40
Ka ulahingen te pegdayan te Manama
Ka ulahingen ni Dabid para te pangulu te mangngulahing.
1 Migpallateng a te Magbebaye wey wara a napeleyi,
wey indineg nikandin ka pegpangananey ku.
2 Insalukagmit a nikandin puun te makaaldek-haldek ne lungag,
wey inggeun a nikandin te lasak-lasak.
Impasasindeg a nikandin te dakel ne batu,
eyew maresen ka pegsasindeg ku.
3 Impanulu a nikandin te iyam ne ulahingen,
ka ulahingen te pegdayan te Manama ta.
Masulug ne me etew ka egkita wey egtahud te Manama,
wey egsalig sikandan te Magbebaye.
4 Keupianan te etew ne egsalig te Magbebaye,
wey kene eg-aput te me hambuhen wey me ubaten.
5 Ware egpekeiling keykew, he Magbebaye ne Manama ku.
Masulug ka nangimu nu ne me kein-inuwan,
wey hentew‑a ka egpakahuhud te puhawang nu kanami.
Kene ku egkaamin te egpangguhud ka langun,
su dakel amana seini ne pangguhuren.
6 Kene ka egkeupian te igmanubad wey minsan nekey ne ighalad.
Kene ka egbuyu te igpanubad ne egtutungen wey te igpanubad te sale.
Piru imbulihan a nikeykew ne egkarineg ka laheng nu wey egkatuman seini.
7 Sikan naa ka nakakahi a,
“Sein e red wey egtuman a te suhu ne nasulat te linulun ne Kasulatan meyitenged keddiey.
8 Igkeupii ku ne egtuman te igkeupii nu Manama ku.
Nakatahu* Te Hibruwanen: nakasulat. e te pusung ku ka balaud nu.”
9 Impangguhud kud ka mateles ne guhuren meyitenged te keupiya nu diye te masulug ne keet-etawan.
Nakanengneng kad, he Magbebaye ne kena a egkabalabahan ka egpangguhud diye te kasuluhan.
10 Ware ku iheles kayi te pusung ku ka keupiya nu,
su impangguhud ku ne meupiya ka wey egkasalihan ka.
Ware ku iheles ka geyinawa nu ne kene egkabalbalawan wey ka kamalehetan meyitenged keykew,
su impanengneng ku seini diye te masulug ne me etew.
11 He Magbebaye, kena a balahara wey ikeyid‑u a nikeykew.
Bantayi a layun pinaahi te geyinawa nu ne kene egkabalbalawan wey te kamalehetan.
12 Su egsalerep a te dakel ne keyirapan,
wey subla ne dakel ka me sale ne migbukus keddi wey kena ad egpakakita.
Ka me sale ku, masulug pad du te bulbul ku,
sikan naa ka mahuye e ka pusung ku.
13 Luwasa a he Magbebaye.
Mahaan ka ka egbulig keddiey.
14 Egkeyilawan perem seeye se eglelalis ne eggimatey keddiey,
wey egkaruruhu perem sikandan langun.
Ne egpakalibed perem seeye se egdereet keddiey,
wey egkalueran te eggimuwen dan.
15 Egkasuhey perem seeye se egdali-di keddiey,
puun su egkeyilawan sikandan te eggimuwen dan.
16 Piru egkahale-gale perem seeye se eg-aput keykew.
Egpasalamat perem layun seeye se inluwas nu,
wey egdayan ne egkahi, “Maresen ka Magbebaye!”
17 Sikeddiey, egkaayu-ayu a wey ware egkeyimu,
piru intantanuran a nikeykew, he Magbebaye.
Sikeykew ka talagbulig wey talagluwas ku.
Dagdahawi ad te egluwas Manama ku.