Hinisis.
26.
Te seeye ne timpu, due bitil te seeye ne inged, iling te neyitabu te timpu pad ni Abraham. Sikan naa ka miggendiye si Isaak te Girara ne mig-ugpaan ni Abimilik ne Hari te me Pilistihanen. 
Ne migpakita ka Magbebaye ne Manama ki Isaak wey migkahi, “Kene ka hendiye te Ihiptu. Palunggehaat ka te inged ne egpeugpaan ku keykew. 
Kayi ke pa ugpe su egdumaan wey egpanalanginan ku sikeykew. Igbehey ku keykew wey te me kabuhalan nu ka seini ne tane ne insaad ku te amey nu ne si Abraham. 
Egpamasuluhen ku ka me kabuhalan nu ne iling kasulug te me bituen diye te langit, wey igbehey ku kandan seini se intiru ne inged. Pinaahi te kabuhalan nu, egpanalanginan ku ka langun ne nasud kayi te ampew te tane, 
su migtuman si Abraham te me balaud ku wey te langun ne insuhu ku kandin.” 
Purisu, diye mig-ugpe si Isaak te Girara. 
Te mig-insaan sikandin te me lukes ne mahinged te seeye ne inged meyitenged te asawa rin, ware sikandin migpangguhud te malehet su naaldek sikandin. Migkahi sikandin te atebey rin si Ribika su nekeisip sikandin ne kema ke eggimatayan din eyew eg-ahawen ka asawa rin, su mateles sikandin ne malitan. 
Ne mig-ugpe si Isaak diye te bayew e naluhey ne timpu. Due sabeka ne aldew ne migpamintana si Abimilik ne Hari te me Pilistihanen, wey nakita rin ne migpaleglehengey si Isaak wey si Ribika. 
Purisu, impeumew rin si Isaak wey migkahiyan, “Asawa nu bes sikandin! Mania te migkahi ka ne atebey nu sikandin?” Ne migtabak si Isaak, “Uya su naaldek a ne eggimatayan a nikaniyu eyew eg-ahawen niyu sikandin.” 
Migkahi si Abimilik, “Mania te neyimu nu seini kayi te kanami? Etuwey ke migguliran sikandin te sakup ku, nakasale key e perem ligkat ded keykew.” 
Nataman, impanpanayan ni Abimilik ka langun ne etew ne migkahi, “Minsan hentew ne egdereet te seini ne lukes wey te asawa rin, eggimatayan sikandin.” 
Ne migpamula si Isaak te seeye ne inged wey mahatus (100) ne lupi ka nahaani rin te seeye ne leg‑un, su impanalanginan sikandin te Magbebaye ne Manama. 
Naratu sikandin wey natimtimulan pad ka karatuan din taman te suble e sikandin ne meyaman. 
Migmasalig e ka me karniru rin, me kambing, me baka, wey me uripen din. Tenged due, nasekel ka me Pilistihanen ki Isaak, 
wey imbunbunan dan te tane ka me belun ne ingkali re dengan te me uripen te amey rin ne si Abraham. 
Ne ingkahiyan ni Abimilik si Isaak, “Awe kew e kayi su madmaresen kew e kanami.” 
Sikan naa ka mig-awe e si Isaak diye wey diyad e mig-ugpe te Napu te Girara. 
Due degma me belun diye ne impakaliyan te amey rin dengan ne imbunbunan e te me Pilistihanen. Ne impakaliyan din ded man‑e seeye wey impeiling din ded ka me ngaran te me belun te ingngaran dengan te amey rin. 
Te nangekali e ka me suluhuanen ni Isaak diye te napu, nakakita sikandan te sebseb. 
Piru in-ehetan sikandan te me talagtameng ne me matig-Girara wey migkahiyan te kandan kun ka seeye ne weyig. Purisu, migngaranan ni Isaak ka belun te Isik su in-ehetan sikandin te me matig-Girara. 
Ne migkekali e man‑e ka me suluhuanen ni Isaak te lein ne belun. Piru migpaap-apuley red man‑e sikandan meyitenged te belun. Purisu, migngaranan ni Isaak ka belun te Sitna. 
Ne miggalin e man‑e ensi Isaak wey migpakekali e man‑e sikandan te lein ne belun. Nataman, warad sikandan eheti te me mahinged meyitenged te seeye ne belun. Purisu, migngaranan ni Isaak ka belun te Rihubut su migkahi sikandin, “Kuntee, imbehayan kid e te kaligwangan te Magbebaye ne Manama ne eg-ugpe te seini ne inged, wey meupiye e ka peg-ugpe ta kayi.” 
Ne miggalin e man‑e ensi Isaak diye te Birsiba. 
Te pegginguma rin diye te seeye ne karusileman, migpakita ka Magbebaye ne Manama kandin ne migkahi, “Sikeddi ka Manama te amey nu ne si Abraham. Kene ka kaaldek su egdumaan ku sikeykew. Egpanalanginan ku sikeykew wey egpamasuluhen ku ka me kabuhalan nu tenged te suluhuanen ku ne si Abraham.” 
Nataman, miggimu si Isaak te altar ne eg-unturan te egtutungen wey diye din e man‑e sayaa ka Magbebaye ne Manama. Ne migpasasindeg sikandin te balungbalung diye wey impakekali rin e man‑e ka me suluhuanen din te belun. 
Sabeka ne aldew, miggendiye ki Isaak si Hari Abimilik puun te Girara ne migparumeey ki Ahusa ne talagtambag kandin wey ki Pikul ne pangulu te me sundalu rin. 
Ne mig-inse si Isaak kandan, “Mania te miggendini kew keddi kuntee te egdumut kew ma keddiey wey indeldel e pad man‑e nikaniyu?” 
Migtabak sikandan, “Napamalehetan ney e kuntee ne egdumaan ka te Magbebaye ne Manama. Sikan naa ka nakasuman-suman key ne eggimu te kasabutan kayi te keykew. Egkeupian key ne egsaad ka 
ne kene key nikeykew egdereetan, su ware ney ma degma sikeykew dereeti. Layun ne meupiya ka inggimu ney keykew wey meupiya ka peg-awe nu. Ne kuntee, impanalanginan kad te Magbebaye ne Manama!” 
Seeye naa ka miggilutuan sikandan ni Isaak te dakel, ne nangekeen e wey nangiinum e sikandan. 
Te seup ne aldew, te maselem-selem pad, migpeyimuwey e sikandan te kasabutan. Nataman, impaligkat e sikandan ni Isaak ne meupiye e se me geyinawa. 
Te sikan de iya ne aldew, migginguma ka me suluhuanen ni Isaak eyew egkahi kandin te due weyig te belun ne ingkaliyan dan. 
Ne migngaranan ni Isaak ka belun te Siba. Purisu, ingngaranan ded te Birsiba ka seeye ne inged taman kuntee. 
Te hep‑at e ne pulu (40) ka idad ni Isaw, nakaasawa sikandin te daruwa ne Hitihanen, si Hudita ne anak ni Biiri wey si Basimat ne anak ni Ilun. 
Piru mahirap ka peg-ugpe enni Isaak wey ni Ribika tenged te me asawa ni Isaw.