79
Ka peg-ampu te kaligwangan te nasud
Ka ulahingen ni Asap.
1 Manama, inlusuran te me mahinged te duma ne inged ka inged te keet-etawan nu.
Inlinditan dan ka matulus ne timplu nu,
wey intamtamanan dan te egguhus ka Hirusalim.
2 Impakeen dan e te me bayaku ka nammatey ne me suluhuanen nu,
wey insunggud dan e te me mahintalunan ka me lawa te me etew ne migtuman keykew.
3 Egpekeiling e te weyig ne egtulayas ka langesa,
te seeye se nangimatayan diye te Hirusalim.
Nekeempet ka minatey te Hirusalim,
wey warad nasame ne egpakalebeng kandan.
4 Inlelemetan key wey impeyilawan te me sumbaley ney,
wey imbaley-baley key te me etew diye te duma ne inged.
5 He Magbebaye, ken‑u egkataman seini?
Egparahas-dahas ke naa ne egkalangetan kanami te ware egtamanan?
Ken‑u egkataman ka egpangebel-ebel e ne langet nu te pegpangalikud nu?
6 Ipaneem-neem nu ka langet nu te me nasud ne kene eg-ila keykew,
wey ipakita nu ka kabulut nu te me migharian ne kene eg-umew keykew.
7 Su inggule dan ka me kabuhalan ni Hakub,
wey indereetan dan ka in-ugpaan dan.
8 Kene key dakeseli te me sale te kabuybuyahan ney.
Keiyal ka ubag wey ikeyid‑u key e,
su amana key e nabaybayari seini.
9 Bulihi key, he Manama su sikeykew ka talagpangabang ney.
Luwasa key eyew egkakita ka keykew ne karesen.
Pangabangi wey awaa nud ka me sale ney eyew egkabantug ka ngaran nu.
10 Mania te eg-insaan key te duma ne me nasud ne egkahi,
“Hendei naan e ka Manama niyu?”
Ipakita nu kanami wey te me nasud ne egsulian nu ka miggimatey te me suluhuanen nu.
11 Pammineg ka te mapeit ne ngangangan te me pinirisu.
Ipakita nu ka dakel ne karesen nu te pegpalihawang,
te seeye se inggukuman e ne eggimatayan.
12 Sulii nu te kapapitu ka me sumbaley ney,
ne miglemet keykew Magbebaye.
13 Ne sikanami se keet-etawan nu ne iling te me karniru ne impalayud nu,
egpasalamat key layun keykew te ware egtamanan.
Igpangguhud ney ka pegdayan ney keykew te me kabuhalan ney keureme.