira wey iyan din naalam ka pamilya ni Sabdi. 18 Ne impeparani rin ka pamilya ni Sabdi wey iyan naalam si Akan. Si Akan, anak ni Karmi. Ne si Karmi, anak ni Sabdi wey si Sabdi, anak ni Sira. Sakup sikandan te me kabuhalan ni Huda. 19 Ne ingkahiyan ni Huswi si Akan, “Tatu, inangen nu ke nekey ka malehet kayi te tangkaan te Magbebaye, ka Manama te Israil, wey ipangguhud nu ka sale nu. Inangen nu kuntee keddi ke nekey ka inggimu nu. Kene nu iheeles keddi.”

20 Ne migtabak si Akan, “Malehet iya ne nakasala a te Magbebaye ne Manama te Israil. Ne seini ka inggimu ku: 21 nakaahew ki te me kasangkapan, wey due nakita ku ne mateles ne kumbale ne egpuun te Babilunya, pelata ne me daruwa ne kilu, wey sabeka ne tempug ne bulawan ne ware de migginguma te liware te kilu se kabehat. Amana a neimma te seeye ne me kasangkapan, purisu ingkuwa ku. Ne inlebeng ku seeye diye te seled te balungbalung ku, wey impariralem ku ka pelata.”

22 Purisu, impeendiyaan ni Huswi te pila-pila ne etew ka balungbalung ni Akan. Ne nakita ran diye ka me kasangkapan ne inlebeng, wey nakariralem iya ka pelata. 23 Ingkuwa ran seini wey in-uyan dan diye ki Huswi wey te me kabuhalan ni Israil, wey impanahu dan seini diye te tangkaan te Magbebaye ne Manama.

24 Ne in-uyan ni Huswi wey te langun ne me kabuhalan ni Israil si Akan diye te bangalug ne egngaranan te Akur.* Ka “Akur” iyan igpasabut ka “samuk”. Ka ngaran ne “samuk” ingngaran te bangalug tenged te sale ni Akan ne iyan egpuunan ne nasamuk ka kabuhalan ni Israil. In-lagkes dan uyana ka pelata, kumbale, sabeka ne tempug ne bulawan, me anak din, me baka rin, me asnu rin, me karniru rin, balungbalung din, wey ka langun ne karatuan din. 25 Te pegginguma ran diye, ingkahiyan e ni Huswi si Akan, “Sikeykew ka egpuunan ne egkareetan key, purisu, eglegparan ka kuntee te Magbebaye ne Manama.” Ne imbebatu e te langun ne kabuhalan ni Israil si Akan wey ka pamilya rin taman te nammatey sikandan. Insilaban dan ka lawa ran wey ka me karatuan dan. 26 Pegkeimpus, intambuan dan si Akan te masulug ne me batu. Ne minsan kuntee diye ded ka seeye ne me batu. Ne ingngaranan ka seeye ne inged te bangalug ne egngaranan te Akur.

Ne naawe e ka egmangebel-ebel ne langet te Magbebaye ne Manama.