1 Te seeye ne timpu, diye nangugpe te Hirusalim ka me pangulu te me Israilita. Ne migpintut-pintut ka duma ne me etew eyew eg-alam te sabeka ne pamilya puun te sapulu ne pamilya, eyew diye de igpeugpe te Hirusalim, ka matulus ne siyudad. Ne ka duma ne pamilya, diyad eg-ugpe te duma ne me lungsud. 2 Indayan te me etew ka langun ne iyan e eg-uney-uney egkahi te eg-ugpe sikandan diye te Hirusalim. 3  ✡ Nih 7:73.Ne ka duma ne me Israilita, ka me talagpanubad, me Libita, me suluhuanen te timplu, wey ka me kabuhalan te me suluhuanen ni Sulumun diye nangugpe te me inged dan ne diye te nalein-lein ne lungsud ne sakup te Huda. Ne ka duma ne kabuhalan ni Huda wey ni Binhamin, diyad mig-ugpe te Hirusalim.

Ne seini ka me pangulu te me kabuhalan ni Huda wey ni Binhamin ne mig-ugpe diye te Hirusalim.

4 Puun te kabuhalan ni Huda:

Si Atayas ne anak ni Usiyas. (Si Usiyas anak ni Sakariyas. Si Sakariyas anak ni Amariyas. Si Amariyas anak ni Sipatiyas. Ne si Sipatiyas anak ni Mahalalil ne egpuun te kabuhalan ni Piris ne anak ni Huda.) 5 Si Maasiyas ne anak ni Baruk. (Si Baruk anak ni Kulhusi. Si Kulhusi anak ni Hasayas. Si Hasayas anak ni Adayas. Si Adayas anak ni Huwiyarib. Ne si Huwiyarib anak ni Sakariyas ne kabuhalan ni Sila ne anak ni Huda.)

6 Ne due 468 ne me kabuhalan ni Piris ne mabbulut ne me etew ne nangugpe diye te Hirusalim.

7 Puun te kabuhalan ni Binhamin:

Si Salu ne anak ni Misulam. (Si Misulam anak ni Huwid. Si Huwid anak ni Pidayas. Si Pidayas anak ni Kulayas. Si Kulayas anak ni Maasiyas. Si Maasiyas anak ni Itil. Ne si Itil anak ni Hisayas.)

8 Ne migsinundul ka suled pad iya ni Salu ne si Gabay wey si Salay, wey ka me karumaan dan ne 928 ne me etew ne nangugpe diye te Hirusalim. 9 Si Huwil ne anak ni Sikri iyan pangulu ran wey si Hudas ne anak ni Hasinuwa ka igkarangeb ne pangulu ran te siyudad.

10 Puun te me talagpanubad:

Si Hidayas ne anak ni Huwiyarib, si Hakin, 11 si Sirayas ne anak ni Hilkiyas. (Si Hilkiyas anak ni Misulam. Si Misulam anak ni Saduk. Si Saduk anak ni Mirayut. Ne si Mirayut anak ni Ahitub ne talagmandu diye te timplu.) 12 Duma ran ka 822 ne me lukes ne karumaan dan ne migtrabahu diye te timplu.

Si Adayas ne anak ni Hihuram. (Si Hihuram anak ni Pilayas. Si Pilayas anak ni Amsi. Si Amsi anak ni Sakariyas. Si Sakariyas anak ni Pasur. Ne si Pasur anak ni Malkiya.) 13 Ne migginguma te 242 ka langun ne kabuhalan ni Adayas ne pangulu te me pamilya ran. Duma degma te mig-ugpe diye te Hirusalim si Amasay ne anak ni Asaril ne anak ni Asay ne si Asay anak ni Misilimut ne si Misilimut anak ni Imir. 14 Ne migginguma te 128 ka me bahani ne me suled dan. Ne iyan dan pangulu si Sabdiil ne anak ni Hagidulim.

15 Puun te me Libita:

Si Simaya ne anak ni Hasub. (Si Hasub anak ni Asrikam. Si Asrikam anak ni Hasabiyas. Ne si Hasabiyas anak ni Buni.)

16 Ne si Sabitay wey si Husabad ne me pangulu te me Libita, iyan impiyalan te me himu diye te lihawangan te timplu.

17 Si Mataniyas ne anak ni Mika. (Si Mika anak ni Sabdi, wey si Sabdi anak ni Asap.) Si Mataniyas ka pangulu te pegsaye, pegpasalamat, wey peg-ampu.

Ne si Bakbukiyas ka talagbulig kandin wey si Abda ne anak ni Samuwa. (Si Samuwa anak ni Galal, wey si Galal anak ni Hidutun.)

18 Ne migginguma te 284 ka me Libita ne mig-ugpe diye te matulus ne siyudad te Hirusalim.

19 Ka me talagbantey te gumawan te timplu:

Si Akub, si Talmun wey ka me karumaan dan ne 172 langun.

20 Ne ka nasame ne me Israilita duma te me talagpanubad, me Libita, diyad e nangugpe te me lungsud te Huda, diye te tane te kabuybuyahan dan. 21 Piru diye mig-ugpe te Upil ka me suluhuanen diye te timplu ne impanguluwan ni Siha wey ni Gispa.

22 Ne iyan migpangulu te me Libita diye te Hirusalim si Usi ne anak ni Bani. (Si Bani anak ni Hasabiyas, si Hasabiyas anak ni Mataniyas, si Mataniyas anak ni Mika.) Ne si Usi kabuhalan te me mangngulahing diye te timplu ne me kabuhalan ni Asap.

23 Ne ka Hari ka migsuhu te me mangngulahing ne egteil ka tagse sabeka kandan te aldew ke ken‑u sikandan egpangulu te peg-ulahing diye te timplu.

24 Si Pitahiyas ne anak ni Misisabil, ne sabeka te me kabuhalan ni Sira ne anak ni Huda, iyan sinalihan te Hari te Pirsya te langun-langun meyitenged te Israilita.

25 Ne ka duma ne etew diye nangugpe te me bariyu ne marani te me kamet dan. Ka me kabuhalan ni Huda diye nangugpe te Kiryat-Arba, Dibun, wey te Hikabsiil wey te nenakalingut dutu ne me bariyu. 26 Ne ka duma kandan diye te nangugpe te Huswi, diye te Mulada, diye te Bit-Pilit, 27 diye te Hasar-Suwal, diye te Birsiba wey te nenakalingut kayi ne me bariyu, 28 diye te Siklag, diye te Mikuna wey te nenakalingut kayi ne me bariyu, 29 diye te In-Rimun, diye te Sura, diye te Harmut, 30 diye te Sanuwa, diye te Adulam wey te nenakalingut kayi ne me bariyu, diye te Lakis wey diye te nenakalingut ne me kamet kayi, wey diye te Asika wey te nenakalingut kayi ne me bariyu. Purisu migkekampu sikandan puun te Birsiba taman diye te napu te Hinum. 31 Ne ka duma ne me kabuhalan ni Binhamin nangugpe diye te Giba, Mikmas, Aya, Bitil wey te nenakalingut dutu ne me bariyu, 32 diye te Anatut, Nub, wey diye te Ananiyas, 33 diye te Hasur, Rama, wey diye te Gitaim, 34 diye te Hadid, Sabuyim, wey diye te Nibalat, 35 diye te Lud, Unu, wey diye te napu ne in-ugpaan te me talaggimu te minsan nekey ne kapandayan. 36 Ne due me Libita diye te Huda ne impalemung diye te me kabuhalan ni Binhamin.