Hinisis.
2.
Sikan naa, napenge e te eggimu ka langit wey ka kalibutan wey ka langun ne nakatahu kayi. 
Te igkapitu ne aldew, miggimeley e ka Manama su napenge e ka langun ne inggimu rin. 
Impanalanginan din ka igkapitu ne aldew wey immatulus din seini, su miggimeley e sikandin te sika ne aldew te langun ne eggimuwen din. 
Iling kayi ka guhuren meyitenged te peggimu te kalibutan wey te langit. Te peggimu te Magbebaye ne Manama te langun, 
ware pad me pinamula wey me hilamunen ne nanubu te tane, su ware din pad peurani, wey ware pad etew ne egbasuk. 
Minsan ware pad uran, piru migmakames e ka tane su duen e weyig ne migligkat diye te diralem te tane. 
Ne migkuwa ka Magbebaye ne Manama te tane wey inggimu rin ne etew. Inggiyupan din ka irung te etew te egpekeuyag ne geyinawa, wey miggeheyinawe e ka etew. 
Ne miggimu ka Magbebaye ne Manama te pinamulaan diye te Idin ne diye dapit te igsile, wey diye din ipeugpe ka etew. 
Ne impatubuan seeye te Magbebaye ne Manama te langun ne nakalkalasi ne kayu ne mateles wey meupiya ne egkeenen se behas. Diye te taliware te pinamulaan, due kayu ne egpakabehey te umul, wey due degma kayu ne egpakabehey te katuenan ke nekey ka meupiya wey ke nekey ka mareet. 
Ne due weyig ne diye mig-ulun te Idin ne nakaweyig te seeye ne pinamulaan. Ligkat dutu, migsisiyak seeye te hep‑at ne siyak. 
Ka an-anayan ne siyak, egngaranan te Pisun ne migpeendiye te inged ne egngaranan te Habila ne due bulawan. 
(Dutu ne inged egkakita ka neelin ne bulawan, mahal ne peemut ne egngaranan te birilyum, wey ka egpangilak-ilak ne me batu ne egngaranan te uniks.) 
Ka igkarangeb ne siyak, egngaranan te Gihun ne migpeendiye te inged ne egngaranan te Kus. 
Ka igkatelu ne siyak, egngaranan te Tigris ne migleus diye dapit te igsile te Asirya. Ka igkeep‑at ne siyak, egngaranan te Iyupratis. 
Ne diye ipeugpe te Magbebaye ne Manama te pinamulaan te Idin ka lukes eyew egbasuk wey egtanggu dutu. 
Migkahiyan din ka lukes, “Egkaayun ka ne egpakakeen te behas te minsan nekey ne kayu kayi te pinamulaan, 
piru kene ka keen te behas te kayu ne egpakabehey te katuenan ke nekey ka meupiya wey ke nekey ka mareet. Ke egkeen ka te behas te sika ne kayu, egkapatey ka iya.” 
Ne migkahi ka Magbebaye ne Manama, “Kene ne meupiya ne egsabsabeka seini se etew. Keilangan ne eggimuwan ku sikandin te talagbulig ne eleg kandin.” 
Sikan naa ka miggimu ligkat te tane ka Magbebaye ne Manama te langun ne me mananap wey me manuk-manuk wey impanguyan din seeye diye te etew eyew egpangngaranan sikandan. Minsan nekey ka igngaran te etew te tagse sabeka kandan, sikan en iya ka ngaran dan. 
Ne impangngaranan e te etew ka langun ne mananap, me ayam, me mahintalunan, wey me manuk-manuk. Piru ware iya nakita te etew ne eleg ne egpakabulig kandin. 
Purisu impaliplipereng te Magbebaye ne Manama ka etew. Te nakaliplipereng e sikandin, in-angey e te Manama ka gusuk din wey impakimut din ded ka pali. 
Ne inggimu rin ne malitan ka gusuk ne in-angey rin diye te lukes, wey in-uyan din e ka malitan diye te lukes. 
Te pegkakita te lukes te malitan, migkahi e sikandin, “Te! Seinid en iya ka iling keddi! Ka tul‑an din, migligkat te tul‑an ku, wey ka sapu din, migligkat degma te sapu ku. ‘Malitan’ ka ngaran din su in-angey man de ligkat te lukes.” 
Sika ka egpuunan ne eg-engked ka lukes te amey wey iney rin, wey eglunggun e sikandin te asawa rin, wey egkasabeke e sikandan se daruwa. 
Ne sikandan se alunggun, migpalawas, piru ware sikandan neyilew.