13
Ka pegpangananey te Manama
Ka ulahingen ni Dabid para te pangulu te mangngulahing.
1 He Magbebaye, ken‑u egkataman ka pegbalahad nu keddi?
Taman naa te ware egtamanan?
Ken‑u egkataman ka peggeles nu keddiey?
2 Ken‑u egkataman ne egkabantalan ka gimukud ku?
Ken‑u egkataman ka egmasakit ne pusung ku aldew wey marusilem?
Ken‑u egkataman ka me kuntere ku ne egleig-leig keddiey?
3 He Magbebaye ne Manama ku, sahipaa a.
Tabaka a te pegpangananey ku keykew.
Behayi a te kalayag eyew kene egkabigtew ka geyinawa ku.
4 Su kema ke egpakakahi ka me kuntere ku te natalu ad e nikandan,
wey egkahale-gale e ka eg-usig keddi ke egkareetan ad.
5 Migsalig a te geyinawa nu ne kene egkabalbalawan.
Egkahala a puun su egluwasen a nikeykew.
6 Eg-ulahingen ku sikeykew Magbebaye,
su puun pad dengan meupiya kad keddi.