1 Nanengnengan ni Sanbalat, ni Tubiyas, wey ni Gisim ne Arabihanen wey te duma pad ne me kuntere ney, ne neimpusan ney e te egbalew-balew ka batu ne alad te siyudad wey warad e me lungag kayi, angin e te me lekeb ne ware pad nakatangen. 2 Seeye naa, impeumew a ni Sanbalat wey ni Gisim te miggenendue, “Egkeupian key ne egpakigkita keykew diye te sabeka ne bariyu te Kipirim te napu te Unu.” Piru ka malehet, mareet bes ka tuyu dan keddi. 3 Purisu migsuhu a degma te me etew eyew egkahi kandan, “Dakel ka himu ku, purisu kena a egpekeendue. Kene egkaayun ne egkeengkeran ku ka himu eyew re egpakigkita kaniyu.”

4 Keep‑at a nikandan panaheyi te sikan ded ne lalag, wey sikan ded degma ka intabak ku.

5 Te igkalimma ne pegginggat ni Sanbalat keddi, imparulungan a nikandin te suluhuanen din te ware pegketa ne sulat. 6 Seini ka tahu te seeye ne sulat, “Egkahuhud te minsan hendei ne nasud, minsan si Gisim migkahi ne migsuman-suman ke kun wey ka me Hudiyu ne egribildi, sikan naa ka imbalbalawan niyu ka batu ne alad. Kahi rin pa iya ne egkeupian ke kun ne egkeyimu ne Hari te me Hudiyu. 7 Ne mig-alam ke kun pad man‑e te me prupita ne egpataha due te Hirusalim ne sikeykew e ka Hari te Huda. Egkataman ne egkanengnengan iya seini te Hari, sikan naa ka keilangan ne eggendini ka su egpasabutey ki meyitenged kayi.”

8 Ne seini ka tabak ku kandin, “Ubat sika se ingkahi nu. Himu-himu nu re sika puun te suman-suman nu.”

9 Nakanengneng a ne ingginaaldek key re nikandan eyew egpakapeeneng-eneng key ka egtrabahu wey kene egkeimpusan ka himu ney. Piru mig-ampu a te Manama ne eglig‑enen e pad iya man‑e nikandin.

10 Sabeka ne aldew, miggendiya a te baley te kene egpakaleleug ne si Simaya ne anak ni Dilayas wey apu ni Mihitabil. Ne ingkahiyan a ni Simayas, “Eglibulung ki diye te timplu ne baley te Manama wey egpanlekeban ta ka me gumawan su eggengkayi kuntee te marusilem ka me kuntere nu eyew eggimatey keykew.”

11 Piru migtabak a, “Mania te egpallahuy a wey ke eggeles naa diye te timplu eyew kena a egpatey? Kena a egseled diye te timplu!”

12 Ne nasabut ku ne ware sikandin suhua te Manama, su imbayaran sikandin ni Sanbalat wey ni Tubiyas, sikan naa ka impanpanayan a nikandin. 13 Igkeupii ran de ne egginaaldeken a wey egpekeyimu te sale ke egtumanen ku ka ingkahi ni Simayas wey eyew egkareetan ka bantug ku, wey eyew egdali-dian a te me etew.

14 Ne mig-ampu a, “He Manama ku, tantanuri nu ka langun ne mareet ne hinimuwan ni Tubiyas wey ni Sanbalat. Ne tantanuri nu degma ka malitan ne prupita ne si Nuwadiyas wey ka duma pad ne me prupita ne migpanginaaldek keddiey.”

15 Neimpusan ded iya ka batu ne alad te igkararuwa ne pulu wey lalimma (25) ne aldew te igkeen‑em ne bulan, ne iyan ka bulan te Ilul. Migginguma te lalimma ne pulu wey daruwa (52) ne aldew ka peggingimpus te batu ne alad. 16 Te pegkanengnengi kayi te me etew te nakalingut ne me nasud ne egkuntere kanami, nenaaldek sikandan wey neneyilew; su nasabut dan ne neimpusan ka seini ne himu puun te bulig te Manama.

17 Te intiru ne lalimma ne pulu wey daruwa (52) ne aldew, migmasulsulatey ka me talahuren ne me etew te Huda ki Tubiyas. 18 Masulug ka migsaad ne eglapig ki Tubiyas ne matig-Huda, su mekaamung ma sikandin ni Sikaniyas ne anak ni Ara. Ne ka anak din degma ne lukes ne si Diyuhanan, nakaasawa te anak ni Misulam ne anak ni Birikiya. 19 Ne impangguhud dan keddi ka me meupiya ne neyimu ni Tubiyas, wey impangguhud dan kandin ka langun ne impanlalag ku. Ne layun a peuyani ni Tubiyas te sulat eyew egginaaldeken a.