71
Kena a engkeri ke warad keseg ku
1 Duen a te keykew eg-aput, he Manama.
Kena ad iya ubag peyilawi te duma.
2 Pangabangi a wey luwasa a su matareng ka.
Pammineha a wey luwasa a.
3 Sikeykew ka batu ne egpaalindungan ku,
wey sikeykew layun ka aputanan ku.
Migsuhu ka ne egluwasen a su sikeykew ka alindunganan ku ne batu wey malig‑en ne helesanan.
4 Luwasa a, he Manama ku puun te mareet ne me etew,
ipaawa a su nahen-genan a te mabbulut wey bahani ne me etew.
5 Su sikeykew re ka egkapallatengan ku Manama;
migsalig a keykew Magbebaye minsan te bate e pad.
6 Te sikan e pad iya neetew ne migsalig ad keykew.
Sikeykew ka migpalesut keddi te aanakan te iney ku.
Egdayanen ku sikeykew te ware egtamanan.
7 Neyimu a ne panunggilingan te duma,
uya su sikeykew ka maresen ne aputanan ku.
8 Egkeupian e naan de iya ne egdayan keykew,
minsan egkaapunan ne egsaye te keykew ne katelesan.
9 Kena a ubag ang-anggei ke buyag ad e;
kena a balahara ke kena ad egpekeeleg.
10 Su egmahuhurey ka me kuntere ku meyitenged keddi,
wey migmasabsabutey seeye se egdereet keddi.
11 Migkahi sikandan, “Imbalahad e sikandin te Manama.
Eglupuhen tad sikandin wey egdakepen ta,
su nabalahad e sikandin wey warad egpakapangabang.”
12 He Manama kene ka pariyu keddi.
He Manama ku, keiyal ka ka egbulig keddi.
13 Egkeyilawan perem ka egbayung keddiey wey egkahule.
Eglemetan perem wey egkeyilawan ka egkeupian ne egpasakit keddi.
14 Piru egparahas-dahas a ne egpallateng keykew.
Ne egkanasnasian e re iya ka egsaye keykew.
15 Igpangguhud ku layun ka meupiya ne me himu nu—
ka pegluwas nu te keet-etawan nu
minsan ke masulug ka kene ku igpakahuhud.
16 Eggendiya a te me etew wey igpangguhud ku ka kein-inuwan ne me himu nu.
Iyan ku re igpangguhud ka keupiya nu.
17 Impanulu a nikeykew, he Manama puun te bate e pad,
wey egpabulus e pad ne egpangguhud meyitenged te kein-inuwan ne me himu nu.
18 Ne minsan ke egkabuyag ad wey ke eg-ubanen e,
kene e red balahara nikeykew Manama,
taman te igpakapangguhud kud ka karesen nu te seup ne kabuhalan,
wey igpakanangen kud ka geem nu kandan.
19 Kene egkaseked ka keupiya nu su egmanimpa-timpa te langit.
Hentew naa ka egpekeiling keykew Manama te amana ne kein-inuwan se egmangimuwen?
20 Minsan impaneem-neem a nikeykew te dakel ne keyirapan wey kalasayan,
egbehayan e red nikeykew te kanekal.
Egpekeiling a te etew ne inlebeng e,
ne eg-uyahen* Te Hibruwanen: igpaampew. nu red man‑e.
21 Egpabantuhen a amana nikeykew,
wey egliwangen a man‑e nikeykew.
22 Egpangelit a te alpa ka egdayan keykew,
su egkasalihan ka Manama.
Egbalesen ku te lira ka ulahingen ku keykew,
Matulus ne Manama te Israil.
23 Egkuleyi a tenged te kahalaan,
wey eg-ulahing a te pegdayan keykew,
tenged te pegluwas nu te umul ku.
24 Igpangguhud ku te langun ne timpu ka keupiya nu te pegbulig keddiey,
su neyilawan wey nalibeg ka me etew ne egpasakit keddiey.