1 Ka katagseb, egpekeiling te etew ne migbebaley wey insungkalehan din te pitu. 2 Miglape sikandin te me ayam din eyew egsahakeen. Ne in-andam din ka me pegkeen wey me inumen. 3 Insuhu din ka me suluhuanen din ne me malitan eyew te pegginggat te me etew diye te bariyu te migkahi, 4 “Tambung kew te sahakeen, me etew ne ware aperu!” Ne egkahi sikandin diye te me umbeg, 5 “Hendini kew, keen kew te egkakeen wey te inumen ne in-andam ku para kaniyu. 6 Engkeri niyud e ka keungelan niyu wey ugpe kew ne iling te matagseb ne me etew eyew egmalayat ka umul niyu.”

7 Ke egsaparan nu ka hambuhen ne etew, egkapeyilawan ke re iya; ke egsaparan nu ka mareet ne etew, egdereetan ke re iya nikandin. 8 Kene nu sapari ka etew ne hambuhen su egdumutan ke re nikandin. Piru ke egsaparan nu ka etew ne matagseb, egtahuren ka nikandin. 9 Ke egpanuluen nu ka etew ne matagseb, egkatimulan ka katagseb din; ke egpanuluen nu ka etew ne matareng, egkatimulan ka katuenan din.

10 Ka pegkaaldek te Magbebaye ne Manama ka bunsuranan te katagseb, wey ka peg-ila te Matulus ne Manama ka egpuunan te salabutan. 11 Egpakamalayat te umul nu ka katagseb. 12 Egpakameupiya keykew ka katagseb, piru ke lalung ka, sikeykew re iya ka egkabaybayaran.

13 Ka keungelan, egpekeiling te malitan ne be-baan, ware katuenan, wey ware hilew. 14 Diye sikandin migpinpinnuu te gumawan te baley rin wey ke diye naa te pinnuuwan ne diye te bariyu 15 wey egpangumew te me etew ne egmanlihad ne kene mule egpangilabet te eggimuwen te duma. 16 Migkahi sikandin, “Tambung kew te sahakeen, me etew ne ware aperu!” Ne migkahi man‑e sikandin diye te me umbeg, 17 “Meemis ka weyig ne tinakew, wey mananam ka paan ne eggelhelesan de te egkeen.” 18 Ne ware nakataha ka me etew ne ka eggendiye te baley rin, egkapatey bes, wey ka seeye se nakaseled e, diyad e te inged te me minatey.