129
Ka peg-ampu ne igpariyu te kuntere
Ka ulahingen para te pegpatakereg diye te Hirusalim.
1 Imbaybayaran a patamtamani te me kuntere ku,
puun pad te pegkabate ku.
Na kahi kew degma se me matig-Israil:
2 “Imbaybayaran key patamtamani te me kuntere ney,
puun pad te pegbunsud te nasud ney.
Piru ware key en iya natalu nikandan.
3 Neempet te me pali ka me peka ney,
wey nekeiling e seini te kamet ne indaru.
4 Piru matareng ka Magbebaye ne Manama,
wey intamped din ka peg-uripen kanami te mareet se me hinimuwan.”
5 Egkatalu wey egkeyilawan,
ka langun ne migdumut te Hirusalim.* Te Hibruwanen: Siyun. Sabeka seini te me ngaran te Hirusalim.
6 Egmekeiling sikandan te me hilamunen,
ne egmanubu diye te atep te baley ne egkalanes de te sikan pad egtubu.
7 Warad iya me talaggaani ne egpanlaglag,
wey ke egpamagkes naa te sika ne me hilamunen.
8 Warad iya egbaye diye ne egkahi te me talaggaani,
“Egpanalanginan kew te Magbebaye ne Manama!”
Ne ware degma me talaggaani ne egtabak, “Egpanalanginan kew degma te Magbebaye!”