Hinisis.
27.
Ne nabuyag e si Isaak wey kenad e egpakakita sikandin. Sabeka ne aldew, impeumew rin ka panganey ne anak din ne si Isaw wey migkahiyan din, “Tatu!” Ne migtabak si Isaw, “Nekey, Ame?” 
Ne migkahi si Isaak, “Kuntee, buyag ad e wey te kene egkaluhey, egpatey ad. 
Kua nu ka panganiban nu, ka piet wey me busug. Hendiye ka te mabbenes wey panitingeni e pa. 
Pegkapenga ne hilutui ad te mananam ne sere ne igkatelesi ku te egkeen, wey uyana nu kayi su egkeen a. Egkataman, egpanalanginan ku sikeykew te kene e pad egpatey.” 
Piru migpammineg bes si Ribika te peglalag ni Isaak ki Isaw. Sikan naa, te nekeyipanew e si Isaw ka egpanitingen, 
migkahiyan ni Ribika ka anak din ne si Hakub, “Nakarineg a te amey nu ne migkahiyan din ka kakey nu ne si Isaw 
te egpepanitingen wey egpeyilutuen sikandin te mananam ne sere su egkeenen din. Egkataman, egpanalanginan din e si Isaw diye te tangkaan te Magbebaye ne Manama te kene pad sikandin egpatey. 
Purisu, Tatu, tumana nu ka igsuhu ku keykew. 
Hendiye ka te me kambing wey angey ka te daruwa ne mallambeg ne nati su eggilutuan ku ka amey nu te mananam ne keenen ne igkatelesi rin te egkeen. 
Egkataman, uyana nu seini diye te amey nu. Ke egkakeen din e seini, egkapanalanginan kad nikandin te kene din pad egpatey.” 
Piru migtabak si Hakub te iney rin, “Bulbulen si Isaw piru malurung a mule. 
Kema ke egsamsamen a ni Ame ne egkanengnengan din ne eg-akalan ku sikandin, wey egdilusen ad nasi nikandin.” 
Ne migkahi ka iney rin, “Tatu, sikeddi ka egparilus ke egdilusen ka nikandin, tumana nu re iya ka inlalag ku. Na, hipanew kad wey angey kad te kambing.” 
Sikan naa ka mig-angey e si Hakub te daruwa ne kambing wey miggilutu e ka iney rin te mananam ne pegkeen ne igkatelesi te amey rin te egkeen. 
Ne ingkuwa ni Ribika ka subla ne mateles ne kumbale ni Isaw ne intines diye te baley wey impasaluub din e ki Hakub. 
Imbukusan din te laplap te kambing ka me belad ni Hakub wey ka lieg din ne malurung. 
Ne imbehey rin e ki Hakub ka mananam ne pegkeen wey paan ne inggilutu din. 
Seeye naa, miggendiyad si Hakub te amey rin wey migkahi, “Ame!” Ne migkahi si Isaak, “Seini e red. Hentew kaa, Tatu?” 
Migtabak si Hakub, “Si Isaw a, ka panganey ne anak nu. Natuman kud ka insuhu nu keddi. Na Ame, enew kad wey keen kad e kayi te mahintalunan ne ngalap eyew egpanalanginan ad nikeykew.” 
Piru mig-inse si Isaak, “Mania te mahaan ke re nekeutel, Tatu?” Ne migtabak si Hakub, “Imbulihan a te Magbebaye ne Manama nu.” 
Ne migkahiyan ni Isaak si Hakub, “Hendini ka eyew egpakasamsam a keykew, eyew egkanengnengan ku ke si Isaw ke naa iya.” 
Sikan naa ka migdani-rani e si Hakub diye te amey rin wey insamsam e sikandin te amey rin te migkahi, “Iling te laheng ni Hakub ka laheng nu, piru ka belad nu, iling te belad ni Isaw.” 
Ware neileyi ni Isaak si Hakub su bulbulen ka belad din iling te belad ni Isaw. Ne egpanalanginan din e perem si Hakub 
piru mig-inse pad man‑e sikandin, “Si Isaw ka iya?” Ne migtabak si Hakub, “Uya, sikeddi iya.” 
Ne migkahi si Isaak, “Sendari ad e te ngalap ne inggilutu nu. Ke egkakeen kud e sika, egpanalanginan kud sikeykew.” Ne insendad e seeye ni Hakub wey insendaran din pad man‑e te binu, ne migkeen e sikandin wey mig-inum. 
Nataman, migkahi si Isaak, “Hendini ka, Tatu, wey hareki a.” 
Sikan naa ka migdani-rani si Hakub ne miggarek ki Isaak. Te nakaarek e si Isaak te ngareg te kumbale din, henduen pad ne impanalanginan din si Hakub te migkahi, “Ka ngareg te anak ku nekeiling te ngareg te kabbenesan ne impanalanginan te Magbebaye ne Manama. 
Egbehayan ka te Manama te demmug ne egligkat diye te langit, wey egkeuyahan te pinamula ka kamet nu kayi te ampew te tane, wey egmatubung ka te keenen wey binu. 
Egkeyimu ne suluhuanen nu ka me nasud, wey egpamakey sikandan keykew. Egpakabuut ka te karumaan nu, wey egpeiluk-iluk sikandan keykew. Egdilusen seeye se egdilus keykew, wey egpanalanginan seeye se egpanalangin keykew.” 
Te nekeimpus e si Isaak ka egpanalangin ki Hakub, mig-awe e si Hakub diye te amey rin. Ne neiyuhan de iya sikandin ni Isaw te migpanitingen. 
Miggilutu degma sikandin te mananam ne pegkeen wey in-uyan din e seeye te amey rin. Ne migkahi sikandin, “Ame, enew kad wey keen kad e kayi te mahintalunan ne sere eyew egpanalanginan ad nikeykew.” 
Piru mig-insaan sikandin ni Isaak, “Hentew kaa?” Migtabak sikandin, “Si Isaw a, ka panganey ne anak nu.” 
Te sikan de, ingkelkel amana si Isaak wey migkahi, “Hentew naa ka migsendad e keddi te neutel din ne mahintalunan? Nakabusan e re iya nikeykew ka migkeen dutu, wey napanalanginan kud sikandin. Ne kene kud seeye egkaawi.” 
Te nakarineg dutu si Isaw, migpanaman e sikandin migpandalawit wey migkahi, “Ame! Panalangini e red degma nikeykew!” 
Piru migtabak si Isaak, “Ka hari nu bes ka miggendini ne mig-akal keddiey. In-ahew rin e ka panalangin nu perem.” 
Migkahi si Isaw, “Malehet iya ne egngaranan sikandin ki Hakub, su kararuwa ad nikandin ahawi. In-ahew rin ka katenged ku isip panganey wey kuntee, in-ahew rin e man‑e ka panalangin ku perem. Menua, warad nasame ne panalangin nu keddi?” 
Ne migtabak si Isaak, “Kuntee, neyimu kud sikandin ne ahalen nu wey egkeyimu ne suluhuanen din ka langun ne karumaan din. Egmatubung layun sikandin te keenen wey binu. Na, nekey bu naan de ka nasame ne igpakabehey ku keykew, Tatu?” 
Piru migpabulus si Isaw ka migpeyimmimenew te amey rin ka migkahi, “Warad iya panalangin nu keddi ne nasame, minsan deisek? Ame, panalangini e red degma nikeykew!” Ne migpanaman pad man‑e si Isaw migpandalawit. 
Ne intabak sikandin te amey rin, “Mariyu te egkeuyahan te pinamula ka egkeugpaan nu, wey mariyu degma seini te demmug ne egligkat diye te langit. 
Egkeuyag ka pinaahi te panganiban nu ne kampilan, wey egpamakey ka te hari nu. Piru ke eg-apul ka, egpakaawe ka te pegmandu din.” 
Ne indumutan ni Isaw si Hakub su sikandin ka napanalanginan te amey rin. Migkahi sikandin diye te geyinawa rin, “Te kene egkaluhey, egpatey e si Ame. Ne due, eggimatayan ku si Hakub.” 
Piru nahuhuran si Ribika meyitenged te peglelalis ni Isaw, sikan naa ka impeumew rin e si Hakub wey migkahiyan, “Eglelalisan ka te eggimatey te kakey nu ne si Isaw eyew egkabewu ka langet din keykew. 
Purisu, Tatu, tumana nu ka lalag ku. Pallahuy ka diye te maama ku ne si Laban ne diye mig-ugpe te Haran. 
Diye ke pa tagtaheed ugpe te kandin taman te egkabewu e ka langet te kakey nu keykew. 
Igpaangey ku re sikeykew ke egkalingawan din e ka inggimu nu kandin. Su kene ne meupiya keddi ne egpekeglegse kew egkaawe kayi te keddi.” 
Ne migkahiyan ni Ribika si Isaak, “Kena ad perem egpakaantus te me Hitihanen ne in-asawa ni Isaw. Ke egpakaasawa pad man‑e si Hakub te Hitihanen ne mahinged ded kayi, meupiya pad ke egpatey ad.”