1  ✡ Num 5:5-8.Ne ingkahiyan e man‑e te Magbebaye ne Manama si Muwisis, 2 “Ke due etew ne nakasupak te Magbebaye puun su inlimbungan din ka duma rin ne migtaleu kandin te kasangkapan wey ke impanakawan din naa wey ke inlupihan din naa, 3 wey ke nakakita naa sikandin te kasangkapan ne nasi din iheles, wey ke migpahunlibet naa te ware sikandin nekeyimu te minsan nekey ne sale, 4 wey emun ke nakasale iya sikandin, keilangan ne ig-uli din ka intakew rin wey ke sika se nakuwa rin te pegpanlupig din wey ke inggeles din naa ka impatahu kandin wey ka nalaag ne kasangkapan ne nakita rin, 5 wey ka minsan nekey ne inggeles din wey impahunlibetan ne ware diye te kandin. Keilangan ne ig-uli din seini diye te kamuney ne ware naawei minsan deisek wey egtimulan din pad te daruwa ne pulu (20) ne pursintu ka kentiddad dutu. Ig-uli din seini te sasangan e sikandin ne egpanubad eyew igbayad te sale din. 6 Ne eg-uyan sikandin diye te talagpanubad te sabeka ne lukesan ne karniru ne ware nabalbalangi eyew igbayad te sale din. Ne keilangan ne ka kentiddad te karniru igpeiling te kentiddad te pelata ne intimbang diye te timbangan te me talagpanubad. 7 Ne egpalangesa ka talagpanubad diye te tangkaan te Magbebaye ne Manama eyew iglinis te sale din, wey egkapasaylu e sikandin tenged te sale din.”

8 Ne ingkahiyan te Magbebaye si Muwisis, 9 “Kahii nu si Aarun wey ka me anak din te seini ka me tulumanen meyitenged te egtutungen ne igpanubad. Ka egtutungen ne igpanubad kene eg-aw-aween diye te altar taman te egkapawaan wey keilangan ne kene egkeebukan ka hapuy diye te altar. 10 Ne igsaluub te talagpanubad ka kumbale ne linu wey ka malepet ne salual ne igbunbun te lebut, wey egkuen din ka naabu e ne intutung ne impanubad wey igtahu din seini diye te lenged te altar. 11 Emun ke egkeimpusan din e ka eggimuwen din, egliwanan din e ka ingkukumbale din wey eg-uyanen din e ka abu diye te lihawangan te kampu ne in-isip ne malinis. 12 Keilangan ne layun egkalegleg ka hapuy diye te altar wey kene egkeebukan. Ne tagse maselem eg-undulan te talagpanubad wey eg-ay-ayaran din te egtutung ka egtutungen ne igpanubad diye te hapuy. Ne iglagkes din te egtutung ka tabe te ayam ne igpanubad para te keupianan. 13 Keilangan ne layun egkalegleg ka hapuy diye te altar wey kene egkeebukan.”

14 “Seini ka me tulumanen meyitenged te egkakeen ne ighalad: Ka me talagpanubad ne kabuhalan ni Aarun ka eghalad te halad ne egketuen diye te Magbebaye ne Manama diye te tangkaan te altar. 15 Ne eggamak ka talagpanubad te inhalad ne harina ne amana ne meupiya ne insewuhan te mentika, wey egtutungen din sika diye te altar lagkes ka langun ne meemut ne insinsu ne insewug kayi. Egtutungen sika diye te altar isip pegsuman-suman te Magbebaye, wey meemut ka lansi due diye te Magbebaye. 16 Ka egkasame ne harina eggilutuen ne ware patulin wey egkeenen enni Aarun wey te me talagpanubad ne kabuhalan din. Ne keilangan ne diye dan de sika egkeena te lama te Balungbalung ne Temuwanan ne in-isip ne matulus ne inged. 17 Eggilutuen sika ne ware patulin. Imbehey sika kandan te Magbebaye su sika iya ka baad dan puun te egtutungen ne inhalad diye te Magbebaye. Amana ne matulus seini iling te halad te peg-awe te sale wey te halad eyew igbayad te sale. 18 Ne egpakakeen due ka langun ne kabuhalan ni Aarun lagkes ka langun ne egpakasinundul pad ne kabuhalan su sika iya ka baad dan puun te halad ne egtutungen ne ighalad diye te Magbebaye. Ne minsan hentew ne eggen-gen due keilangan ne matulus.”* Ka duma ne me sinulat iling kayi ka pegsabut, “Ne minsan hentew ne eggen-gen due, egkareetan tenged su matulus ma seini.”

19 Ne ingkahiyan te Magbebaye ne Manama si Muwisis, 20 “Kahii nu ka me kabuhalan ni Aarun te seini ka ighalad dan keddi te Magbebaye ke egkeitisan e sikandan te lana eyew egkeyimu ne me talagpanubad: Sabeka ne kilu te harina ne amana ne meupiya. Ighalad dan sika isip halad ne egkakeen ne egpuun te egketuen ne me pinamula. Ne egbaaren dan ka harina te eghalad te maselem wey marusilem. 21 Egpirituwen sika diye te kale wey keilangan ne eg-ugseb ka mentika diye te harina. Emun egkalutu e, egteptepiken dan sika iling te halad ne egkakeen ne egpuun te egketuen ne me pinamula, wey meemut ka lansi due diye te Magbebaye. 22 Ighalad langun sika ne egtutungen. Ne keilangan ne iyan eghalad due diye te Magbebaye ka tagse talagpanubad ne kabuhalan ni Aarun ne in-itisan te lana eyew egsubal kandin te Labew ne Talagpanubad. Balaud sika ne ware egtamanan. 23 Egtutungen ka langun ne egkakeen ne egpuun te egketuen ne me pinamula ne ighalad te talagpanubad—kene sika egkeenen.”

24 Ne ingkahiyan te Magbebaye ne Manama si Muwisis, 25 “Kahii nu si Aarun wey ka me kabuhalan din ne seini ka me tulumanen meyitenged te igpalangesa ne ig-awe te sale. Ka igpalangesa ne ig-awe te sale keilangan ne eggilangen diye te tangkaan te Magbebaye diye te gilanganan te egtutungen ne igpanubad. Ka igpalangesa ne ig-awe te sale amana ne matulus. 26 Ka nasame te impanubad keilangan ne egkeenen te talagpanubad ne iyan migpanubad due. Piru diye din de egkeena te lama te Balungbalung ne Temuwanan, wey in-isip ne matulus. 27 Ka minsan hentew ne egsamsam te impanubad e, keilangan ne matulus. Ke nabesikan te langesa te impanubad ka malayat ne kumbale, keilangan ne egpi‑pian sika diye te lama te Balungbalung ne Temuwanan, wey in-isip ne matulus. 28 Ne emun ke kuren ne tane ka inggilutuan te impanubad, keilangan ne egpeseen. Piru ke kuren ne inggimu puun te burunsi, keilangan ne eg-unasan wey eglu‑luan. 29 Egkaayun ne egkeen te ngalap ka langun ne kabuhalan ni Aarun ne me lukes ne talagpanubad. Amana ne matulus seini. 30 Piru kene egkaayun ne egkeenen ka ngalap te impalangesa ke in-uyan e ka langesa due diye te matulus ne sinabeng te Balungbalung eyew ig-awe te sale te etew; egtutungen iya sika wey kene egkeenen.”