92
Ka ulahingen te pegsaye
Ka ulahingen ne eg-ulahingen te Aldew te Peggimeley.
1 Meupiya naan de iya ka egpasalamat keykew, Magbebaye ne Manama,
wey eg-ulahing te ngaran nu, he Amana ne Mabantug ne Manama.
2 Meupiya naan de iya ka egpangguhud meyitenged te geyinawa nu ne kene egkabalbalawan,
wey te pegkamatinumanen nu te tagse aldew wey marusilem,
3 duma te dahing te egpangeliten ne instrumintu,
wey te lagtingen te alpa.
4 Nakapahale keddiey, he Magbebaye, ka maddesen ne me himu nu,
wey mig-ulahing a te pegkahale tenged te inggimu nu.
5 Kein-inuwan ka me himu nu, he Magbebaye!
Amana ne maralem ka suman-suman nu!
6 Kene seini egkasabut te egmambusawen,
wey te me etew ne kene egmanulik.
7 Ne minsan pad egpanulin iling te hilamunen ka me etew ne mareet se hinimuwan,
wey egmatubung ka me etew ne mareet se hinimuwan,
egkatamtamanan ded iya sikandan egkareeti.
8 Tenged su sikeykew, he Magbebaye, ka labew te langun te ware egtamanan.
9 Nakataha key ne egpatey ka me kuntere nu, he Magbebaye ne Manama,
wey egkengatalu ka langun ne me etew ne mareet se hinimuwan.
10 Piru imbehayan a mule nikeykew te kanekal iling te kanekal te mahintalunan ne turu ne baka,
wey in-itisan a nikeykew te tetelesi ne lana.
11 Nakita kud ka me kuntere ku ne nenatalu,
wey narineg kud ka kuleyian te me etew ne mareet se hinimuwan.
12 Egmatubung ka matareng ne me etew iling te kayu ne palmira,
wey egtulin sikandan iling te sidar ne kayu diye te Libanun.
13 Iling sikandan te me kayu ne impamula diye te baley te Magbebaye;
egtulin sikandan diye te timplu te Manama ta.
14 Egpamehas pad minsan buyag e sikandan;
layun sikandan ne malapung wey malig‑en.
15 Palinneu seini ne matareng ka Magbebaye,
ne ware iya igkarew‑ey te talagpangabang ku.