96
Ka pegsaye wey peg-ulahing te Manama
(1 Kru. 16:23-33)
1 Ulahing kew te iyam ne ulahingen diye te Magbebaye,
ulahing kew langun se intiru ne kalibutan.
2 Ulahing kew diye te Magbebaye,
dayana niyu ka ngaran din.
Ipangguhud niyu ka pegluwas din tagse aldew.
3 Ipanengneng niyu te duma ne me nasud ka katelesan din,
inangen niyu diye te langun ne me etew ka kein-inuwan ne me himu rin.
4 Su maresen ka Magbebaye,
likes iya sikandin ne egdayanen.
Eleg iya sikandin ne igkaaldek te langun ne me maddesen.
5 Su ka me manama te duma ne me nasud, me diyus-diyus de,
piru iyan mule miggimu te langit ka Magbebaye.
6 Diye egkakita te tangkaan din ka katelesan wey ka karesen din,
diye egkakita te ugpaan din ka kanekal wey keupianan.
7 ✡ Sal 29:1-2.Dayana niyu ka Magbebaye,
sikaniyu langun se me taltalaanak.
Ibehey niyu te Magbebaye,
ka katelesan wey ka kanekal.
8 Ibehey niyu te Magbebaye ka katelesan,
ne eleg iya te kandin ne ngaran.
Dasag kew kandin,
wey hendiye kew te me sinabeng din ne libulunganan.
9 Simbaa niyu ka Magbebaye puun su subla sikandin ne matulus,
ikaaldek niyu sikandin, sikaniyu se intiru ne kalibutan.
10 Kahii niyu ka duma ne me nasud, “Eghari ka Magbebaye.
Nakapabunsud te meupiya ka kalibutan,
wey kene seini egkaweil.
Eggukuman din ka me etew,
wey eg-ikulen din ka eleg ne peggukum.”
11 Egkahale ka langit, wey egmahalew ka tane.
Egdahing ka dahat wey eglalag ka langun ne egkakita diye.
12 Egsaye ka me kamet wey ka langun ne egkakita diye.
Eg-ulahing te kahale ka me kayu diye te puwalas,
13 eg-ulahing diye te tangkaan te Magbebaye.
Su eglepew sikandin ka eggukum te kalibutan.
Matareng sikandin ka eggukum,
wey egkasalihan sikandin ka eggukum te me etew.