Iksudu.
1.
Seini ka me ngaran te me anak ne lukes ni Hakub ne migduma kandin diye te Ihiptu wey ka me pamilya ran: 
Si Rubin, si Simyun, si Libi, si Huda, 
si Isakar, si Sabulun, si Binhamin, 
si Dan, si Naptali, si Gad, wey si Asir. 
Ne si Husi tapey e mule diye te Ihiptu. Pitu ne pulu (70) langun ka me kabuhalan ni Hakub. 
Nataman, migpatey e si Husi wey ka langun ne me suled din, wey ka langun ne neetew te kandan ne timpu. 
Piru nanganak-anak ka me kabuhalan ni Israil wey amana sikandan nabuhal-buhal. Ne puun su migmasalig e sikandan, migmaresen e sikandan wey nekeempet e te Ihiptu. 
Te naluhey-luhey e, duen e iyam ne mighari te Ihiptu ne ware nekeila ki Husi. 
Ne migkahiyan din ka keet-etawan din, “Pammineg kew, amane e ne masulug ka me kabuhalan ni Israil wey madmaresen pad sikandan kanta. 
Sikan naa ka egpamuhawang ki eg-ayad-ayad eyew kenad sikandan egmasulug pad. Su kema ke egsaamul sikandan te me kuntere ta ne eglusud kanta, wey egpakaawe e sikandan kayi te inged ta.” 
Purisu migkuwa sikandan te me etew ne egpangulu te me kabuhalan ni Israil eyew egpatrabahuwen te masumpit. Imbaybayran dan sikandan ne egpekeyimu te me siyudad ne egngaranan te Pitum wey Ramisis eyew egtinesan te egkakeen wey kasangkapan te Paraun ne Hari te Ihiptu. 
Piru minsan impatamtamanan sikandan te egbayad-bayad, nanasnasian de iya sikandan migmasalig wey nasi e nekeempet te Ihiptu. Seeye naa, nabantalan e kandan ka me Ihiptuhanen. 
Ne impatamtamanan e sikandan baybayari te me Ihiptuhanen iling te me uripen 
wey imbaybayaran te mabbehat ne me himu. Impeyimu sikandan te me tisa wey impakehal ne me basak, wey impataman-taman sikandan ipabasuk diye te me kamet. 
Nataman, migkahiyan te Paraun ka me mangnguyamu te me Hibruwanen ne si Sipra wey si Puwa, 
“Emun ke eg-uyamu kew te me Hibruwanen, himatayi niyu ke lukes ka bate, piru uyaha niyu ke malitan.” 
Piru egkaaldek te Manama ka me mangnguyamu, wey ware dan tumana ka insuhu kandan te Paraun, wey nasi dan uyaha ka me bate ne lukes. 
Seeye naa, impeumew e te Paraun ka me mangnguyamu wey mig-insaan din, “Mania te ware niyu tumana ka insuhu ku kaniyu? Mania te ware niyu pangimatayi ka me lukes ne bate?” 
Ne migtabak ka me mangnguyamu, “Kene nahud ne iling te Ihiptuhanen ne me malitan ka me Hibruwanen ne me malitan. Eglemuwan de sikandan ke eg-anak wey eglesutan e te kene key pad egginguma ka eg-uyamu.” 
Seeye naa ka mig-upianan te Manama ka me mangnguyamu, wey nanasnasian pad iya migmasalig ka me kabuhalan ni Israil. 
Ne puun su due pegkaaldek te me mangnguyamu diye te Manama, imbehayan din sikandan te kandan ne pamilya. 
Nataman, insuhu te Paraun ka langun ne keet-etawan din te migkahi, “Iregpak niyu diye te Weyig ne Nilu ka langun ne lukes ne sikan pad ig-anak te me Hibruwanen, piru uyaha niyu ka langun ne malitan.”