69
Ka pegpangananey
Ka ulahingen ni Dabid para te pangulu te mangngulahing ne eg-ulahingen iling te peg-ulahing te “Me Liryu.”
1 Luwasa a, he Manama su hendue te egkaleplep ad e.
2 Hendue te egkatanled ad te basak ne maralem,
wey ware egkariekan ku.
Hendue te naleplep ad te maralem ne weyig,
wey nalened ad te dakel ne baggiyu.
3 Napelaan ad e ka egsinehew,
wey masakit e ka abelengan ku.
Egmarusilem e ka pegtengteng ku te egtetahad,
te bulig te Manama ku.
4 Masmasulug pad te bulbul ku seeye se eg-ehet keddiey te ware egpuunan.
Maddesen seeye se egkeupian ne egdereet keddiey,
wey imbebayungan a nikandan wey impepehes a ne igpeuli kun ka tinakew ku kun.
5 Manama nakanengneng ka te keungelan ku,
nakataha ka te langun ne me sale ku.
6 Amana ne Maresen ne Manama,
kene nu ubag peyilawi ka me etew ne migpallateng wey migparani keykew tenged keddi.
7 Tenged keykew ne intampela a wey inlemetan,
wey natamtamanan ad napeyilawi.
8 Hendue te wara a neila te me karumaan ku,
wey hendue te lerew a ne etew te me suled ku.
9 Tenged te amana ne dakel ka geyinawa ku te timplu nu, egdereetan ad.
Sikeddi ka nasakitan te peglemet dan keykew.
10 Ke egsinehew a wey egpuasa,
nasi e re iya nikandan egpeyilawi.
11 Emun ke egsaluub a te saku ka eglungku,
eg-id-iranen a nikandan.
12 Eg-id-iranen a te me etew ne egpaminpinnuu te gumawan te siyudad,
wey egsusumpaliten ad te me talewubug.
13 Piru diye e re mule te keykew eg-ampu, he Magbebaye.
Mig-iman-iman a ne egginguma red ka timpu,
ne egtabaken e red nikeykew te peg-ampu ku Manama,
su ka geyinawa nu kene egkabalbalawan wey egkasalihan ka ne talagluwas.
14 Kena a balahara ka egpakalebeng te basak.
Pangabangi a puun te me kuntere ku wey puun te maralem ne weyig.
15 Kene nu ituhut ne egkalened a te weyig,
wey egleplep te maralem ne weyig,
wey ke egpakatalu naa te lungag.
16 Tabake e red, he Magbebaye,
su meupiya ka wey kene egkabalbalawan se geyinawa.
Linglinge e red Manama,
su amana ka ne hiid‑uwen.
17 Kene ka heles keddi te suluhuanen nu su egkalasey ad seini,
mahaan ka wey tabaka ad nikeykew.
18 Parani ka keddi wey luwasa a,
luwasa a puun te me kuntere ku.
19 Nakanengneng ka ke immenu a te peglemet,
pegpeyilew, wey pegbaley-baley.
Nakanengneng ka te langun ne egkuntere keddi.
20 Nasakitan ka pusung ku te pegpeyilew ran keddi,
wey naawe e ka kabagget te geyinawa ku.
Mig-iman-iman a ne due egkeyid‑u keddi,
piru warad iya sabeka.
Migpallateng a te egpakaliwang keddi,
piru warad iya sabeka.
21 Inggiluwan dan ka egkeenen ku,
wey te namaraan a, impeinum a nikandan te suka.
22 Egsahap perem sikandan ka egsahakeen,
wey egkahule taheed te egmanggimeley.
23 Egkabbutud perem sikandan wey kenad egpakakita,
wey layun naan de sikandan egkelkela te liyas.
24 Ipaneem-neem nu kandan ka belu nu,
wey ipeuma nu kandan ka egmangebel-ebel ne langet nu.
25 Egkeengkeran dan e perem ka inged ne in-ugpaan dan,
wey warad mahinged te me leeb dan.
26 Su imbaybayaran dan ka me etew ne indusaan nu,
wey intingkulan dan ka napaddel e.
27 Pegtimtimula nu ka igdusa nu kandan,
wey kene nu sikandan balahara ne kene egkewukuman.
28 Awaa nud ka me ngaran dan,
diye te libru ne insulatan te neneuyag pad.
Kene nu sikandan ilagkes ilista te me matareng.
29 Imbaybayaran a wey nasakitan.
Purisu luwasa a Manama wey ipariyu a te karereetan.
30 Eg-ulahing a ka egdayan te ngaran te Manama.
Egbantuhen ku sikandin wey egpasalamatan.
31 Egpakapahale seini te Magbebaye ne Manama,
subla pad te natimman ne baka ne igpanubad.
32 Emun ke egkakita seini te egkengaayu-ayu, egkahale sikandan.
Sikaniyu se eg-aput te Manama, kahale kew wey kabagget kew.
33 Su egpamminehen te Magbebaye ka egkaayu-ayu,
wey kene din eg-ang-anggaan ka keet-etawan din ne nenaprisu.
34 Egdayanen sikandin te langun ne diye te langit,
wey ka langun ne diye te tane wey te dahat egsaye kandin.
35 Su egluwasen te Manama ka Hirusalim,* Te Hibruwanen: Siyun. Sabeka seini te me ngaran te Hirusalim.
wey igpasasindeg din ded ka me siyudad diye te Huda.
Eg-ugpe diye ka keet-etawan din wey sikandan e ka kamuney te in-ugpaan dan.
36 Ne iyan e egpakakamuney te sika ne inged,
ka me kabuhalan te me suluhuanen din,
wey ka egpekeugpe dutu seeye se miggeyinawa kandin.