Hinisis.
48.
Te ware naluhey, nahuhuran si Husi ne migderalu ka amey rin. Sikan naa ka inleuy rin si Hakub wey induma rin ka daruwa ne anak din ne ensi Manasis wey Ipraim. 
Te nahuhuran e si Hakub te miglepew e ka anak din ne si Husi, migtehel-tehel sikandin mig-enew wey migpinnuu diye te miggibatan din. 
Ne ingkahiyan ni Hakub si Husi, “Ka Manama ne Amana ne Maresen migpakita keddi diye te Lus, diye te tane te Kanaan wey impanalanginan a nikandin. 
Migkahiyan a nikandin, ‘Egbehayan ku sikeykew te masalig ne kabuhalan eyew egkeyimu sikandan ne masalig ne nasud. Ne igbehey ku kandan ka seini ne tane wey sikandan e ka kamuney kayi te ware egtamanan.’ 
Ne ka daruwa ne anak nu ne si Ipraim wey si Manasis ne miglesut kayi te Ihiptu te ware e pad miggendini, eg-anaken kud e sikandan. Eg-isipen kud sikandan ne me anak ku iling engki Rubin wey Simyun. 
Kene kud eg-anaken ka me hari ran, su keykew e sikandan. Ke egkapatey ad, diyad e sikandan egpakakuwa te karatuan engki Ipraim wey ki Manasis. 
Te pegligkat ku diye te Padan-aram, migpatey e ka iney nu ne si Rakil diye te Kanaan te mariyu key pad te Iprata. Amana a miglungku te pegpatey rin wey diye ku ilebeng sikandin te ilis te dalan peendiye te Iprata (wey ke Bitlihim).” 
Te pegkakita ni Hakub te me lukes ne anak ni Husi, mig-inse sikandin, “Hentew‑a seini se me lukes-lukes?” 
Ne migtabak si Husi, “Seini ka me anak ku ne imbehey te Manama keddi kayi te Ihiptu.” Ne migkahi man‑e si Hakub, “Ipeparani nu sikandan kayi te keddi su egpanalanginan ku sikandan.” 
Te seeye ne timpu, kenad e egpakameleg-meleg si Hakub su buyag e amana sikandin. Seeye naa, impeparani e ni Husi ka me anak din diye ki Hakub, wey migkepkepan wey migpangarekan din sikandan. 
Ne migkahiyan ni Hakub si Husi, “Wara ad mig-iman-iman ne egkakita ku pad sikeykew, piru kuntee, mania te kene ne sikeykew re ka impakita keddi te Manama, su minsan degma ka me anak nu?” 
Ne impeensig ni Husi ka me lukes-lukes ligkat te buel ni Hakub wey miglangkeb sikandin diye te tangkaan te amey rin. 
Ne nataman, inggen-genan ni Husi ka me anak din wey ingkitkit din peendiye ki Hakub. Ne diye din si Ipraim te kawanan din wey diye te gibang din si Manasis, eyew si Ipraim ka diye te igkahibang ni Hakub wey si Manasis ka diye te igkakawanan din. 
Piru impegsaliyu ni Hakub ka belad din. Diye din itel-eb ka kawanan ne belad din te ulu ni Ipraim ne iyan ka hari, wey diye din itel-eb ka gibang ne belad din te ulu ni Manasis ne iyan ka kakey. 
Ne impanalanginan din ensi Husi te migkahi, “Egpanalanginan seini se me anak nu te Manama, ne insimba te apu ku ne si Abraham wey te amey ku ne si Isaak, ne iyan ded degma ka Manama ne layun migpanulu keddi. Egpanalanginan degma sikandan, te panalihan te Manama ne migpangabang te langun ne egpakarereet keddi. Ne egkasuman-suman te me etew ka ngaran ku, ka ngaran te apu ku ne si Abraham, wey ka ngaran degma te amey ku ne si Isaak pinaahi kandan. Egkabuhal-buhal sikandan wey egnenasud dan e.” 
Te pegkakita ni Husi ne ka ulu ni Ipraim ka intel-eban te kawanan ne belad te amey rin, neepes sikandin. Sikan naa ka inggen-genan din ka belad te amey rin eyew eggalinen din perem diye te ulu ni Manasis. 
Ne migkahiyan ni Husi ka amey rin, “Kene, Ame! Seini ka panganey ne anak ku. Kayi nu itel-eb ka kawanan ne belad nu te ulu rin.” 
Piru mig-apul ka amey rin ne migkahi, “Tatu, nakanengneng a. Ka me kabuhalan ni Manasis, egnenasud ded degma te dakel. Piru ka hari rin ka egpakasubla kandin wey egnenasud te dakel ka me kabuhalan din.” 
Sikan naa ka impanalanginan din sikandan te seeye ne aldew te migkahi, “Egkarawit ka me ngaran niyu te me kabuhalan ni Israil ke egpanalangin sikandan te duma. Egkahi sikandan keureme, ‘Egpanalanginan kew te Manama iling te panalangin din ki Ipraim wey ki Manasis.’” Sikan naa ka impewun‑a ni Hakub ka ngaran ni Ipraim ki Manasis. 
Ne migkahiyan ni Hakub si Husi, “Mahaan ad egkapatey, piru egdumaan kew te Manama wey igpalibed kew nikandin diye te Kanaan ne inged te me kaap-apuan niyu. 
Ne sikeykew ka egbehayan ku te inged te Sikim, kene ne me suled nu. Naahew ku seeye ne tane dengan puun te me Amurihanen pinaahi re te kampilan wey me busug ku.”