Iksudu.
7.
Ne migkahiyan te Magbebaye ne Manama si Muwisis, “Pammineg ka! Egpekeiling ka te Manama diye te Paraun ne Hari te Ihiptu, wey ka suled nu ne si Aarun ka egpekeiling te prupita nu ne iyan egpakiglalag kandin. 
Ipahuhud nu ki Aarun diye te Paraun ka langun ne igsuhu ku keykew. Panangeni nu ka Paraun ne egpaaween din ka me kabuhalan ni Israil diye te inged din. 
Piru egpakehalen ku ka ulu te Paraun, wey minsan pad eggimu a te masulug ne me palinneu wey me kein-inuwan diye te inged te Ihiptu, 
kene iya sikandin egpammineg keykew. Egkataman eglegparan ku ka Ihiptu te pegpaawe ku te keet-etawan ku ne me kabuhalan ni Israil ligkat diye ne inged. 
Ke egkalegparan kud e ka Ihiptu wey igpakapaawe kud ka keet-etawan ku, egkanengnengan e te me Ihiptuhanen ne sikeddiey ka Magbebaye ne Manama.” 
Ne intuman ni Muwisis wey ni Aarun ka insuhu te Manama kandan. 
Walu ne pulu (80) ka idad ni Muwisis, wey walu ne pulu wey tatelu (83) ka ki Aarun te timpu ne migpakiglalag sikandan te Paraun. 
Ne migkahiyan te Magbebaye ne Manama si Muwisis wey si Aarun, 
“Emun ke egpeyimuwen kew te kein-inuwan te Paraun eyew pamalehet niyu, ne iparegpak nu naa Muwisis ki Aarun ka tuked din diye te tangkaan te Paraun eyew egbaluy ne uled.” 
Sikan naa ka miggendiye sikandan te Paraun wey inggimu ran ka insuhu te Manama kandan. Indegpak ni Aarun ka tuked din diye te tangkaan te Paraun wey te me upisyal din, wey migbaluy seeye ne uled. 
Ne impeumew te Paraun ka me etew rin ne me matagseb wey ka egmahehane, ne sikandan ded iya man‑e ka egmammulingan diye te Ihiptu. Ne nekeiling degma sikandan te seeye ne kein-inuwan tenged te me pamulingan dan. 
In-antug dan langun ka me tuked dan wey namaluy degma ne me uled, piru impangabeleng de te uled ni Aarun ka me uled dan. 
Piru minsan iling dutu, makehal ded iya man‑e ka ulu te Paraun wey ware migpammineg kandan, iling te ingkahi te Magbebaye ne Manama. 
Nataman, migkahiyan te Magbebaye ne Manama si Muwisis, “Makehal ka ulu te Paraun wey kene din iya egpeyipanawen ka me etew. 
Sikan naa, hendiyei nu sikandin te maselem te peggendiye din e te Weyig ne Nilu, wey pakigkita ka kandin diye te ilis te weyig. Ne uyana nu naa ka tuked ne migbaluy ne uled. 
Ne kahii nu sikandin, ‘Impeendini a keykew te Magbebaye ne Manama te me Hibruwanen, wey impanangenan ka nikandin te peyipanawa nu ka keet-etawan din eyew egpakasimba sikandan kandin diye te katalunan. Piru ware ka migpalintutuu taman kuntee.’ 
Purisu migkahi ka Manama keykew, ‘Egpeileen ku sikeykew ne sikeddiey ka Magbebaye ne Manama. Pammineg ka, eglampesan ku te tuked ku ka Weyig ne Nilu, wey egbaluy seini ne langesa. 
Egpamatey ka me isda wey egmangareg e ka weyig, wey kenad e egpekeinum ka me matig-Ihiptu te sika ne weyig.’” 
Ne migkahiyan pad man‑e te Magbebaye ne Manama si Muwisis, “Nangeni nu si Aarun te igpakuwa ka tuked din wey igpakayew ne igpalenged diye te me beuhan, wey diye te me kanal, wey diye te me subung, wey diye te me limuranan te weyig diye te Ihiptu eyew egbaluy seeye langun ne langesa. Ne egpekeempet ka langesa diye te Ihiptu, minsan ka me weyig ne diye te me tahuanan ne kayu wey batu.” 
Ne intuman ni Muwisis wey ni Aarun ka insuhu kandan te Magbebaye ne Manama. Ingkayew ni Aarun ka tuked din diye te tangkaan te Paraun wey te me upisyal din wey inlampesan din ka Weyig ne Nilu, wey migbaluy e seini ne langesa. 
Nammatey ka me isda wey migmangareg e amana ka Nilu, sikan naa ka kenad e egpekeinum ka me Ihiptuhanen te weyig. Ne nekeempet de iya ka langesa te inged te Ihiptu. 
Piru neilingan degma seeye te egmahehane diye te Ihiptu tenged te me pamulingan dan. Sikan naa ka migmakehal ded man‑e ka ulu te Paraun wey ware sikandin migpalintutuu kandan, iling te ingkahi te Magbebaye. 
Ne mig-awe e ka Paraun wey mig-uli e diye te baley rin, wey imbalahad din de ka neyitabu. 
Ne migkekali ka langun ne Ihiptuhanen diye te ilis te Weyig ne Nilu eyew egpakasakug sikandan te weyig ne egkeinum dan, su kenad sikandan egpekeinum te Weyig ne Nilu. 
Ne miglihad e ka pitu ne aldew puun te peglampes te Magbebaye ne Manama te Weyig ne Nilu.