1 “Ke due egpanubad te baka diye te Magbebaye ne Manama eyew igpanubad para te keupianan, keilangan ne ware seini nabalbalangi, turu ma wey se beyan. 2 Igdagket din ka palad din diye te ulu te baka wey eggilangen din seini diye te gumawan te Balungbalung ne Temuwanan. Ne ka langesa te baka, iglingut igsawig te me talagpanubad ne me kabuhalan ni Aarun diye te me kakiliran te altar ne eg-unturan te egtutungen. 3 Te sika ne igpanubad, egkuwa ka talagpanubad te me baad ne egtutungen din para te Magbebaye, ne iyan ka langun ne tabe diye te getek, 4 ka me iihian wey ka nandeket ne me tabe kayi, wey ka atey ne indeketan te tabe. 5 Ne egtutungen sika te me talagpanubad ne me kabuhalan ni Aarun, diye te altar ne eg-unturan te igpanubad, duma te igmanubad ne egtutungen, wey meemut ka lansi due diye te Magbebaye ne Manama.

6 “Ke karniru wey ke kambing naa ka igpanubad te etew diye te Magbebaye eyew igpanubad para te keupianan, keilangan ne ware seini nabalbalangi, lukesan ma wey se beyan. 7 Ke nati te karniru ka igpanubad din, eg-uyanen din seini diye te Magbebaye. 8 Igdagket din ka palad din diye te ulu te karniru wey eggilangen din seini diye te gumawan te Balungbalung ne Temuwanan. Ne ka langesa te lukesan ne karniru, iglingut igsawig te me talagpanubad ne me kabuhalan ni Aarun diye te me kakiliran te altar ne eg-unturan te egtutungen. 9 Ne egkuen din ka tabe, ka tabe ne diye te ikug ne impekpek te egtempug, wey ka langun ne tabe ne diye te getek wey ka diye te bituka, 10 ka me iihian wey ka nandeket ne me tabe kayi, wey ka atey ne indeketan te tabe. 11 Egtutungen seeye langun te talagpanubad diye te altar eyew igpanubad diye te Magbebaye ne Manama.* Te Hibruwanen: igpanubad ne egtutungen ne egkakeen diye te Magbebaye ne Manama.

12 “Ke kambing ka igpanubad din diye te tangkaan te Magbebaye, 13 igdagket din ka palad din diye te ulu te kambing wey eggilangen din seini diye te gumawan te Balungbalung ne Temuwanan. Ne ka langesa due, iglingut igsawig te me talagpanubad ne kabuhalan ni Aarun diye te altar ne eg-unturan te egtutungen. 14 Ne puun te igpanubad, egkuwa ka talagpanubad te egtutungen ne igpanubad para te Magbebaye ne iyan ka tabe diye te bituka, 15 ka me iihian wey ka nandeket ne me tabe kayi, wey ka atey ne indeketan te tabe. 16 Egtutungen seeye langun te talagpanubad diye te altar eyew igpanubad diye te Magbebaye ne Manama.† Te Hibruwanen: igpanubad ne egtutungen ne egkakeen diye te Magbebaye ne Manama. Ne ka langun ne tabe, iyan kamuney ka Magbebaye. 17 Eggimuwen niyu seini ne tulumanen te ware egtamanan lagkes ka langun ne egpakasinundul pad ne kabuhalan niyu, minsan hendei kew eg-ugpe ne kene kew keen te tabe wey ke langesa naa.”