Numiru
Igpewun‑a
Ka baseen te Numiru migpangguhud meyitenged te me kabuhalan ni Israil seled te hep‑at ne pulu (40) ne leg‑un puun te peg-awe dan te Bubungan ne Sinay, taman te migginguma sikandan diye te igsile te tane ne insaad te Manama ne igbehey kandan. Ka ngaran te seini ne baseen, due kalabetan te amana ne impurtanti ne baad te seini ne pangguhuren ne iyan ka pegpanlista ni Muwisis te me kabuhalan ni Israil diye te Bubungan ne Sinay te ware pad sikandan mig-awe diye. Peglihad te hep‑at ne pulu (40) ne leg‑un, inggimu e man‑e ka pegpanlista diye te Muwab, ne dapit te igsile te Weyig ne Hurdan. Te elat-elat te seini se kararuwa ne pegpanlista te keet-etawan, miggendiye ka me kabuhalan ni Israil te Kadis-Barniya te igkakawanan ne balabahan ne eletanan te Kanaan. Piru puun te Kadis-Barniya, ware sikandan nakaseled te tane ne insaad te Manama ne igbehey kandan. Peglihad te masulug ne me leg‑un te peg-ugpe dan te seeye ne inged, miggendiye sikandan te tane ne dapit te igsile te Weyig ne Hurdan. Ka sabeka ne punduk te keet-etawan mig-ugpe diye, wey ka duma miglapas te Weyig ne Hurdan peendiye te Kanaan.
Ka baseen te Numiru migpangguhud man‑e meyitenged te keet-etawan ne layun naawei te kabagget, nenaaldek taliware te kalised, wey migsukul te Manama wey ki Muwisis ne in-alam te Manama eyew iyan egpangulu kandan. Migpangguhud man‑e seini meyitenged te pegkamatinumanen te Manama wey te pegsagman din te keet-etawan din ne ware egtamanan minsan pad nenaawaan sikandan te kabagget, wey migmasinupaken. Migpangguhud man‑e seini meyitenged te kene egkataman ne pegpamakey ni Muwisis te Manama wey te keet-etawan din minsan pad te due me timpu ne naaminan sikandin te pegpariralem.
Ka nenasulat te seini ne baseen
Ka pegpangandam te me kabuhalan ni Israil te pegligkat te Sinay 1:1–9:23
a. Ka hun‑a ne pegpanlista ni Muwisis te me kabuhalan ni Israil 1:1–4:49
b. Ka nalein-lein ne me balaud wey me tulumanen 5:1–8:26
c. Ka igkarangeb ne Sahakeen te Peglihad te Panalihan 9:1-23
Puun te Bubungan ne Sinay peendiye te Muwab 10:1–21:35
Ka neneyitabu diye te Muwab 22:1–32:42
Ka me inged ne nabayaan te me kabuhalan ni Israil 33:1-49
Me paney-paney te ware pad miglapas te Hurdan 33:50–36:13
1
Ka hun‑a ne pegpanlista ni Muwisis te me kabuhalan ni Israil
1 ✡ Num 26:1-51.Te an-anayan ne aldew te igkarangeb ne bulan te igkarangeb ne leg‑un puun te peg-awe te me kabuhalan ni Israil te Ihiptu, migpakiglalag ka Magbebaye ne Manama ki Muwisis diye te seled te Balungbalung ne Temuwanan diye te disirtu, diye te Sinay. Migkahi ka Magbebaye, 2-3 “Sinsusa niyu ki Aarun ka langun ne kabuhalan ni Israil sumale te tagse kabuhalan wey pamilya. Ilista niyu ka me ngaran te langun ne lukes ne puun te daruwa ne pulu (20) se idad wey ke buyag-buyag e ne egkaayun e ne eg-apil te gira. 4 Keilangan ne due sabeka ne etew ne egpuun te tagse kabuhalan. Ka sika ne etew, pangulu te kabuhalan din eyew egbulig kaniyu te egpanlista.”
5 Ne ka me ngaran te naalam ne me pangulu te kabuhalan para te sika ne himu iyan ensi:
Ilisur ne anak ni Sidiyur, ne egpuun te me kabuhalan ni Rubin;
6 Silumil ne anak ni Surisaday, ne egpuun te me kabuhalan ni Simyun;
7 Naasun ne anak ni Aminadab, ne egpuun te me kabuhalan ni Huda;
8 Natanail ne anak ni Suar, ne egpuun te me kabuhalan ni Isakar;
9 Iliyab ne anak ni Hilun, ne egpuun te me kabuhalan ni Sabulun;
10 Ilisama ne anak ni Amihud, ne egpuun te me kabuhalan ni Ipraim;
Gamalil ne anak ni Pidasur, ne egpuun te me kabuhalan ni Manasis;
11 Abidan ne anak ni Gidyun, ne egpuun te me kabuhalan ni Binhamin;
12 Ahisir ne anak ni Amisaday, ne egpuun te me kabuhalan ni Dan;
13 Pagil ne anak ni Ukran, ne egpuun te me kabuhalan ni Asir;
14 Iliyasap ne anak ni Diyuwil, ne egpuun te me kabuhalan ni Gad;
15 Ahira ne anak ni Inan, ne egpuun te me kabuhalan ni Naptali. 16 Sikandan ka me pangulu te tagse kabuhalan ne naalam puun te keet-etawan te Israil.
17 Ne impeumew e ni Muwisis wey ni Aarun ka impangingaranan ne me etew. 18 Ne te an-anayan ne aldew te igkarangeb ne bulan, impalibulung dan e ka langun ne me kabuhalan ni Israil. Immanlista ka me etew sumale te kaap-apuan dan wey pamilya, wey insalsallimbeka te eglista ka langun ne me lukes ne puun te daruwa ne pulu (20) se idad wey ke buyag-buyag e, 19 sumale te insuhu te Magbebaye ne Manama ki Muwisis. Inggimu ni Muwisis seini ne pegpanlista diye te disirtu, diye te Sinay. 20-46 Ne ka me lukes ne puun te daruwa ne pulu (20) se idad wey ke buyag-buyag e ne egkaayun e ne eg-apil te gira, imanlista sumale te tagse kabuhalan wey me pamilya. Ne seini ka kasuluhan te me lukes ne kabuhalan dan:
46,500 te me kabuhalan ni Rubin ka kinakakayan ne anak ni Hakub;
59,300 te me kabuhalan ni Simyun;
45,650 te me kabuhalan ni Gad;
74,600 te me kabuhalan ni Huda;
54,400 te me kabuhalan ni Isakar;
57,400 te me kabuhalan ni Sabulun;
40,500 te me kabuhalan ni Ipraim ne anak ni Husi;
32,200 te me kabuhalan ni Manasis, ka dangeb ne anak ni Husi;
35,400 te me kabuhalan ni Binhamin;
62,700 te me kabuhalan ni Dan;
41,500 te me kabuhalan ni Asir;
53,400 te me kabuhalan ni Naptali.
Migginguma te 603,550 ka langun ne lukes.
47 Piru ware mule ilagkes te egpanlista ka me kabuhalan ni Libi 48 su ingkahiyan ma te Magbebaye ne Manama si Muwisis te, 49 “Kene nu ilagkes te egsinsus ka me kabuhalan ni Libi. 50 Sikandan ka egpiyalan te Matulus ne Balungbalung ne In-alad ne intahuan te Kasabutan, wey te me kasangkapan kayi. Sikandan ka eg-uyan-uyan te Balungbalung wey te langun ne me kasangkapan kayi. Keilangan ne egtangguwen dan seini wey eglingutan dan te egkekampu. 51 Ke eggalinen ka Balungbalung, ka me kabuhalan ni Libi ka egtines kayi, wey sikandan ded man‑e ka egpasasindeg. Ne eggimatayan ka minsan hentew ne kene ne kabuhalan ni Libi ne egdani-rani te Balungbalung. 52 Ne ka duma ne me kabuhalan ni Israil, keilangan ne egkekampu sumale te tagse punduk, wey egpes-ek te bendila dan. 53 Piru keilangan ne eglingutan te me kabuhalan ni Libi te egkekampu ka Balungbalung eyew te pegbantey ne ware minsan hentew ne egpakarani-rani kayi eyew kena a egkalangetan te me kabuhalan ni Israil. Ka me kabuhalan ni Libi ka egpiyalan te sika ne Balungbalung.” 54 Purisu intuman te me kabuhalan ni Israil ka langun ne insuhu te Magbebaye ne Manama kandan pinaahi ki Muwisis.