29
1 Emun ke egpaheed-geed ka ne egpakehal te ulu nu* Te Hibruwanen: lieg. minsan kapapila kad e sapari,
egginguma ka timpu ne egsahap ka, wey kene kad e egpekeenew.
2 Emun ke matareng ka pangulu,
egkahale ka me etew.
Piru ke mareet ka pangulu,
egkengallaggew sikandan.
3 Ka etew ne egkeup-upian te katagseb,
egpakapahale te amey rin.
Ka etew ne iyan de himu se egduma-ruma te malitan ne egpamelegye te lawa,
egdaat-daat de te karatuan din.
4 Emun ke iyan egsumsumanen te Hari ka eleg ne peggukum,
egmalig‑en ka nasud.
Piru ke iyan din de egsumsumanen ka seleppi,
egkahuhus iya ka nasud din.
5 Ka etew ne egdeyrey te ubat te sumbaley rin,
iling de te in-uney rin sahiluta ka paa rin.† Te Hibruwanen: belata ka biyale.
6 Ka mareet ne etew,
egkasahilut te mareet ne hinimuwan din,
piru ka matareng ne etew, eg-ul-ulahing mule wey eggale-gale.
7 Ka matareng ne etew, egsuman-suman te katenged te egkaayu-ayu.
Piru kene mule egpakasuman-suman kayi ka maddeet ne etew.
8 Ka me etew ne lemeten,
iyan egpuunan ne egkasamuk ka intiru ne siyudad,
piru ka me matagseb, iyan egpakabewu te kabelu.
9 Emun ke egpakig-apul ka matagseb ne etew te ungel,
egngisi re ka ungel, wey egpanampele,
wey kene egpeeneng-eneng.
10 Ka etew ne ware igkarew‑ey,
egdumutan te me etew ne talaggimatey,
piru egpangabangan sikandin te me etew ne matareng.
11 Kene egpakatigkel ka ungel te kabelu din,
piru ka matareng ne etew, mahaan egpakatigkel te langet din.
12 Emun ke egpalintutuu te ubat ne guhuren ka pangulu,
egkeyimu ne mareet ka langun ne upisyal rin.
13 Ka egkaayu-ayu, wey ka egleig-leig,
nekeg-iling de sikandan ne imbehayan te Magbebaye ne Manama te mata.
14 Ke meupiya ka peggukum te Hari diye te egkengaayu-ayu,
eghari sikandin te ware egtamanan.
15 Ka peglampes wey pegsapad,
egpakabehey te katagseb te bate.
Piru ke egbalaharen de sikandin,
egpakapeyilew re sikandin te iney rin.
16 Emun ke mareet ka pangulu,
egmasulug degma ka me etew ne eggimu te mareet.
Piru egkengaddeetan sikandan wey egkakita te me matareng ka pegkareeti ran.
17 Panulua nu ka anak nu taheed te bate pad sikandin,
eyew kene ka egkallagew kandin,
wey layun nu sikandin igkahale.
18 Ware keupianan te nasud
ke ware lalag te Manama ne egpakapanulu.
Piru due keupianan te seeye se migtuman te Balaud te Manama.
19 Kene egkapanulu ka suluhuanen pinaahi te me lalag de,
su minsan egpakasabut ded sikandin,
kene iya sikandin egpammineg.
20 Duen pad egkapallateng te etew ne subla ne ungel
du te etew ne egpanaweles de due eglalag.
21 Ke eg-upianan nu ka suluhuanen nu puun pad te pegkabate din,
diye egpangkus te egkaangken din ka langun ne keykew te mewuri ne timpu.
22 Ka etew ne mahaan egkabelu,
iyan egpuunan te samuk,
wey egpekeyimu te dakel ne sale.
23 Egkeyilawan ka etew ne hambuhen,
piru egtahuren mule ka mapariralemen.
24 Ka etew ne egduma-ruma te takawen,
egdereet de te kandin mismu ne pegkeetew.
Egsaad sikandin ne egpamalehet,
piru kene sikandin egpangguhud te malehet.
25 Emun ke egkaaldek ka te etew, nasi ka egsahap.
Piru egkaluwas ka ke egsalig ka te Magbebaye.
26 Masulug ka egkeupian ne eglapihan te pangulu,
piru diye de te Magbebaye egkaangken te etew ka eleg ne peggukum.
27 Ka matareng ne etew, egkeepes te mareet ne etew,
wey ka mareet ne etew, egkeepes degma te matareng ne etew.