Hinisis.
21.
Ne impanalanginan te Magbebaye ne Manama si Sara sumale te insaad din. 
Ne nataman, naberes e sikandin wey nakaanak te lukes minsan buyag e si Abraham. Inlesut ka bate te timpu iya ne insaad te Manama. 
Ne ingngaranan ni Abraham ka anak din ki Isaak. 
Te nawaluwan e ka bate, intulian e sikandin ni Abraham sumale te insuhu te Manama kandin. 
Mahatus (100) e ka idad ni Abraham te neetew si Isaak. 
Ne migkahi si Sara, “Nahala a wey impangisi a te Manama. Egpakangisi degma ka langun ne egpakarineg meyitenged te neyitabu keddi. 
Ware etew ne nakakahi ki Abraham ne egpakapasusu e pad. Piru, nakaanak e pad te lukes minsan buyag e ka asawa ku.” 
Nataman, migtulin e ka bate. Te aldew ne eglutasen e ka bate, miggilutu te dakel si Abraham. 
Sabeka ne aldew, miglimbayan ni Ismail ne anak ni Hagar ne matig-Ihiptu si Isaak ne anak ni Sara. 
Te nakita seeye ni Sara, ingkahiyan din si Abraham, “Paawaa nu sika se malitan ne uripen duma te anak din. Kene egkaayun ne egpakakuwa te karatuan nu ka anak te sika ne uripen su si Isaak de.” 
Nalange amana si Abraham su anak din ma degma si Ismail. 
Piru migkahiyan te Manama si Abraham, “Kene ka kalaggew meyitenged te bate wey te uripen nu ne si Hagar. Himuwa nu ka ingkahi ni Sara su egligkat ki Isaak ka seeye se kabuhalan ne insaad ku keykew. 
Egbehayan ku degma te masalig ne me anak ka anak te uripen wey egnenasud e sikandan su anak nu ma degma sikandin.” 
Te maselem-selem pad te seup ne aldew, imbehayan e ni Abraham si Hagar te egkeenen wey te weyig ne nakapenu te tahuanan ne laplap te mananap. Ne impatiang din e seini ki Hagar wey impeyipanew rin e duma te anak din. Ne miggipanew e ensi Hagar wey migleug-leug e diye te disirtu ne egngaranan te Birsiba. 
Te naaminan e sikandan te weyig, in-engkeran din e ka bate diye te egdalungan te deisek ne kayu. 
Miggendiyad sikandin te kewun‑aan ne egkeumaan te egpane ka kariyu ligkat te bate. Ne diyad sikandin migpinnuu ka migsinehew wey migkahi diye te geyinawa rin, “Kena a egpakaaku ne egpipitew te anak ku ke egpatey.” 
Ne narineg te Manama ka pegsinehew te bate, wey in-umew si Hagar te panalihan te Manama ne egpuun te langit, “Hagar, nekey‑a ka igkalaggew nu? Kene ka kaaldek su narineg te Manama ka pegsinehew te bate. 
Hendiyei nud ka anak nu wey kitkita nu sikandin, su eggimuwen ku ne dakel ne nasud ka me kabuhalan din.” 
Nataman, due impakita te Manama ki Hagar ne belun. Miggendiyaan din seeye wey migsakug e sikandin wey innipenu din e ka tahuanan te weyig ne laplap te mananap wey impeinum din e ka bate. 
Intantanuran te Manama ka bate taman te migdakel e sikandin. Mig-ugpe sikandin diye te disirtu ne egngaranan te Paran wey neyimu sikandin ne mannitingen. 
Nataman, impaasawaan e sikandin te iney rin te matig-Ihiptu ne malitan. 
Te seeye ne timpu, migparumeey si Abimilik te pangulu te me sundalu rin ne si Pikul peendiye ki Abraham. Ne migkahiyan ni Abimilik si Abraham, “Imbulihan ka te Manama te langun ne eggimuwen nu. 
Purisu saad ka pinaahi te ngaran te Manama ne kena a nikeykew eglimbungan wey ka me anak ku peendiye te langun ne kabuhalan ku. Ipakita nu ka keupiya nu keddi wey kayi te inged ne in-ugpaan nu, iling te keupiya ne impakita ku keykew.” 
Migkahi si Abraham, “Uya, igsaad ku.” 
Ne insumbung ni Abraham diye ki Abimilik ka meyitenged te belun ne in-ahew te me suluhuanen din. 
Migtabak si Abimilik, “Wara a nakanengneng ke hentew ka miggimu kayi. Wara a nahud nikeykew kahii wey kunteen ku pad iya narineg seini.” 
Ne migkuwa si Abraham te me karniru wey me baka wey imbehey rin seini ki Abimilik ne miggimu e sikandan te kasabutan. 
Nataman, migkuwe e man‑e si Abraham te pitu ne beyan ne nati te karniru puun te me ayam din wey impasuwey rin e seini. 
Ne mig-inse si Abimilik kandin, “Mania te insuwey nu sika se pitu ne nati te karniru?” 
Migtabak si Abraham, “Kua nu sika eyew egpakamemalehet ka ne sikeddiey ka migkekali te seini ne belun.” 
Sikan naa ka ingngaranan te Birsiba ka seeye ne inged su diye ma sikandan migpasaarey. 
Te napenge e ka inggimu ran ne kasabutan diye te Birsiba, mig-uli e si Abimilik wey si Pikul diye te inged te me Pilistihanen. 
Ne migpamula si Abraham te kayu ne tamarisku diye te Birsiba, ne diye din e man‑e simbaa ka Magbebaye, ka Manama ne Ware Egtamanan. 
Ne naluhey pad ne mig-ugpe si Abraham diye te inged te me Pilistihanen.