55
Ka peg-ampu te etew ne in-akalan te alukuy
Ka ulahingen* Te Hibruwanen: “maskil”, ngaran buwa seini te klasi te ulahingen. ni Dabid para te pangulu te mangngulahing ne egbalesen te intagpesan te me instrumintu.
1 Pammineg ka, he Manama te peg-ampu ku,
wey linga-linga ka te pegpangananey ku.
2 Pammineha a wey tabaka a.
Kena ad e egpekegteil ka egkabantalan,
wey egpakareralu ad
3 puun su mahulub ka kuntere ku ne eglelalis keddiey,
wey puun te pegbayad-bayad te me etew ne mareet se hinimuwan.
Insamuk a nikandan wey indumutan.
4 Egkeenat-henat e ka pusung ku te liyas,
wey naaldek-haldek a ne egpatey.
5 Imbaluyan ad te liyas wey egpangelkelen ad,
wey egkaaldek e re due.
6 Nakakahi a te emun ke duen de iya pakpak ku iling te selepati,
ne eglayang ad diye te mariyu eyew egpekeyimeley a.
7 Uya iya eggendiya ad te mariyu ne inged,
wey diyad eg-ugpe te disirtu.† Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
8 Eg-iyal-iyal a ka egpamitew te egkeelesan ku,
eyew kena a egkakita te me kuntere ne egpekeiling te manekal ne kalamag.
9 He Magbebaye ne Manama, dereeti nu sikandan wey libeha nu,
su neelin naan de ne karereetan wey kalasayan ka egkakita ku te siyudad.
10 Egsingaldew sikandan wey egsarukilem ka eglingut-lingut te batu ne alad te siyudad ne matikang wey makepal,
wey neelin naan de iya ne mareet wey kasamuk ka egkeyitabu te siyudad.
11 Kenad egkataman ka pegdereet dan te minsan hendei,
ka pegpanleig-leig dan, wey ka pegpanlimbung dan diye te siyudad.
12 Emun ke iyan de eglemet keddi ka me kuntere ku,
egkaantus ku red.
Emun ke iyan de egtampele keddi ka eg-ehet keddiey,
kaayun ded ne eggelesan ku sikandin.
13 Piru sikeykew pad iya mule se duma ku,
ne amana ku pad ne alukuy ka egpanampele keddi.
14 Amana key ne egpaal-alukuyey dengan,
wey egparumdumeey peendiye te timplu duma te kasuluhan.
15 Egkatigtigkanan perem egpamatey ka egkuntere keddi,
wey eggendiyad te inged te me minatey minsan mannekal re due.
Ne ka maddeet ne egpangimuwen dan,
egpakaruma re perem kandan te iglebeng.
16 Piru egpangananey a te Magbebaye,
wey egluwasen a iya te Manama.
17 Tagse marusilem, maselem, wey maapun, egpangananey a wey egsagsahukul,
wey egpamminehen din iya ka iglalag ku.
18 Egluwasen a nikandin wey egpangabangan te pegpakigkuntere ku,
su masulug ka egpakig-ehet keddiey.
19 Egpamminehen a te Manama ne mighari te ware egtamanan,
egtaluwen din sikandan tenged su kene sikandan egbalew-balew te batasan dan,
wey kene egtahud te Manama.
20 Ka alukuy ku dengan, mig-ehetan din e degma ka me alukuy rin,
wey insupak din e ka kasabutan dan te me alukuy rin.
21 Meupiya sikandin ne eglalag wey kene ne malangit,
kunaleg te egkalanglangetan bes e ka pusung din.
Egpekeiling te mewumel-wumel ka lalag din,
piru egpakapasakit te geyinawa iling te mahalang ne ugpit.
22 Isalig nu te Magbebaye ka igkabehati nu,
wey egbulihan ka nikandin.
Kene egbalaharen te Manama ne egkareetan ka me matareng.
23 Piru ka me mabbulut wey ka me limbungen,
igdegpak din diye te maralem ne lungag.
Kene de egpakatenge sikandan te kalayat te umul ran,
piru egsalig a mule te Manama.