Hinisis.
49.
Nataman, impeumew e ni Hakub ka me anak din wey migkahiyan, “Libulung kew kayi su igpangguhud ku kaniyu ka egkeula-ula niyu keureme. 
“Hendini kew wey pammineg kew, me anak ku; pammineg kew keddi te amey niyu. 
“Rubin, sikeykew ka panganey ne anak ku, sikeykew ka keseg ku, wey ka an-anayan ne palinneu te pegkalukes ku. Subla ka bantug nu wey katenged nu te langun ne me anak ku. 
Piru iling ka te baggiyu ne kene egkabalabahan. Purisu kenad e ne subla ka bantug nu, su miggulid ke ma te sabeka ne asawa ku ne uripen, wey inlinditan nu ka hibatanan ku. 
“Si Simyun wey si Libi, talaari, wey nasabeka ka isip dan. Inggamit dan ka me kampilan dan eyew egpanlusud. 
Kena a eg-ambag-ambag te me planu ran, wey te me pegliblibulung dan. Su emun ke egkabelu sikandan, eggimatey iya te etew, wey ke egkasakat sikandan ne egpanggepuan dan ka me baka, egpanggepuan dan iya. 
Egdilusen sikandan tenged te masumpit ne belu dan, wey te egmangebel-ebel degma ne langet dan. Purisu, egpegsuwayen ku sikandan diye te inged te Israil, wey diye ku degma egpegsuwaya ka me kabuhalan dan. 
“Huda, egdayanen ka te me suled nu. Egkareeg nu ka me kuntere nu. Eg-unduk ka me suled nu diye te tangkaan nu. 
Iling ka, Huda, te nati te liyun ne nakarawi e, ne eg-uli e diye te helesanan din wey egbuluku e. Ne ware egpakarani-rani kandin. 
Eggen-genan nu, Huda, ka tuked te Hari, wey egpakamandu ka me kabuhalan nu taman te peglepew te Hari ne malehet ne kamuney, ne iyan egtumanen te langun. 
Iggiket din ka nati ne asnu rin diye te subla ne meupiya ne pinamula ne paras. Iyan din igpi‑pi te kumbale din ka binu, su neuralan e sikandin. 
Subla pad ne meitem ka mata rin te binu, wey subla pad ne maangkag ka ngipen din te gatas. 
“Sabulun, diye ka eg-ugpe te ilis te dahat. Meupiya ne tuhunanan te me barku ka lenged te tane nu, wey diye egkataman te Sidun ka tane nu. 
“Isakar, iling ka te manekal ne asnu ne egbuluku minsan indulanan. 
Ke egkakita nu ne meupiya ka eggimelayan nu wey meupiya degma ka tane, egkeenat nu ka dulan nu wey egkapehes ka eggimu isip uripen. 
“Dan, egpakamandu ka te me etew nu, iling te duma ne kabuhalan te Israil. 
Iling ka, Dan, te uled diye te ilis te dalan, iling te mammiley ne egkahat te paa te kudde eyew egkewulus ka mig-untud.” 
Ne migkahi si Hakub, “Egtetahad a te kaluwasan ne egligkat keykew, Magbebaye ne Manama.” 
“Gad, eglusuran ka wey egpangahawan te me kuntere nu, piru eglupuhen nu sikandan te egsuli. 
“Asir, mananam ka egkeenen nu, wey eg-andam ka te egkakeen ne eleg te Hari. 
“Naptali, iling ka te usa ne kuleping ne inlekaan, wey eg-anak te mateles ne me nati. 
“Husi, iling ka te mahintalunan ne asnu ne diye te sebseb; iling te nati te asnu ne mahintalunan ne diye te masandig. 
In-atangan ka te me tummawan ne egpane te ware pegkeyid‑u. Ne impane ka nikandan wey in-ehetan. 
Piru kene degma egkasanggel ka pegsuli nu pegpane kandan, wey manekal layun ka belad nu tenged te geem te Maresen ne Manama ni Hakub, ka Talagtameng wey ka Dakel ne Batu ni Israil. 
Ka Manama te amey niyu ka egbulig kaniyu, ka Manama ne Amana ne Maresen ka egpanalangin kaniyu. Egpanalanginan kew nikandin te uran, wey te weyig ne egligkat diye te diralem te tane. Egbehayan kew nikandin te masalig ne me anak. 
Ka me panalangin te amey niyu, subla pad ne dakel te katubung te ware egtamanan ne me bubungan, wey subla pad ne meupiya te katubung te tapey ne me bubungan. Egkarawat nu seini, Husi, ne labew te me suled nu. 
“Binhamin, iling ka te bubuluti ne singgalung. Te maselem pad, egkeenen nu ka impammued nu, wey te maapun e, egpanalaren nu ka same.” 
Sikandan sika ka sapulu wey daruwa (12) ne anak ni Israil. Seeye ka inlalag te amey ran te pegpanalangin din kandan te panalangin ne eleg te tagse sabeka kandan. 
Ne nataman, impanpanayan sikandan ni Hakub, “Hapit ad egkapatey. Isabal a nikaniyu diye te sulung ne diye te kamet ni Iprun ne Hitihanen ne insabalan te amey ku wey apu ku. 
Sika ka sulung ne diye te Makpila ne diye dapit te igsile ligkat te Mamri, diye te inged te Kanaan. Nabeli ni Abraham diye ki Iprun ka sika ne sulung wey kamet eyew eggimuwen ne sabalanan. 
Diye isabal si Abraham wey si Sara ne asawa rin. Ne diye degma isabal si Isaak wey si Ribika ne asawa rin, wey diye ku red degma isabal si Liya. 
Nabeli e diye te me Hitihanen ka sika ne kamet wey ka sulung ne naseled dutu.” 
Te nekeimpus e si Hakub ka migpaney-paney te me anak din, miggibat e man‑e sikandin. Ne migpatey e sikandin wey nakalemung e te me karumaan din ne nammatey.