115
Ka Manama re ka likes ne egsalihan
1 He Magbebaye, kene ne sikanami ka egkabantug;
kene ne sikanami su sikeykew ka egkabantug.
Su ka geyinawa nu kene egkabalbalawan,
wey egtumanen nu iya ka saad nu.
2 Mania te eg-insaan key mule te me mahinged te duma ne me nasud,
“Hendei naan e ka Manama niyu?”
3 Ka Manama ney diye te langit!
Eggimuwen din ka langun ne igkeupii rin.
4 Ka me diyus-diyus dan, nangimu re puun te pelata wey bulawan;
etew re ka nangimu te egsimbeen dan.
5 Due me be‑be, piru kene egpakalalag;
due me mata, piru kene egpakakita.
6 Due me talinga, piru kene egpakarineg;
due me irung, piru kene egpakaarek.
7 Due me belad, piru kene eggeram;
due me paa, piru kene egpekeyipanew,
wey kene pad man‑e egpakapanahaal.
8 Seeye se miggimu te me diyus-diyus,
egpekeiling ded te me diyus-diyus dan.
Egpekeiling ded degma te me diyus-diyus,
seeye se egsalig-salig te nangimu ran.
9 He matig-Israil, salig kew te Magbebaye;
Sikandin ka talagbulig kaniyu wey ka talagpangabang kaniyu.
10 Me kabuhalan ni Aarun, salig kew te Magbebaye;
Sikandin ka talagbulig kaniyu wey ka talagpangabang kaniyu.
11 Sikaniyu se migtahud te Magbebaye, salig kew kandin;
Sikandin ka talagbulig kaniyu wey ka talagpangabang kaniyu.
12 Nasuman-suman ki red te Magbebaye;
egpanalanginan ki red nikandin.
Egpanalanginan din ka me kabuhalan ni Israil;
egpanalanginan din ka kabuhalan ni Aarun.
13 Egpanalanginan din seeye se egtahud kandin;
egkaayu-ayu ma wey se mabantug.
14 Egpanalanginan kew te Magbebaye ne egkabuhal-buhal kew,
sikaniyu wey ka me anak niyu.
15 Egpanalanginan kew te Magbebaye,
ne iyan miggimu te langit wey te kalibutan.
16 Ka langit, kandin iya te Magbebaye,
piru imbehey rin mule ka tane diye te me etew.
17 Ka nammatey e, kenad egdayan te Magbebaye,
wey iling ded seeye se miggendiyad te keyimmelayan.* Te Hibruwanen: migtupang e diye te ware eglalag.
18 Piru sikanta se neneuyag pad, egpasalamat ki te Magbebaye,
puun kuntee te seini ne timpu taman keureme.
Egdayanen ney ka Magbebaye ne Manama!