86
Ka dakel amana ne geyinawa te Manama
Ka peg-ampu ni Dabid.
1 He Magbebaye pammineha a nikeykew wey tabaka a nikeykew,
su egkaayu-ayu a wey warad iya egkeyimu.
2 Luwasa a nikeykew puun te kamatayen su migpalintutuu a te Manama.
Luwasa a nikeykew se suluhuanen nu, su migsalig a keykew.
Sikeykew ka Manama ku.
3 He Magbebaye ikeyid‑u a nikeykew,
su eglarey e re te aldew ka egpangananey keykew.
4 He Magbebaye, baggeta nu ka pusung ku eyew egkahale ka suluhuanen nu,
su due te keykew eg-aput ka geyinawa ku.
5 Su meupiya ka, he Magbebaye wey mahaan egpasaylu,
kene egkabalbalawan ka geyinawa nu te seeye se egpangananey keykew.
6 Pammineha a, he Magbebaye te peg-ampu ku,
pammineg ka te pegpangananey ku.
7 Te aldew ne due samuk ku, egpangumew a keykew,
su egtabaken a iya nikeykew.
8 Ware egpekeiling keykew te minsan hentew ne me manama,
he Magbebaye, ware egpekeiling te keykew ne hinimuwan.
9 Egparani keykew ka langun ne me etew te minsan hendei ne me nasud,
wey egsimba sikandan keykew Magbebaye.
Egbantuhen dan ka ngaran nu.
10 Su amana ka ne maresen wey egpekeyimu te me kein-inuwan.
Sikeykew re iya ka Manama.
11 Panulua a Magbebaye te igkeupii nu ne eggimuwen,
eyew egpekeikul a te kamalehetan.
Sabekaa nu ka geyinawa ku ne egtahud keykew Manama.
12 Egpasalamat a te intiru ne pusung ku keykew Magbebaye ne Manama ku.
Egbantuhen ku ka ngaran nu te ware egtamanan.
13 Su dakel ka geyinawa nu keddiey ne kene egkabalbalawan.
Inluwas nu ka umul ku diye te inged te me minatey ne amana ne maralem.
14 He Manama eglelalisan a te eglusud te hambuhen,
senge-luyuran te me etew ka egbebantak ne eggimatey keddi.
Ware sikandan nekeila keykew.
15 Piru sikeykew Magbebaye, hiid‑uwen ka wey hiimenawen,
kene ka mahaan egkabelu Manama,
wey kene egkabalbalawan ka dakel ne geyinawa nu wey layun egkasalihan.
16 Lilingey ke red keddi wey ikeyid‑u a.
Behayi a te kanekal se suluhuanen nu,
wey luwasa nu ka anak te suluhuanen nu ne malitan.
17 Papitawa a te palinneu ne egbulihan a nikeykew,
eyew egkeyilawan seeye se eg-ehet keddiey,
su egbulihan e ma wey egliwangen a nikeykew.