10
Ka pegpangananey te Manama
1 Mania Magbebaye te egpariyu ka?
Mania Manama te eggeles ka
te timpu te keyirapan ku?
2 Ka me hambuhen ne me etew,
imbaybayaran dan ka egkengaayu-ayu.
Egsahap ded sikandan te hinimuwan dan,
wey te insuman-suman dan ne eggimuwen.
3 Ka me etew ne mareet se hinimuwan, impeggasal ran ka mareet ne igkeupii ran;
ka me leheren, imbalahad dan ka Magbebaye wey indilus dan.
4 Puun su kene sikandan egkateu ne egpariralem,
kenad e sikandan egpangananey keykew.
Layun sikandan egsuman-suman ne ware Manama.
5 Layun sikandan egmatubung.
Ware dan en iya miglinga-linga te peggukum nu.
Imbaley-baley ran de ka langun ne kuntere dan.
6 Migsuman-suman sikandan ne kene sikandan egkamenu,
wey ke egsahap naa.
7 ✡ Rum 3:14.Neelin de ne pegdilus, pegpanlimbung, wey pegpanlupig ka eglalahen dan,
layun ne karereetan wey kene ne meupiya ka egpangguhuren dan.
8 Egmanggepas sikandan diye te marani te me bariyu,
wey egpangimatayan dan ka me etew ne ware neyimu ne sale.
Layun sikandan egpamitew te mekeyid‑u-hid‑u ne etew,
su eyew egdereetan dan.
9 Egpekeiling sikandan te liyun ne eggeles te mabbenes,
egdarab sikandan te ware egkeyimu eyew egdawiyen.
Emun ke egsahad e kandan seeye se ware egkengeyimu,
egganuyen dan e sikandan diye te mariyu.
10 Egtamtamanan dan te eglupet ka mekeyid‑u-hid‑u ne me etew,
taman te kenad e sikandan egmekeeleg wey egmakasasindeg.
11 Egkahi sikandan diye te geyinawa ran,
“Kenad eg-ambag-ambag ka Manama,
wey mariyu e sikandin wey kenad egpakakita te eggimuwen ta.”
12 Weil kad, he Magbebaye. Paruseyi nud e sikandan Manama.
Kene nu balahara seeye se egkengaayu-ayu.
13 He Manama, mania te egdali-dian ka te me etew ne mareet se hinimuwan?
Kahiyen dan pad man‑e ne kene nu sikandan egdusaan?
14 Piru nakita nu mule ka nenabbaybayaran wey ka nanlungku,
wey andam ka ne egpangabang kandan.
Egpangananey keykew ka me etew ne mekeyid‑u-hid‑u,
wey talagpangabang ka te me ilu.
15 Gepua nu ka me belad te me etew ne mareet se hinimuwan.
Duseyi nu sikandan taman te egpeeneng-eneng e eggimu te sale.
16 Magbebaye, Hari ka te ware egtamanan.
Egkaawe ka me nasud te seini ne inged ne ware Manama.
17 Narineg nu Magbebaye ka egbuyuen te egkengaayu-ayu,
wey imbagget nu sikandan.
Indineg nu sikandan,
18 wey impangabangan nu ka me ilu wey egkengaayu-ayu,
eyew ka egpatey red degma ne etew kenad egpekeyinalat.