Hinisis.
13.
Sikan naa ka miglibed e man‑e ensi Abram diye te inged te Nigib duma ka asawa rin wey si Lut wey ka langun ne kandin. 
Meyaman ne subla si Abram. Masalig e ka me karniru rin, me kambing, me baka, me seleppi, wey me bulawan. 
Puun te Nigib, miggalin-halin e man‑e sikandan ka eg-ugpe taman te nekeuma sikandan diye te intagtaheeran dan dengan te eg-ugpe ne elat-elat te Bitil wey Ay. 
Seeye ka inged ne miggimuwan dengan ni Abram te altar. Diye man‑e sikandin mig-ampu te Magbebaye ne Manama. 
Ne si Lut, ka migduma ki Abram, duen e degma pamilya rin wey me uripen din. Due degma me karniru rin, me kambing, wey me baka. 
Tenged te suble e ne masalig ka me ayam ni Abram ki Lut, kenad eg-eleg ka me ayam dan te palayuranan ke egpekegdani sikandan ka eg-ugpe. 
Sikan naa ka migpeehetey ka me talagtameng te me ayam ni Abram wey ka me talagtameng te me ayam ni Lut. Kenad ne eleg ka palayuranan te me ayam dan, su te seeye ne timpu diye pad degma nangugpe ka me Kanaanen wey me Pirisihanen. 
Purisu, migkahiyan ni Abram si Lut, “Kene ne meupiya ne egmeeg-ehetey ka me etew nu wey ka me etew ku tenged su anaken ku sikeykew. 
Meupiya pad ke egpasuwayey ki su maluag mem pad seini se tane ne egkaayun ne eg-ugpaan. Na, alam ka te inged ne igkeupii nu te eg-ugpe, ke igkahibang naa wey ke igkakawanan. Ke eggendiye ka te igkakawanan, eggendiya a degma te igkahibang.” 
Sikan naa ka migpamantew si Lut wey nakita rin ne masalig ka me weyig diye te napu te Hurdan taman te Suar, ne nekeiling te pinamulaan te Idin wey nekeiling degma te inged ne Ihiptu. (Te seeye ne timpu, ware pad dereeti te Magbebaye ne Manama ka Suduma wey Gumura). 
Purisu in-alam ni Lut ka langun ne napu te Hurdan wey miggipanew e sikandin peendiye te igsile. Iling due ne paahi ne nekegsuwey si Lut ki Abram. 
Si Abram, diye mig-ugpe te inged te Kanaan, wey diye mig-ugpe si Lut te marani te Suduma ne diye te me siyudad diye te napu. 
Ne ka me etew ne nangugpe diye te Suduma, amana ne maddeet wey makasesale diye te Magbebaye ne Manama. 
Te nakaligkat e si Lut, migkahiyan te Magbebaye ne Manama si Abram, “Pamantawa nu ay-ayari ka langun ne inged. 
Ka langun ne tane ne egkeumaan nu te egtengteng, igbehey kud keykew wey te me kabuhalan nu wey kaniyud e te ware egtamanan. 
Egpamasuluhen ku ka kabuhalan nu iling kasulug te alinepung kayi te ampew te tane ne kene egkaseel. 
Ne hipanew kad, leuya nu ka langun ne tane su igbehey kud keykew seini se langun.” 
Nataman, miggalin e man‑e si Abram wey diyad mig-ugpe marani te matulus ne me kayu ni Mamri diye te inged te Hibrun. Ne miggimu e man‑e sikandin te altar ne eg-unturan te egtutungen ne igbehey diye te Magbebaye ne Manama.