Hinisis.
11.
An-anayan, sabeka re ka linalahan te me etew kayi te ampew te tane. 
Te nangalin e ka me etew ne egpuun diye te igsile, nekeuma sikandan diye te maluag ne napu ne egngaranan te Sinar wey diyad e sikandan nangugpe. 
Ne migpalalahey sikandan ne miggenendue, “Eggimu ki te siyudad ne due titikangi ne baley ne egpekeuma diye te langit eyew egmabantug ka ngaran ta, wey eyew kene ki egmekegsuwey-suwey kayi te ampew te tane. Egpangimu ki te tisa ne egdalapen ta te hapuy eyew egmakehal.” Sikan naa ka migpangimu e sikandan te me tisa wey migkuwa te piket eyew egpegdeketen dan ka me tisa. 
Ne migpamaneug ka Magbebaye ne Manama eyew egleuy te siyudad wey te baley ne titikangi ne eggimuwen te me etew. 
Ne migkahi ka Magbebaye ne Manama, “Pitew kew! Nasabeka ka seini ne me etew wey sabeka re ka linalahan dan. Ne seini se inggimu ran bunsuranan pad te egpangimuwen dan. Kene egkaluhey, egpekeyimu e sikandan te langun ne igkeupii ran. 
Na,” kahi te Magbebaye ne Manama, “egpamaneug ki eyew egpegsewuhen ta ka linalahan dan eyew kene egpekegsabutey sikandan.” 
Sikan naa ka impegsuwey-suwey e sikandan te Magbebaye ne Manama kayi te intiru ne kalibutan wey ware dan e nakabulus ka eggimu te siyudad. 
Purisu Babil ka ngaran te siyudad su diye libeha te Magbebaye ne Manama ka langun ne linalahan, wey diye migligkat ne impegsuwey-suwey rin sikandan kayi te intiru ne kalibutan. 
Ne seini ka me kabuhalan ni Sim. Te miglihad e ka daruwa ne leg‑un te pegsipuk te weyig, mahatus (100) e ka idad ni Sim wey nakaanak e sikandin te lukes ne si Arpaksad. 
Nataman, neuyag pad si Sim seled te lalimma pad ne gatus (500) ne leg‑un, wey nakaanak pad man‑e sikandin te me lukes wey me malitan. 
Te tatelu e ne pulu wey lalimma (35) ka idad ni Arpaksad, nakaanak sikandin te lukes ne si Sila. 
Nataman, neuyag pad si Arpaksad seled te 403 ne leg‑un, wey nakaanak pad man‑e sikandin te me lukes wey me malitan. 
Te tatelu e ne pulu (30) ka idad ni Sila, nakaanak sikandin te lukes ne si Ibir. 
Nataman, neuyag pad si Sila seled te 403 ne leg‑un, wey nakaanak pad man‑e sikandin te me lukes wey me malitan. 
Te tatelu e ne pulu wey lalimma (35) ka idad ni Ibir, nakaanak sikandin te lukes ne si Pilig. 
Nataman, neuyag pad si Ibir seled te 430 ne leg‑un, wey nakaanak pad man‑e sikandin te me lukes wey me malitan. 
Te tatelu e ne pulu (30) ka idad ni Pilig, nakaanak sikandin te lukes ne si Riyu. 
Nataman, neuyag pad si Pilig seled te 209 ne leg‑un, wey nakaanak pad man‑e sikandin te me lukes wey me malitan. 
Te tatelu e ne pulu wey daruwa (32) ka idad ni Riyu, nakaanak sikandin te lukes ne si Sirug. 
Nataman, neuyag pad si Riyu seled te 207 ne leg‑un, wey nakaanak pad man‑e sikandin te me lukes wey me malitan. 
Te tatelu e ne pulu (30) ka idad ni Sirug, nakaanak sikandin te lukes ne si Nahur. 
Nataman, neuyag pad si Sirug seled te daruwa ne gatus (200) ne leg‑un, wey nakaanak pad man‑e sikandin te me lukes wey me malitan. 
Te daruwe e ne pulu wey siyam (29) ka idad ni Nahur, nakaanak sikandin te lukes ne si Tira. 
Nataman, neuyag pad si Nahur seled te 119 ne leg‑un, wey nakaanak pad man‑e sikandin te me lukes wey me malitan. 
Te pitu e ne pulu (70) ka idad ni Tira, nakaanak sikandin te tatelu ne lukes ne ensi Abram, si Nahur, wey si Haran. 
Ne seini ka pangguhuren meyitenged te me kabuhalan ni Tira. Si Tira ka amey enni Abram, Nahur wey ni Haran. Si Haran ka amey ni Lut, 
wey diye migpatey si Haran te siyudad ne miglesutan din ne egngaranan te Ur ne sakup te me Kaldiya. Te pegpatey rin, neuyag pad mule ka amey rin ne si Tira. 
Ne nakaasawe e si Abram ki Saray wey nakaasawe e si Nahur ki Milka ne anak ni Haran. Si Haran ka amey degma ni Iska. 
Ne si Saray, ware mig-anak su kene egpakaanak sikandin. 
Mig-awe si Tira diye te siyudad te Ur ne sakup te me Kaldiya wey induma rin ka anak din ne si Abram wey ka ambey rin ne si Saray, wey ka apu din ne si Lut ne anak ni Haran. Eggendiye perem sikandan te inged ne Kanaan, piru te pegginguma ran diye te siyudad te Haran, diyad e sikandan mig-ugpe. 
Ne diye namatey si Tira te Haran te 205 ka idad din.