Ka baseen ni
Nihimiyas
Igpewun‑a
Si Nihimiyas suluhuanen te Hari ne si Artasirsis diye te siyudad te Susa. Taheed te diye sikandin, nakarawat sikandin te guhuren meyitenged te me Israilita ne nekewun‑a nekeuli ne mareet se peg-ugpe. Nakasasindeg e ka timplu piru ware pad naay-ayari ka matikang wey makepal ne alad te siyudad, sikan naa ka ware egpakaatang te me kuntere te me Israilita ne nakalingut kandan.
Tenged dutu, migbuyu si Nihimiyas te pegtuhut te Hari ne eggendiye te Hirusalim eyew egbalew-balew egpasasindeg te me matikang wey makepal ne alad kayi.
Egkabasa ta man‑e te seini ne libru ke immenu te Manama te pegbulig ki Nihimiyas te pegbalew-balew pegsasindeg te matikang wey makepal ne alad te siyudad taliware te pegbalabag te me kuntere dan ne nakalingut kandan.
Ka nenasulat te seini ne baseen
Ka peg-uli ni Nihimiyas diye te Hirusalim 1:1–2:20
Ka pegbalew-balew te matikang wey makepal ne alad te Hirusalim 3:1–7:73
Ka pegbasa te balaud wey ka pegbalew-balew te kasabutan 8:1–10:39
Ka duma ne me himu ni Nihimiyas 11:1–13:31
1
1 Seini ka guhuren ni Nihimiyas ne anak ni Hakaliyas.
Ka peg-ampu ni Nihimiyas para te Hirusalim
Te bulan te Kislib,* Me elat-elat seini te Nubimbri peendiye te me elat-elat te Disimbri. diya a te Susa, ka iney ne siyudad. Te seeye ne timpu, migdaruwe e ne pulu (20) ne leg‑un ne mighari si Artasirsis. 2 Ne imbayaan a ni Hanani ne sabeka te me suled ku, wey due me matig-Huda ne migduma kandin. Ne mig-insaan ku sikandan meyitenged te me Hudiyu ne nakalibed ded† Ka nenekeuli diye te Hirusalim, kene ne langun ne naddakep. ka naddakep wey in-uyan diye te Babilunya, wey ka meyitenged te Hirusalim. 3 Ne migtabak sikandan, “Subla ne nabaybayaran seeye se nekeuli‡ Ka nenekeuli diye te Hirusalim, kene ne langun ne naddakep. ne nenarakep wey neuyan, wey diyad te prubinsya te Huda, wey impeyilawan sikandan te me lapu ne nangugpe diye te marani ran. Nenaddeetan pad ka me batu ne alad te Hirusalim ne matikang wey makepal, wey nasilaban ka me gumawan kayi.”
4 Te narineg ku seini, duen e re se nakapinnuu ne nakasinehew. Ne miglungku a, migpuasa, wey mig-ampu te Manama diye te langit te pila ne aldew. 5 Ne migkahi a, “He Magbebaye ne Manama te langit, maresen ka wey amana egtahuren§ Te Hibruwanen: igkaaldek. ne Manama. Intuman nu ka me kasabutan nu wey impapitew nu te geyinawa nu ne kene egkabalbalawan seeye se miggeyinawa keykew wey migtuman te me suhu nu. 6 Tengtengi a nikeykew wey pammineha nu ka peg-ampu ku te suluhuanen nu te aldew wey marusilem para te me suluhuanen nu ne iyan ka keet-etawan te Israil. Igpangguhud ku keykew ka me sale ney, wey ka sale te me kaap-apuan ku. 7 Mareet amana ka inggimu ney diye te keykew. Ware ney tumana ka me balaud nu, tulumanen, wey me suhu nu ne impabehey nu kanami te suluhuanen nu ne si Muwisis. 8 ✡ Lib 26:33.Tantanuri nu ubag ka ingkahi nu te suluhuanen nu ne si Muwisis, ‘Ke kene kew egmatinumanen keddiey, egmegsuwayen ku sikaniyu diye te nalein-lein ne me nasud. 9 ✡ Diy 30:1-5.Piru ke eglibed kew keddiey wey egtumanen niyu ka me suhu ku, minsan pad ke egmekegsuwey kew diye te maddiyu ne inged, eg-uyanen ku red sikaniyu diye te inged ne in-alam ku eyew diye kew egsimba keddi.’* Te Hibruwanen: diye ku igpeugpe ka ngaran ku.
10 “Me suluhuanen nu sikandan wey me etew nu ne inluwas nu pinaahi te dakel ne geem wey kanekal† Te Hibruwanen: manekal ne belad. nu. 11 He Magbebaye ne Manama, pammineha nu ubag ka me peg-ampu ku te suluhuanen nu wey ka peg-ampu te me suluhuanen nu ne egkahale ne egtahud keykew. Ituhut nu perem ne eglampus a te seini ne aldew wey te ighangyu ku te Hari, wey igkeyid‑u a nikandin.”
Te seeye ne timpu, sikeddi ka impiyalan ne talagsendad te inumen te Hari.
*1:1 Me elat-elat seini te Nubimbri peendiye te me elat-elat te Disimbri.
†1:2 Ka nenekeuli diye te Hirusalim, kene ne langun ne naddakep.
‡1:3 Ka nenekeuli diye te Hirusalim, kene ne langun ne naddakep.
§1:5 Te Hibruwanen: igkaaldek.
*1:9 Te Hibruwanen: diye ku igpeugpe ka ngaran ku.
†1:10 Te Hibruwanen: manekal ne belad.