18
Ka ulahingen ni Dabid te pegpanalu rin
Ka ulahingen ni Dabid ne suluhuanen te Magbebaye ne Manama para te pangulu te mangngulahing. In-ulahing din seini te timpu ne inluwas sikandin te Magbebaye puun ki Saul, wey te langun ne kuntere din.
(2 Sam. 22:1-51)
1 Sikeykew ka kanekal ku, he Magbebaye ne Manama.
Inggeyinawaan ku sikeykew.
2 Sikeykew Magbebaye ne Manama ka manluluwas ku,
iling ka te batu wey malig‑en ne inged.
Manama, iling ka te batu ne egkaaputan ku,
ka kalasag ku wey ka maresen ne manluluwas ku,
ka maresen ne inged ku.
3 Migpangananey a keykew te Magbebaye ne Manama,
ne likes ne egdeyrayen,
wey inluwas a nikeykew puun te me kuntere ku.
4 Nekeiling ad te imbaku te lubid ne egpatey e.
Nekeiling a te nalened te mabeheng ne baggiyu.
5 Ka lebenganan egpekeiling te lubid ne nakabelebed keddi,
wey paluwak ne nakateen te dalan ku.
6 Purisu te kalaggew ku, migpangananey a keykew,
Magbebaye ne Manama ne iyan ka Manama ku.
Diye te timplu nu, indineg nu ka laheng ku,
wey ka pegpangananey ku.
7 Nataman miglilinug e ka inged wey nawelwel,
wey nawegweg ka me pabunsuran te me bubungan.
Uya su nabelu ka Magbebaye ne Manama.
8 Ne due ebel ne miglihawang te irung nu,
wey due hapuy ne migkanlabkanlab,
wey me baha ne miglihawang te be‑be nu.
9 Inlukatan nu ka langit wey migpamaneug ka.
Ne makepal ne kibel ka diye te diralem te paa nu.
10 Ne mig-untud ka te kirubin* Ka kirubin, sabeka ne klasi te panalihan ne egpekeiling te mananap ne due pakpak wey belad. wey miglayang e seini.
Ne iiyali seini ne miglayang iling te banug.† Te Hibruwanen: Miglepew sikandin diye te me pakpak te kalamag.
11 Migpaalindung ka te marusilem,
wey migbubukus ka te makepal ne gapun.
12 Migkikilat ka due te tangkaan nu,
wey nabusbus puun te gapun ka apiyew,
wey ka egkanlabkanlab ne hapuy.
13 Ne miglalag ka se Magbebaye ne Manama puun te langit,
wey nekeiling te luhung ka laheng nu.‡ Te Hibruwanen: Duen pad sumpul ne “apiyew wey me baha te hapuy.”
14 Migpakikilat ka te egpekeiling te me tunud,
wey nenekegsuwey-suwey ka me kuntere nu.
15 Tenged te subla ne langet nu Magbebaye ne Manama te me kuntere nu,
insuhu nu ka kinariraleman te dahat wey ka pabunsuranan te kalibutan ne egkalekisan.
16 Ne duen ka te langit ka migtinawe keddi,
wey impahakap a nikeykew puun te maralem ne weyig.
17 Inluwas a nikeykew puun te maresen ne kuntere ku,
wey puun te eg-ehet keddi ne manmanekal pad keddi.
18 Inlusuran a nikandan te timpu te nabaybayaran a,
piru imbulihan a nikeykew te Magbebaye ne Manama.
19 In-uyan a nikeykew diye te inged ne ware karereetan;
inluwas a nikeykew tenged su nahale ke ma keddi.
20 Indasahan a nikeykew Magbebaye ne Manama tenged te pegkamatareng ku,
wey impanalanginan a nikeykew tenged su wara a miggimu te sale.
21 Intuman ku ka me paahi nu Magbebaye ne Manama,
wey wara a mig-engked keykew Manama eyew eggimu te mareet.
22 Intuman ku ka langun ne suhu nu,
wey ware ku supaka ka me tulumanen nu.
23 Nakataha ka ne ware igkarew‑ey keddi,
su migpanalliye e ma te sale.
24 Indasahan a nikeykew Magbebaye ne Manama tenged te katareng ku,
wey tenged su nakataha ka ne ware sale ku.
25 Impapitew nu ka keupiya nu diye te matinumanen keykew,
wey in-up-upianan nu seeye se etew ne ware igkarew‑ey.
26 Meupiya ka te seeye se me malinis se me pusung,
wey impapitew nu degma ne mareet ka te seeye se maddeet ne etew.
27 Egluwasen nu ka me mapariralemen,
piru tabid nu re igpariralem ka me hambuhen.
28 He Magbebaye ne Manama, sikeykew ka sulu ku,
wey sikeykew ka kalayag ku ke marusilem ka dalan ku.
29 Ne egpakasukul a te sabeka ne punduk te sundalu,
tenged su egbulihan a nikeykew.
Egkasalampew ku ka batu ne alad te siyudad ne matikang wey makepal,
uya su egbulihan e ma nikeykew Manama ku.
30 Ware seyyup te paahi nu, Manama.
Napamalehetan ne malehet ka me saad nu.
Egpekeiling ka te kalasag ne egpaandilungan,
te langun ne eg-aput keykew.
31 Su ware lein ne Manama, ke kene sikeykew re Magbebaye ne Manama.
Ne ware lein ne batu ne aputanan, ke kene sikeykew re se Manama ney.
32 Sikeykew Manama ka migbehey keddi te keseg,
wey ka mig-awe te me balabag te dalan ku.
33 ✡ Hib 3:19.Ne inlig‑en nu ka me paa ku iling te paa te usa,
wey imbehayan a nikeykew te keseg eyew egpakatalu a te me kuntere ku.
34 Imbasbas nu ka me belad ku te pegpakiggira,
su eyew egpekeuyamu a te piet ne burunsi.
35 He Magbebaye ne Manama, impangabangan a nikeykew wey inluwas,
wey neyimu a ne mabantug tenged te pegtanggu nu,
wey ware layun igkaaldek ku tenged te geem nu.
36 Inggiluahan nu ka dalan ku,
wey wara a nakarugsu.
37 Impanalukunan ku ka me kuntere ku wey neumaan ku sikandan,
wey ware ku sikandan peen-enengi taman te nahule sikandan.
38 Indereetan ku sikandan patamtamani wey kenad e sikandan egpakasasindeg.
Nenakabahed de sikandan kayi te paa ku.
39 Tenged su imbehayan a nikeykew te keseg para te pegpakiggira,
wey impepanimbuel nu ka me kuntere ku kayi te tangkaan ku.
40 Impepallahuy nu ka me kuntere ku,
wey indereetan ku ka seeye se migdumut keddi.
41 Migpabulig sikandan piru ware migpangabang kandan;
migpangananey sikandan keykew Magbebaye ne Manama piru ware nu sikandan tabaka.
42 Inlupet ku sikandan iling te alinepung ne eglayap te kalamag.
Intamisak ku sikandan iling te basak diye te dalan.
43 Inluwas a nikeykew puun te migribildi ne keet-etawan ku;
inggimu a nikeykew ne pangulu te me nasud.
Ne migpasakup keddi ka me etew ne ware ku neileyi.
44 Mesi egkarineg ad te me lapu,
eglangkeb sikandan wey egtuman te suhu ku.
45 Nenaawaan sikandan te kabulut,
wey migmanlihawang sikandan puun te immangelesan dan ne impangelkel.
46 Manekal ka, Magbebaye ne Manama.
Egdayanen ka se egpaandilungan§ Te Hibruwanen: batu. ku.
Egsayeen ku sikeykew Manama ne talagluwas ku.
47 Ne sikeykew Manama ka migsuli te seeye se me kuntere ku,
wey impasakup nu keddi ka nalein-lein ne me tribu.
48 Impariyu a nikeykew puun te seeye se eg-ehet keddi.
Impatalu nu keddi ka me kuntere ku,
wey inluwas a nikeykew puun te me etew ne mabbulut.
49 ✡ Rum 15:9.Purisu ka langun ne nasud ne nasakup ku egpakarineg te pegdayan ku keykew Magbebaye ne Manama,
wey eg-ulahingan ku ka mabantug ne ngaran nu.
50 Impepanalu a layun nikeykew se in-alam nu ne Hari.
Kene egkabalbalawan ka geyinawa nu keddi, Dabid,
wey te kabuhalan ku te ware egtamanan.