32
Ka pegpangguhud te sale wey pegpasaylu
Ka ulahingen* Te Hibruwanen: “maskil”, ngaran buwa seini te klasi te ulahingen. ni Dabid.
1 Keupianan te etew ne impasaylu e te mareet ne neyimu rin,
wey inlingawan e ka me sale din.
2 Keupianan te etew ne warad sumsumana te Magbebaye ka sale din,
wey keupianan din te kene ne limbungen.
3 Te ware e pad migpangguhud te sale ku,
migmahuya ad wey hendue te warad tul‑an ku.
Su eglarey e re te aldew ka egpakareg-uy.
4 Tenged su tabid e naan de nikeykew eglasaya,† Te Hibruwanen: mabehat ka belad nu kayi te keddiey.
tagse aldew wey marusilem.
Naawaan ad te keseg iling te narampil te meinit.‡ Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
5 In-angken kud ka sale ku keykew,
wey ware ku iheles ka neyimu ku ne mareet.
Migkahi a te geyinawa ku,
“Igpangguhud ku te Magbebaye ka mareet ne neyimu ku”,
wey impasaylu ad nikeykew te me sale ku.
6 Purisu eleg de iya ne eg-ampu keykew seeye se migpamakey keykew,
taheed te egkaparaniyan ke pad.
Su emun ke eggingume e ka masumpit ne aldew iling te baggiyu,
kene sikandan egkabaggiyuwan.
7 Sikeykew ka helesanan ku wey impangabangan a nikeykew te timpu te kalised.
Impalibulungan a nikeykew te panagyawan te me etew ne nahale-gale tenged te kaluwasan.
8 Kahi nu, “Egpanuluen ku sikeykew te dalan ne egbayaan nu.
Egtambahan ku sikeykew wey egtantanuran ku sikeykew.
9 Kene ka iling te kudde wey ke mula§ Te Hibruwanen: ka mula, anak te lukes ne asnu wey te beyan ne kudde. naa ne kene egtulik,
ne egkeilangan pad te baras wey kakang eyew egkahalungan.”
10 Masulug ka igkalaggew te me etew ne mareet se hinimuwan,
piru ka migsalig te Magbebaye, egpakaheram te geyinawa rin ne kene egkabalbalawan.
11 Purisu gale-gale kew se matareng ne me etew tenged te inggimu te Magbebaye.
Panguleyi kew se me meupiya se pusung tenged te kahale niyu diye te Manama.
*^ Te Hibruwanen: “maskil”, ngaran buwa seini te klasi te ulahingen.
†32:4 Te Hibruwanen: mabehat ka belad nu kayi te keddiey.
‡32:4 Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
§32:9 Te Hibruwanen: ka mula, anak te lukes ne asnu wey te beyan ne kudde.