30
Ka peg-ampu te pegpasalamat
Ka ulahingen ni Dabid para te peghalad te timplu.
1 Egdayanen ku sikeykew, he Magbebaye su impangabangan e ma nikeykew,
wey ware nu tuhuti ne egkatalu a eyew kene egpakabaleybaley ka egkuntere keddi.
2 He Magbebaye ne Manama ku, egpangananey a keykew,
wey imbawian a nikeykew.
3 Impaawa a nikeykew puun te inged te me minatey,
wey inluwas a nikeykew puun te seeye se iglebeng e.
4 Sikaniyu se keet-etawan te Manama,
ulahing kew te pegdayan te Magbebaye,
wey pasalamat kew su matulus sikandin.
5 Mahaan de sikandin egkeulian ka egkabelu,
piru kene egkataman ka keupiya rin.
Egkalaggew ki buwa te marusilem,
piru egkahale kid te pegsile te aldew.
6 Sikeddiey, egpakakahi a te kena ad egkamenu,
su immatubung a nikeykew.
7 Imbulihan a nikeykew he Magbebaye,
wey migmanekal a.
Piru te in-engkeran ad nikeykew,
nabantalan ad wey naaldek.
8 Egpangumew a keykew, he Magbebaye,
wey egpeyimmimenew a keykew Manama.
9 “Nekey‑a ka karuan ke egpatey a,
wey nekey‑a ka egkaangey ku ke iglebeng ad te tane?
Egdayanen ke naa te alinepung?
Egpakapangguhud naa sikandan te egkasalihan ka?
10 Pammineha a, he Magbebaye wey ikeyid‑u a.
Magbebaye bulihi a ubag.”
11 Insaliyuwan nu te kahalaan wey pegsayew ka pegpandalawit,
wey inluung nu ka saku* Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale. ne insaluub ku wey impakumbalaan a nikeykew te kahalaan.
12 Purisu kena a egpeeneng-eneng de;
eg-ulahing a te pegsaye keykew.
He Magbebaye ne Manama ku, egpasalamatan ku sikeykew,
te ware egtamanan.
*30:11 Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale.