20
1 Ka subla ne peg-inum te egpekewubug ne inumen,
egpakamatale te etew wey egpekeiling e te egbusawen.
Purisu ka etew ne egpewubug-hubug, egkeungel.
2 Ka langet te Hari, egpekeiling te pegginihel te liyun.
Purisu, emun ke egpeyibeluen nu sikandin, eggimatayan ka iya nikandin.
3 Kabantug te sabeka ne etew ka pegpariyu te samuk;
ka me ungel re ne me etew ka egkeupian te samuk.
4 Ka etew ne pehulen ne egdaru te timpu te pegpamula,
ware egkahaani rin te timpu te tinggaani e.
5 Ka suman-suman te sabeka ne etew,
egpekeiling te weyig ne maralem,
piru egkatirew sika te matagseb ne etew.
6 Masulug ka egkahi ne egkasalihan sikandan,
piru warad iya egkasalihan kandan.
7 Due keupianan te me anak
te etew ne matareng wey ware igkarew‑ey.
8 Ke eggukum ka Hari, eg-ay-ayaran din iya te egnengneng ke hentew ka nekeyimu te mareet.
9 Ware minsan hentew ne egpakakahi,
“Malinis amana ka pusung ku, wey ware sale ku.”
10 Egkeepes ka Magbebaye te me etew ne eggamit te kene ne eleg ne timbangan wey sekeranan.
11 Egkeilaan ka lukes-lukes ke mamenu sikandin
pinaahi te me hinimuwan din,
ke matareng naa wey se kene.
12 Inggimuwan ki te Magbebaye te mata eyew egpakakita ki
wey te talinga eyew egpakarineg ki.
13 Ke egliplipereng ke re, egkaayu-ayu ka,
piru ke egbasuk ka, dakel ka egkakeen nu.
14 Ka talagbebeli, layun de egsagsahukul te mahal kun ka egpameliyen,
piru ke egkabeli rin e seini, egpeggasal e sikandin te nabeli rin.
15 Ka lalag te matagseb ne etew,
dakel pad se karuan du te bulawan
wey te me mahal ne batu.
16 Ke due sabeka ne etew ne egsaad
ne sikandin ka egbayad keykew te utang te lapu,
buyui nu sikandin te kumbale ne iggerentiya,
eyew egbayad iya sikandin.
17 Mananam te sabeka ne etew ka egkakeen ne tinakew,
piru egkataman, egpekeiling e seini te pantad diye te be‑be din.
18 Eglampus ka planu nu pinaahi te me tambag;
kene ka pakiggira ke ware meupiya ne tambag te duma.
19 Ka etew ne id-iranen, kene iya sikandin egpekeeles te guhuren,
sikan naa, pakaddiyu ka te iling due ne etew.
20 Ka egdilus te iney wey amey rin,
egpatey iya iling te sulu
ne egkeebukan diye te delem.
21 Ka karatuan ne inggaat ne eggagaanan te eg-angey,
kene egpakabehey te keupianan te mewuri ne timpu.
22 Kene ka suli te mareet ne himu;
salig ke re te Magbebaye,
su egbulihan ka nikandin.
23 Egkeepes ka Magbebaye ne Manama
te me etew ne eggamit te kene ne eleg ne timbangan,
su kene ne meupiya sika ne himu.
24 Ka Magbebaye ka egbuut te umul ta,
purisu kene ta egkatahaan ke nekey ka egtamanan ta.
25 Suman-suman ke pa ke nekey ka igsaad nu ne igdasag diye te Magbebaye,
su kema ke egpekegsendit ka tenged te saad nu.
26 Ke eggukum ka matagseb ne Hari,
eg-ay-ayaran din iya te egnengneng ke hentew ka nekeyimu te mareet,
wey egparusaan din iya.
27 Imbehayan ki te Magbebaye te suman-suman wey kunsinsya,
eyew egkeugsi-ugsi ta ka pegkeetew ta.
28 Ke hiimenawen wey matinumanen ka sabeka ne Hari,
ware mareet ne egkeyitabu kandin,
wey egpakapabulus-bulus ka pegmandu din.
29 Egkareyrey ka me bate-bate pad tenged te kanekal ran,
wey egkabantug ka me buyag e tenged te me uban dan.
30 Senge-kakuwa ne keilangan ne egpakaheram ki te peggumi
eyew egkabalbalawan ka mareet ne batasan ta.