1 Ne ingkahiyan te Magbebaye ne Manama si Muwisis wey si Aarun, 2 “Seini pad man‑e ka sabeka ne tulumanen ne igkeupii ku ne eggimuwen niyu: Kahii niyu ka me kabuhalan ni Israil ne keilangan ne egbehey kaniyu te malalab ne beyan ne baka ne ware pad anak, wey ware pad idaru.* Te Hibruwanen: ware de due yuggu ne miglepew. 3 Ne ibehey niyu seini ki Iliyasar ne talagpanubad, wey uyana niyu diye te lihawangan te kampu wey lapaa niyu diye te tangkaan din. 4 Ne igpaseneb ni Iliyasar te langesa ka kemel din wey igpapesik-pesik din ka langesa te kapapitu diye te katangkaan te Balungbalung ne Temuwanan. 5 Ne taheed te egtetengteng si Iliyasar, egtutungen ka sika ne baka egtimmana—ka laplap, ka sapu, ka langesa, wey ka me bituka. 6 Ne egkuwa si Iliyasar te kayu ne sidar, sugpang te isupu, wey te malalab ne lubid wey ig-antug din seini diye te taliware te intutung ne baka. 7 Ne pegkeimpus due, keilangan ne egpi‑pian ni Iliyasar ka kumbale din wey egpamanihus sikandin. Ne egkaayun e ne egseled sikandin te kampu piru eg-isipen pad sikandin ne malindit taman te marusilem. 8 Ne ka seeye se migtutung te baka, keilangan degma ne egpami‑pi te kumbale din wey egpamanihus, wey eg-isipen degma sikandin ne malindit taman te marusilem. 9 Ne iyan egtines te abu te baka ka etew ne in-isip ne malinis. Ne igtines din seini diye te malinis ne tinesanan diye te lihawangan te kampu. Egtinesen seini eyew eggamiten te me kabuhalan ni Israil ne ig-amut te weyig ne eggamiten te peglinis para te peg-awe te sale. 10 Ne ka seeye se migtines te abu te baka, keilangan degma ne egpami‑pi te kumbale din wey eg-isipen degma sikandin ne malindit taman te marusilem. Ware egtamanan te sika ne balaud para te me kabuhalan ni Israil wey te me lapu ne mig-ugpe duma kandan.”

11 “Eg-isipen ne malindit taman te pitu ne aldew ka etew ne egpakasamsam te minatey. 12 Ne keilangan ne eglinisan din ka pegkeetew rin te igkatelu wey te igkapitu ne aldew pinaahi te weyig ne eggamiten te peglinis, wey eg-isipen e sikandin ne malinis. Piru ke kene din eglinisan ka pegkeetew rin te igkatelu wey te igkapitu ne aldew, kenad e sikandin eg-isipen ne malinis. 13 Ka minsan hentew ne nakasamsam te minatey, wey ware miglinis te pegkeetew rin, miglindit te Balungbalung te Magbebaye ne Manama. Ne ka sika ne etew eg-isipen e ne kenad ne kabuhalan pad ni Israil. Ne tenged te ware sikandin napespesiki te weyig ne eggamiten te peglinis, egpakapabulus-bulus en iya ka pegkamalindit din.

14 “Ne seini ka balaud ke due etew ne egpatey diye te seled te balungbalung: ka minsan hentew ne egseled te sika ne balungbalung, wey ka minsan hentew ne diye daan te seled, eg-isipen ne malindit taman te pitu ne aldew. 15 Ne eg-isipen degma ne malindit ka langun ne tahuanan ne ware supe ne diye te seled te seeye ne balungbalung. 16 Ne eg-isipen degma ne malindit taman te pitu ne aldew ka langun ne diye te lihawangan ne nakasamsam te etew ne inggimatayan pinaahi te kampilan, wey ke namatey naa iling te kamatayen te duma, wey ke nakasamsam naa te tul‑an te etew, wey ke nakasamsam naa te sabalanan. 17 Ne ka me etew ne nalinditan te sika ne paahi, keilangan ne egkuwa te abu te baka ne intutung eyew ig-awe te sale. Ne igtahu dan seini te tahuanan wey egweyihan dan. 18 Ne ka etew ne in-isip ne malinis, egkuwa te sugpang te isupu wey igdallut din seini te weyig wey egpapespesikan din ka balungbalung wey ka langun ne kasangkapan diye te seled lagkes ka me etew. Ne egpapespesikan din degma ka etew ne nakasamsam te tul‑an te etew wey ke inggimatayan pinaahi te kampilan wey ke sabalanan naa. 19 Te igkatelu wey igkapitu ne aldew, egpapespesikan te malinis ne etew ka etew ne in-isip ne malindit. Ne keilangan ne egpi‑pian te etew ne inlinisan ka kumbale din wey egpamanihus sikandin wey eg-isipen e sikandin ne malinis te pegkamarusilem.

20 “Piru ke kene egpanlinis ka etew ne in-isip ne malindit, eg-isipen e sikandin ne kenad ne kabuhalan pad ni Israil su inlinditan din ma ka Balungbalung te Magbebaye ne Manama, wey tenged te ware sikandin napespesiki te weyig ne eggamiten te peglinis, egpakapabulus-bulus en iya ka pegkamalindit din. 21 Tulumanen seini ne kene egkabalbalawan te ware egtamanan. Ka seeye se egpesik-pesik te weyig ne eggamiten te peglinis, keilangan ne egpami‑pi te kumbale din. Ne ka egsamsam te sika ne weyig, eg-isipen ne malindit taman te marusilem. 22 Ne ka minsan nekey ne egkahen-genan te etew ne malindit, egmalindit degma, wey ka seeye degma se egpakasamsam kayi, egmalindit degma taman te marusilem.”