1 Ne migkahiyan te Magbebaye ne Manama si Muwisis wey si Aarun, 2 “Kahii niyu ka me kabuhalan ni Israil: emun ke due eglihawang diye te lebut* Ka igpasabut te “lebut” iyan se “kuwa te lukes”. te lukes tenged te dalu, sika se eglihawang, eg-isipen ne malindit. 3 Ne seini ka tulumanen meyitenged te etew ne due eglihawang diye te lebut din, minsan eglihawang wey se kene, eg-isipen ded sikandin ne malindit. 4 Ka minsan nekey ne egkeyibatan wey ke egkapinnuuwan din naa, eg-isipen degma ne malindit. 5 Ne minsan hentew ne egpakasamsam te inggibatan din, keilangan ne egpi‑pian din ka insaluub din wey egpamanihus sikandin. Eg-isipen sikandin ne malindit taman te egkasagkup. 6 Ka egpakapinnuu te impinnuuwan din, keilangan ne egpi‑pi te insaluub din wey egpamanihus. Eg-isipen sikandin ne malindit taman te egkasagkup. 7 Ne ka egpakasamsam te etew ne due eglihawang diye te lebut, keilangan ne egpi‑pi te insaluub din wey egpamanihus. Eg-isipen sikandin ne malindit taman te egkasagkup. 8 Ka minsan hentew ne egkeileban te etew ne due eglihawang diye te lebut, keilangan ne egpi‑pi te insaluub din wey egpamanihus. Eg-isipen sikandin ne malindit taman te egkasagkup. 9 Ne ka minsan nekey ne sakang ne egkeunturan din, eg-isipen ne malindit. 10 Ka minsan hentew ne egpakasamsam te napinnuuwan te etew ne due eglihawang diye te lebut wey ka eg-uyan te seeye ne kasangkapan, eg-isipen degma ne malindit taman te egkasagkup. Ne keilangan egpi‑pian din ka insaluub din wey egpamanihus sikandin. Eg-isipen sikandin ne malindit taman te egkasagkup. 11 Ne emun ke ware nakapanlu‑lu te belad din ka etew ne due eglihawang diye te lebut wey nakahen-gen te lein ne etew, keilangan ne egpi‑pian te etew ne nahen-genan ka insaluub din wey egpamanihus. Eg-isipen sikandin ne malindit taman te egkasagkup. 12 Ne ka kuren ne tane ne egkahen-genan te etew ne due eglihawang diye te lebut, keilangan ne egpeseen, wey ka tahuanan ne kayu ne nahen-genan din, keilangan ne eglu‑luan.

13 “Ke warad e eglihawang puun te lebut din, egtetahad sikandin te pitu ne aldew human pad sikandin egmalinis. Ne egpi‑pian din ka insaluub din wey egpamanihus sikandin, wey egmalinis e sikandin. 14 Te igkawalu e ne aldew, egkuwa sikandin te daruwa ne tukmu wey ke daruwa naa ne selepati. Ne eggendiye sikandin te tangkaan te Magbebaye ne Manama diye te gumawan te Balungbalung ne Temuwanan, wey igbehey rin seini diye te talagpanubad. 15 Ne igpanubad seini te talagpanubad—ka sabeka, igpalangesa eyew ig-awe te sale, wey ka sabeka, igpanubad ne egtutungen. Ne egpalangesaan te talagpanubad ka sika ne etew diye te tangkaan te Magbebaye eyew te peglinis te sale din tenged te miglihawang te lebut din.

16 “Ke due lukes ne eglihawangan te muntus, keilangan ne egpamanihus sikandin piru eg-isipen ded sikandin ne malindit taman te egkasagkup. 17 Ka me manggad wey ke kasangkapan naa ne laplap te ayam ne natihisan te muntus, keilangan ne egpi‑pian. Eg-isipen sika ne malindit taman te egkasagkup. 18 Ke eggilabet ka lukes te malitan, keilangan ne egpamanihus sikandan se daruwa. Ne eg-isipen ded sikandan ne malindit taman te egkasagkup.

19 “Ke eglangeseen ka malitan, eg-isipen sikandin ne malindit taman te pitu ne aldew. Ne ka egsamsam kandin eg-isipen ne malindit taman te egkasagkup. 20 Ne ka minsan nekey ne egkeyibatan wey egkapinnuuwan din, eg-isipen degma ne malindit. 21-23 Ka minsan hentew ne egsamsam te neyibatan din wey ke minsan nekey ne kasangkapan ne napinnuuwan din, keilangan ne egpami‑pi te insaluub din wey egpamanihus. Eg-isipen sikandin ne malindit taman te egkasagkup. 24 Ke eggilabet ka lukes te eglangeseen, eg-isipen ka lukes ne malindit te pitu ne aldew, wey eg-isipen ne malindit degma ka langun ne neyibatan din.

25 “Ke egsubla te pila ne aldew ne eglangeseen ka malitan, wey ke eglangeseen de due sikandin minsan kene perem ne timpu ne eglangeseen sikandin, eg-isipen sikandin ne malindit iling te tagse bulan ne eglangeseen sikandin. Eg-isipen sikandin ne malindit taman te duen pad langesa rin. 26 Ne ka minsan nekey ne egkeyibatan din wey ke egkapinnuuwan din naa te sasangan pad sikandin ne eglangeseen, eg-isipen degma ne malindit iling te tagse bulan ne eglangeseen sikandin. 27 Ka egpakasamsam te seeye ne me kasangkapan, eg-isipen ne malindit degma wey keilangan ne egpami‑pi sikandin te insaluub din wey egpamanihus. Eg-isipen sikandin ne malindit taman te egkasagkup. 28 Ke kenad sikandin eglangeseen, egtetahad pad sikandin te pitu ne aldew human pad sikandin egmalinis. 29 Te igkawalu e ne aldew, eg-uyan sikandin te daruwa ne tukmu wey ke selepati naa wey eg-uyanen din seini diye te talagpanubad, diye te gumawan te Balungbalung ne Temuwanan. 30 Igpanubad seini te talagpanubad—ka sabeka, igpalangesa eyew ig-awe te sale, wey ka sabeka, igpanubad ne egtutungen. Ne egpalangesa ka talagpanubad eyew iglinis te sale din diye te tangkaan te Magbebaye ne Manama tenged su eglangeseen sikandin.”

31 Ne impepanpanayan te Magbebaye ki Muwisis wey ki Aarun ka me kabuhalan ni Israil meyitenged te egpakamalindit kandan eyew kene sikandan egkapatey ke egseled te Balungbalung ne Temuwanan ne diye te taliware te kampu ran.

32-33 Sika ka tulumanen meyitenged te etew ne in-isip ne malindit tenged su eglihawangan sikandin te muntus wey ke duen naa eglihawang diye te lebut din, wey meyitenged te malitan ne eglangeseen, wey te lukes ne eggilabet te malitan ne in-isip ne malindit.