Hinisis.
8.
Te seeye ne timpu, ware ded nalingawi te Manama ensi Nuwi wey ka langun ne mananap ne duma rin diye te arka. Seeye naa, impakalamahan din ka kalibutan wey migbunsud e degma migtigkus ka weyig. 
Ne insengseng din e ka langun ne sebseb wey ka langun ne imbayaan te weyig ne diye te langit, wey migkerit e ka uran. 
Ne migpabulus migtigkus ka weyig. Te miggingume e te 150 ne aldew ka pegsipuk te weyig, 
nakasanglad e ka arka diye te me bubungan diye te Ararat te igkasapulu wey pitu (17) ne aldew te igkapitu ne bulan. 
Ne migpabulus migtigkus ka weyig taman te egkakite e ka puntul te me bubungan te an-anayan ne aldew te igkasapulu ne bulan. 
Te miglihad e ka hep‑at ne pulu (40) ne aldew, inlukatan e ni Nuwi ka bintana te arka. 
Ne dutu inlekaan din e ka sabeka ne uwak, wey miglayang-layang e seini taman te neetiyan e ka weyig. 
Nataman inlekaan e man‑e ni Nuwi ka sabeka ne selepati eyew egkanengnengan din ke mababew e ka weyig. 
Piru ware egkalatunan te selepati su maralem pad ka weyig, wey miglibed e sikandin diye ki Nuwi diye te arka. Impalatun ni Nuwi ka selepati diye te belad din wey impaseled e diye te arka. 
Ne migtetahad pad sikandin te pitu ne aldew, wey inlekaan din e man‑e ka selepati. 
Te egkasagkup e, miglibed e ka selepati ne migbange te meilem ne dewun te kayu ne ulibu! Sikan naa ka nakanengneng e si Nuwi ne mababew e ka weyig. 
Nataman migtetahad pad man‑e si Nuwi te lein ne pitu ne aldew. Ne inlekaan din e man‑e ka selepati, wey warad seini miglibed. 
Te 601 e ka idad ni Nuwi, te an-anayan ne aldew te an-anayan ne bulan, neetiyan en iya ka weyig. Ne inlekat e ni Nuwi ka atep te arka wey migpamantew sikandin. Ne dutu, nakita rin ne nammare e ka tane! 
Te igkararuwa ne pulu wey pitu (27) ne aldew te igkarangeb ne bulan, migmammare en iya ka tane. 
Ne migkahiyan te Manama si Nuwi, 
“Lihawang kew e due te arka ka taltalaanak duma te me ambey nu. 
Palihawanga nud degma ka langun ne mananap wey me manuk-manuk eyew egkabuhal wey egpekeempet kayi te ampew te tane.” 
Seeye naa, miglihawang e ensi Nuwi ka taltalaanak duma te me ambey rin. 
Ka langun ne mananap, ka me mahintalunan wey me ayam, wey ka langun ne me manuk-manuk, nanlihawang e degma te arka sumale te kandan ne klasiyan. 
Ne miggimu si Nuwi te altar ne eg-unturan te egtutungen ne mananap, wey mig-angey sikandin te langun ne klasi te mananap wey manuk-manuk ne in-isip ne malinis. Intutung din seeye diye te altar isip igpanubad diye te Magbebaye ne Manama. 
Te naarek e te Magbebaye ne Manama ka lansi, nahale sikandin wey migkahi diye te geyinawa rin, “Kene kud en iya egdilusen ka tane tenged te neyimu te me etew, minsan ke mareet iya ka suman-suman dan ligkat te bate pad sikandan. Kene kud e egguleen ka langun ne eggeheyinawa, iling te neyimu ku. 
“Taheed te duen pad kalibutan, Duen pad timpu ne egpakapamula wey egpakahaani, Due timpu ne maagsil wey due timpu ne meinit, Due degma timpu ne eggulabung wey due degma timpu ne eglengleng, Due maaldew wey due marusilem. Seini se langun, kene egkataman.”