1 Te pegkarineg ni Sanbalat ne gubirnadur te Samarya te egbalbalawan ney ka batu ne alad, nalanglangetan sikandin. Ne indali-dian din ka me Hudiyu. 2 Ne migkahi sikandin diye te tangkaan te me duma rin wey te me sundalu te Samarya, “Nekey‑a ka eggimuwen te seini se luyeg ne me Hudiyu? Egbalbalawan dan ubag ka alad te Hirusalim? Migsuman-suman buwa sikandan ne egkeimpusan dan te senge-kaaldew re ka pegbalew-balew te alad wey egpanubaran dan e? Migsuman-suman buwa sikandan ne egkalimud dan pad ka nenasilaban wey nallupet e ne me batu?”

3 Ne migkahi degma si Tubiyas ne Amunihanen ne migpinnuu diye te dulug ni Sanbalat, “Malehet sika. Egkatempag ka inggimu ran ne alad ne batu minsan ke laku re ka egpamaneyik!”

4 Ne seeye naa ka mig-ampu a, “Pammineha key, Manama ney, su indali-dian key. Eglibed perem kandan ka indali-di dan kanami. Egkaamin perem ka karatuan dan wey egkarakep sikandan wey eg-uyanen diye te lein ne inged. 5 Kene nu pasayluwa sikandan te mareet ne hinimuwan dan, wey kene nu lingawi ka me sale dan, su inlemetan ke ma nikandan diye te me tangkaan te migtrabahu te alad.”

6 Sikan naa ka nabalbalawan ney ka batu ne alad taman te natenge e ka katikang kayi, su amana ma ne maahet-ahet ka me etew ne egtrabahu.

7 Piru te pegkarineg ni Sanbalat, wey ni Tubiyas, wey te me Arabihanen, me Amunihanen, me matig-Asdud ne nakapabulus ded ka peg-ayad-ayad te batu ne alad te Hirusalim, wey nasengsengan e ka me lungag, nalanglangetan sikandan. 8 Purisu migplanu sikandan langun ne eglusuran dan ka Hirusalim eyew egkasamuk. 9 Piru mig-ampu key te Manama ney wey due impabantey ney te maaldew wey te marusilem su eyew due egpakabantey kanami puun kandan.

10 Ne migkahi ka me matig-Huda, “Migmagguye e ka me trabahanti, wey miglatambu pad ka nallupet ne me batu ne egpangaween ney. Kene ney egkeimpusan te egbalew-balew ka batu ne alad.”

11 Ne migkahi degma ka me kuntere ney, “Egtigkawen ta sikandan te eglusud taheed te kene pad sikandan egpakanengneng wey egpakakita kanta, wey egpangimatayan ta sikandan eyew egkeengked e ka himu ran.” 12 Ne ka me Hudiyu ne nangugpe diye te marani ran, nangendiye te kanami wey layun key nikandan panpanayi ne eglusuran key iya te me kuntere ney.* Te Hibruwanen: Kasapulu puun te langun ne inged ne igbaliyung niyu kanami. 13 Purisu, due impabantey ku diye te liyu te kinariraleman te me baad ne nalunglungahan pad ne batu ne alad. Immegduma-ruma ku pabantaya te batu ne alad ka me taltalagduma wey naatul te me kampilan, me deldeg, wey me pane.

14 Ne inleuy ku ka me etew wey ingkahiyan ku ka me talahuren ne me etew, me upisyal, wey ka duma ne keet-etawan, “Kene kew kaaldek te me kuntere ta. Tantanuri niyu ne maresen wey kein-inuwan ka Magbebaye ne Manama. Pakig-ehet kew para due keupianan te me suled niyu ne me lukes, me anak niyu, me asawa niyu, wey te me ugpaan niyu.” 15 Te nahuhuran e ka me kuntere ney ne nanengnengan ney e ka implanu ran wey nakita ran ne indereetan te Manama ka implanu ran, inliberan ney e langun ka himu ney ne eg-ayad-ayad te batu ne alad.

16 Puun te seeye ne aldew, nabaad ka me etew te daruwa. Ka senge-baad migtrabahu wey ka senge-baad migbantey, wey due me deldeg dan, me kalasag, wey me pane wey migsaluub te putew ne dingding te kumeng. Ne migbehey ka me pangulu te igkabulig dan† Te Hibruwanen: Migsesasindeg ka me pangulu diye te egkeinniyuhan. te me matig-Huda ne migbalew-balew te alad. 17 Ne seeye se tigbaba te me batu, migtrabahu ne limang de ne belad ka inggamit wey ka limang ne belad, inggen-gen te panganiban. 18 Ne migsiniket te kampilan ka langun ne migtrabahu wey diye migsesasindeg te dulug ku ka etew ne talagparahing te trumpita. 19 Ne ingkahiyan ku ka me talahuren ne me etew, ka me upisyal, wey ka me etew, “Dakel wey maluag ka eg-alaren ta wey nekegdiyu-diyu ki. 20 Sikan naa ke egkarineg niyu ka dahing te trumpita, dagdahew kew hengkayi te keddi. Ne egpangabangan ki te Manama te pegpakig-ehet kandan.” 21 Purisu migpabulus key migtrabahu puun te egkaliwaswas taman te egkasagkup, wey imbantayan key te senge-baad te me etew ne due me deldeg.

22 Te seeye degma ne aldew, imbanasalan ku ka me etew ne ware mig-ugpe te Hirusalim wey ka me suluhuanen dan ne diye eggirehe te Hirusalim tagse marusilem, eyew egkabantayan ka siyudad wey eyew egpekeyimu e man‑e te maaldew. 23 Sikan naa ka ware key en iya migluluung te insaluub ney te marusilem—minsan sikeddi, ka me suled ku, ka me suluhuanen ku, wey ka me talagbantey ne migduma-ruma keddi. Ne masihen-gen key re due te me panganiban ney.‡ Te Hibruwanen: Eg-uy-uyanen ney re due ka panganiban ney ke egpanakeru key.