76
Egkareeg te Manama ka me kuntere din
Ka ulahingen ni Asap para te pangulu te mangngulahing ne egbalesen te intagpesan ne me instrumintu.
1 Neilaan ka Manama diye te Huda;
mabantug ka ngaran din diye te Israil.
2 Diye sikandin mig-ugpe te Bubungan ne Siyun ne diye te Hirusalim.
3 Ne diye, egpanggepuen din ka me tunud te me kuntere
ne egkilap de ne igpane.
Egdereetan din degma ka me kalasag, me kampilan,
wey ka duma pad ne me panganiban.
4 Amana ka ne maresen Manama,
subla ke pad ne mateles te bubungan ne panganupanan.* Te Hibruwanen: bubungan ne nakarawi.
5 Impangahawan nu ka me bahani te impangahew ran degma ne me kasangkapan.
Nammatey sikandan langun ne ware iya nakapanimbulut.
6 He Manama ni Hakub, kasabeka nu re sikandan balukani,
wey namatey e ka migpangudde wey ka kudde.
7 Sikeykew Manama, igkaaldek ka iya.
Emun ke egkabelu-belu ka,
ware egpakaatu keykew.
8 Diye ke re te langit miglalag ka eggukum.
Naalatan ka langun ne me etew wey ware weilan,
9 te migsasindeg kad Manama ka eggukum,
eyew egluwasen ka langun ne mapariralem te minsan hendei ne inged.
10 Malehet iya ne egkasaye ka,
ke egkabelu ka te me etew.
Ne ware nu pad iamin ipapitew ka langet nu.
11 Sesaad kew te Magbebaye ne Manama niyu,
wey tumana niyu ka igsaad niyu.
Ka langun ne mig-ugpe te marani,
egpeuyanen te igdasag te Manama ne eleg ne igkaaldek.
12 Egpegnelen din ka me pangulu ne mapegpeggasal,
igkaaldek sikandin te me Hari te minsan hendei ne inged.