Hinisis.
42.
Te seeye ne timpu, nakarineg si Hakub ne dakel ka egkakeen diye te Ihiptu. Sikan naa ka ingkahiyan din ka me anak din, “Mania te egmatengtengey kew re due? 
Te due narineg ku ne dakel kun ka egkakeen diye te Ihiptu. Na, hendiye kew wey beli kew te egkakeen eyew kene ki egkapatey te gutas.” 
Sikan naa ka miggendiye te Ihiptu ka sapulu ne kakey ni Husi eyew egbeli te egkakeen. 
Piru ware iparuma ni Hakub ka hari ni Husi ne si Binhamin, su napanseb sikandin kema ke due egkeyitabu kandin. 
Ne miggendiyad ka me anak ni Hakub te Ihiptu ne nekegtemu te duma ne me etew ne miggendiye degma te Ihiptu eyew egbeli te egkakeen, su due bitil diye te Kanaan. 
Si Husi ka gubirnadur diye te Ihiptu wey sikandin ka migpepameligye te egkakeen diye te me etew ne migpuun te langun ne nasud. Sikan naa ka miggendiye ki Husi ka me kakey rin ne miglangkeb diye te tangkaan din. 
Te pegkakita ni Husi kandan, nekeile e sikandin ne me kakey rin sikandan. Piru miglilibat ubag sikandin ne ware nekeila kandan wey miglangit-langit mig-inse, “Hendei kew ne mahinged?” Ne migtabak sikandan, “Matig-Kanaan key. Miggendini key su egbeli key te egkakeen.” 
Ne minsan nekeila si Husi kandan, piru ware sikandan nekeila kandin. 
Ne nasuman-suman din e ka me taheinep din dengan meyitenged kandan wey migkahi sikandin, “Me tahasiliban kew! Miggendini kew ka eg-iipat ke hendei lenged ne mahuye ka nasud ney.” 
Migtabak sikandan, “Kene, ahalen! Iyan ney innendini ka egbeli te egkakeen. 
Talaari key te amey. Kene key ne tahasiliban, ahalen, wey kene key ne me ubaten.” 
Migkahi si Husi, “Kene! Iyan niyu iya innendini ka eg-iipat ke hendei lenged ne mahuye ka nasud ney.” 
Migtabak sikandan, “Ahalen, sapulu key wey daruwa (12) ne talaari. Sabeka re ka amey ney ne matig-Kanaan. Diye ded te amey ney ka igkalitan wey migpatey e ka sabeka.” 
Piru migtabak si Husi, “Nakahi kud e ne me tahasiliban kew iya. 
Seini ka ig-eleg-eleg ku te inlalag niyu: Mengeyibet te ngaran te Hari te Ihiptu, wey kew re egpekeuli ke egpekeendini ka igkalitan ne hari niyu. 
Due sabeka kaniyu ne egpaangayen te hari niyu. Ne sikaniyu se nasame, palunggehaat kew kayi te prisuwan taman te egkapamalehetan ku ne malehet ka inlalag niyu. Piru ke ware, malehet iya ne me tahasiliban kew.” 
Nataman, imprisu rin sikandan langun seled te tatelu ne aldew. 
Te igkatelu e ne aldew, migkahiyan ni Husi sikandan, “Egkaaldek a te Manama. Ke egtuman kew te iglalag ku kuntee, egkeuyag kew. 
Ke kene kew ne me ubaten, sabeka re kaniyu ka egpalunggaat kayi te prisuwan, wey ka duma egpekeuli diye te miggutasan ne pamilya niyu ne eg-uyan te nabeli niyu ne egkakeen. 
Piru uyana niyu kayi te keddi ka igkalitan ne hari niyu eyew igpakapapitew niyu ne malehet ka inlalag niyu wey eyew kene ku egpeyimatayan sikaniyu.” Ne mig-uyun sikandan. 
Migpalalahey ka me kakey ni Husi ne miggenendue, “Neyitabu seini kanta su nakasale ki dengan te hari ta. Nakita ta ka keyirapan din te pegpeyid‑u-hid‑u rin kanta, piru ware ta pammineha. Purisu egkeyirapan kid kuntee.” 
Ne migkahi si Rubin, “Insaparan ku sikaniyu ne kene egdereetan ka bate, piru ware kew migpammineg keddi. Ne kuntee, egpabayaren kid te kamatayen din.” 
Nakasabut si Husi te lalag dan, piru ware sikandan nakanengneng, su nekeglalag sikandan pinaahi te talaggalin. 
Ne mig-awe si Husi diye te kandan wey migsinehew sikandin. Nataman, miglibed e sikandin wey miglalag man‑e kandan. Ne ingkuwa rin si Simyun wey impabaku din diye te tangkaan dan. 
Ne impeyipenu ni Husi te egkakeen ka me saku dan wey impatahu din ded ka me seleppi ne imbayad dan diye te me saku dan wey impabewuwan din degma sikandan te egkakeen te peggipanew ran. Ne natuman ka langun ne insuhu ni Husi. 
Ne indulanan dan e te egkakeen ka me asnu ran wey migligkat e sikandan. 
Te nakaaran e sikandan te seeye ne karusileman, imbukalasan te sabeka kandan ka saku din su egsunggud te asnu rin. Te sikan de, nakita rin ka seleppi din diye te be‑be te saku din. 
Migkahiyan din ka me suled din, “In-uli bes ka seleppi ku kayi te saku ku!” Te sikan de, naaldek wey ingkelkel e sikandan. Migpalalahey sikandan, “Nekey buwa seini se inggimu te Manama kanta?” 
Pegginguma ran diye te Kanaan, impangguhuran dan e ka amey ran ne si Hakub te langun ne neyitabu kandan. 
Migkahi sikandan, “Ka gubirnadur diye te Ihiptu, nabelu ka miglalag kanami wey imbayungan key ne tahasiliban key kun. 
Piru migtabak key, ‘Kene key ne me ubaten wey kene key ne tahasiliban. 
Sapulu key wey daruwa (12) ne talaari, wey sabeka re ka amey ney. Namatey e ka sabeka ne suled ney, wey diye ded kuntee te Kanaan ka igkalitan duma te amey ney.’ 
Ne migtabak sikandin, ‘Eg-el-elehan ku sikaniyu ke malehet iya ne kene kew ne me ubaten: Ihaat niyu ka sabeka kaniyu kayi te keddi wey uyana niyu ka egkakeen diye te eggutasan ne me pamilya niyu. 
Piru uyana niyu kayi te keddi ka igkalitan ne hari niyu eyew egkanengnengan ku ne malehet ka inlalag niyu ne kene kew ne me tahasiliban. Ke egtumanen niyu seini, ig-uli ku kaniyu ka suled niyu wey egpakabebeli kew red kayi te Ihiptu.’” 
Ne imbusbus dan ka me saku dan, wey diye ded te seled ka puntil te tagse sabeka kandan ne napenu te seleppi ne igbayad perem te egkakeen. Te nakita ran ka seleppi, naaldek sikandan langun. 
Ne migkahiyan sikandan te amey ran ne si Hakub, “Migpalungku kew keddi tenged te me suled niyu ne naawe. Warad si Husi; warad e si Simyun; wey kuntee, si Binhamin e man‑e ka egkuen niyu. Keyey! Neyitabu seini se langun kayi te keddi.” 
Ne migkahiyan ni Rubin ka amey rin, “Egpeyimatayan ku keykew ka daruwa ne anak ku ne lukes ke kene ku egkaruma si Binhamin te eg-uli kayi te keykew. Ipiyal nu re sikandin keddi wey egdumeen ku red iya sikandin te eg-uli kayi te keykew.” 
Piru migtabak si Hakub, “Kene ku igparuma kaniyu ka anak ku, su napatey e ka kakey rin wey sikandin naan de ka nasame. Ke due egkeyitabu kandin te peggipanew niyu, egpalaggawen ad man‑e nikaniyu wey egkapatey ad su buyag ad e wey kena ad egpakaantus te masumpit ne peglungku.”